Filippi 2 - Bibliyeeda Ghaydit

Eatoodeaba geaw bea ng'eanyi ea hawunda Gristo

¹ Nea iimida giimajeekta jeeda Gristo, ghana gichea goomajeek bariinyeega, ghana gidasiguyeesa aba jeeda Guroorooda, ghana iimida bariinyeega ghana baydeayda,

² oahiida hooseaneegeasu nea goobeayi fughareanagi, nea gawuurji bariinyeegeagwa, nea ghoang'waay geat ng'asheegeagwa, nea goobeayi fughareanagi.

³ Adisini ng'asheanda aba shidoodeaba ghaang' ghana aba ghwarjeeda, sina aba eateaba geaw bea ng'eanyi nea ginung' ghoah buuneeda suurja fuga miyaasiin ea ghang'aleagwa.

⁴ Adagaba siisi ng'ula gidagasa niny ak ghwahit, daba siisi ng'ula gidagasa buuneesuurja.

⁵ Andeawana ng'asheesu aba jeesingeagwa, ghayi oondeawi aba jeeda Gristo Yesu,

⁶ earapeadi niny ghayi uurji sea ASEETA, ea mwanung' ghoah gil uurjeata bea ASEETEAN ak ghoah gichea ghoang'waay.

⁷ Ak gwahinda geaw siida mandeawana gil, nea gawuurji sea soomjeanda, ak geeji nea gawuurji buuneeda.

⁸ Iidu nea geadaah nea gawuurji siida, ghwaat geaw ng'eanyi nea gwasin mureeda ea ghwahita miyeeda, eara miyeeda uhuuda beehiida.

⁹ Aba sareani ghoah gida adiing'deawa ASEETA humng'eeda muuchi ak ghoadaw gheawunga laabwa hoowa gheawunga suurja,

¹⁰ aba gideaba aba gheawunga Yesu giliwas gudung'uda gaygwatkuy, gea fuga mida humng'eeda ghana gea mida ng'eanyiida, ea gea mida uuta ng'eanyiida,

¹¹ ak gaygaba siisi rukuna ghuutaanyi gideaba Yesu Gristo Ng'utamiida gil, aba giigheambiita ASEETA was Ghweanda.

Weeshinda uurji gheaboonyanga aba jeeda ng'eanyiida

¹² Asi fugeasu aabwariinyi, aba gideajusu oondeayeati mureeda galeagasean, asi ghamneawa, ea adoosinyi gideabali ghwaraanya muuchi iimeandani hiji, agadiyeesiina lealeanoodeang'wa aba muuwda nea ghoabwadanyi;

¹³ aba gideaba ASEETA gagadiiy aba jeesingeagwa, ak gagooneegwa gasooda ea sinooda ng'asheega miyaasiin gasa niny.

¹⁴ Asina ng'asheega sean nea adagwarinaneegwa giiniikghta ghana sheang'nyeeda,

¹⁵ ak ea meerukunana badahuukeagwa ng'asheega munyas nea ghoahuuyi fuga manda giidiinyeanda, diibiga ASEETA meerukunana badahuuka ng'asheega munyas mida bugusta seaygeeda gwaneadi bea ng'ooweata, ak ghoayeati weeshinda, aba jeenyaawa aba jeeda ng'eanyiida,

¹⁶ nea ghoang'waay muuchi ng'asheanda eaweega, ama muchu eaweeda Gristo ghaamuuschi daghwara geaw aba gideaba mwaafwaji mwadaagha ghana dagadiiyi mwadaagha.

¹⁷ Eara eayiinan uhuuda haleanjeeda sisapa geadi bea ghadooweeda aba badayda masaweegeagwa, aniini geahoosanyi nea geang'weelayi sea agoogeeni seaniin.

¹⁸ Gwasunu eara agooga ang'weela nea goohoosanyi sea aniini.

Dimoteo sea Epafradito

¹⁹ Ak ghaararji aba jeeda Ng'utamiida was Yesu gideaba gaydeajeagu Dimoteo gabean ghwahidu heedeang'wa, ak abeeda geegwarsean aba iiteang'wa.

²⁰ Aniini meandeawani sih nuut uurji niny, bea huumwa nea gwahirbaban aba ng'asheega badahuukeagwa.

²¹ Saawa gaba siisi ng'ula gidabwariiy, nea mii fugiga bea Yesu Gristohiin.

²² Dimoteo ghamneawa ghwaloat gil aba headaang'u, gawuurji orjeeda ea ghwaan niny geaweecheewi aba gadiyeeda giijasta miy.

²³ Ghaararji gideaba gaydabean deajeagu iyaadaayi gichea gawuurji ng'asheegeasu;

²⁴ ak ghaamwaschi aba heeda Ng'utamiida gideaba eara aniini gaydabean dahidu.

²⁵ Geagasayi deajeagu heedeang'wa Epafradito, was orjeediyya, easinuudayeewi gadiyeeda, was shirikarajeanda uurjeewean, nea giijasoocheandeang'wa gil, nea weedaneeda gil aba haleanjeedeanyu eagasayi.

²⁶ Nea niny abeeda gagasa ghwadaaheang'wa oogasean, ak ghang'ut giiseaneega aba gideaba noayiinyi gideaba niny ghamnyaan.

²⁷ Aba huumwa ghamnyaan, ea ghwariikghta ghami. Iidu ghabwayda ASEETA niny, ak ea meakghusa niny, eara aba badaydeanyu, amadu ea moawa aba heedeanyu sawanadeeda naawda.

²⁸ Aniini geagasayi muuchi deajeagu niny, ak abeeda goohoosanyi aba iyoobiikti adaaha gicha, ak abeeda ghwasuunya ng'asheegeasu.

²⁹ Asi adeapta niny aba hooseaneega sean aba naweeda Ng'utamiida, ak fuga uurji nih gammiisa gideaba gajeataw mureeda,

³⁰ aba gideaba gwaramagu ghami aba gadiyeeda Gristo, nea gwaramagu gabeagu eaweagaaschi ak ghoahiit gadiyeedeang'wa aba heedeanyu.