Filippi 3 - Bibliyeeda Ghaydit

Doobiiwnata huumwa

¹ Asi aba huuydeanda, orjooga giyeanya, ahoosana aba jeeda Ng'utamiida. Ak geang'oorneegwa ng'asheega uurji giika nea meapri, ak abeeda gaygwalealneegwa.

² Ashageada gudajeega, ashageada fuga gadiyeeda munyas, ashageada fugiga iissa ghwalajaada saseedean.

³ Aba gideaba aseasa geewooschi ghasmeahooda huumwa, gadoowan ASEETA aba guroorooda, ea gheambalmeeda aba jeeda Gristo Yesu, fuga mwarara ng'asheega saseeda.

⁴ Earapeadi eandeawi gichea darara saseeda. Siida wassean iimideawa gichea ghwarara saseeda ghaaraanyi aniini:

⁵ Geayaadan ghasmeahooda eaweedeaba sis, ak geawooschi siida eemeeda Israeli, bea dooshta Benjamini, ak geawooschi siida Ebraniya jih fuga Ebraniya; nea aba ging'ooyda deaweeda geawooschi Farisaayajeanda,

⁶ ak geasinyi badiida muuchi dasawan ganiisa, aba badayda doobiiwnata sinyasa deaweeda majeerukuna badaydeanyu ng'asheega munyas.

⁷ Nea haleanjeedida sean ghayi anung' ghoah gida huumwa aba heedeanyuun ghamneawa ghaanung' gawuurji roodaweega aba badayda Gristo.

⁸ Aba huumwa ghaanung' ghoah haleanjeeda sean gil nirooda aba gidida naawda aba nalooda Gristo Yesu was Ng'utamiideanyuun. Aba badaydaanyi naanung' gwarooda haleanjeeda sean, ak ghaanung' ghoah haleanjeeda mwadaagha, ak abeeda ghaanyaschi Gristo

⁹ ak geenyasan aba jeadaanyi, ak ea meandeawani doobiiwnateanyu, mida jeeda deaweeda, geaghus diita sinyasa naweeda masaweega aba jeeda Gristohiin, doobiiwnatida leabu heeda ASEETA sinyas aba masaweegean;

¹⁰ ak abeeda ghaanali niny ea uurda duunoadaanyi, ak geawuurjeewi niny aba jeeda miyeadaanyi.

¹¹ Ak abeeda iijea ghoah ghaanyaschi duunooda miyeeda.

Fachsiinda gidamida mwadi

¹² Ak ea mii gideaba naanyaschi ghana gideaba neawooschi hidaat gil; geamajeekchi badiida danyas ak ghoah deanyu, aba gideaba ninung' Gristo Yesu doaw siidaanyi.

¹³ Orjoogiyya, aniini meaguureewani geaw siida ninyas; ak geasinyi ng'asheanjagi, ghaanung' gwaroosean ng'asheega mida bwadaw ak geamiriikchi beateaba mwadi heeda mida gidida siyiin mwadiin.

¹⁴ Geamajeekchi beata dagal heeda gideabuurbuurji jea danyasa giimearda jea gwaleabu guurnooda leabu heetiyeada bea ASEETA aba jeeda Gristo Yesu.

¹⁵ Anung'waada fugiga ikaasa nihitiisa heedean gwasunu fughareenga nyaawa; nea aba jeedeang'wa iimida gidagasa eerada gayghoahiimneegwa ASEETA.

¹⁶ Anung' eakghusa ging'ooyda huumeanda aba gidida sinyaschiin.

¹⁷ Orjoogiyya, oang'waanya searoojigeasu, nea gooroorji fugiga abiideata gidoowuurjeewiin nea googalaneasa.

¹⁸ Aba heeda fuga saang'a, nearukuneegwa ak ghamneawa gearukuneegwa nea ghaabuudu dabeaka, anung'waada gawuurji weajoodiga beehiida Gristo.

¹⁹ Mudeanoodeaba fiisu nyariida gil, ak aseeta nyaawa ea jeeda gil, ak ng'asheega aghaambiida geat ea gea baspaseega gil, mideawa fughareenga ng'asheega ng'eanyiida.

²⁰ Aba gideaba aseasa ng'eang'deanya gwanda humng'eeda, ak ghamneawa geamuughu lealnoocheanda, nea Ng'utamiida was Yesu Gristohi,

²¹ jea ghwayam sasanuukaasa nyeauuriin, ak ghwanung' gawuurji sea saseadaanyi ghaambiidaat, aba uurda iissa ghoomu gwasin ghapka haleanjeeda sean headaanyi.