Efeeso 6 - Bibliyeeda Ghaydit

Diibiga ea ghweaniga nyaawa ea gheamadiga nyaawa

¹ Diibiga, asisiina mureeda ghweanigeagwa ea gheamadigeagwa aba naweeda Ng'utamiida, aba gideaba ng'asheanji ghwadoabiiw.

² “Sissiina gweanu mureeda ea geamadu” (diigheanji nih diigheanda madeeda gil mideawa neajeeda),

³ “ak ginyasi ng'wanooda nea giibiidi gweanyeeka saang'a jeeda ng'eanyiida.”

⁴ Ghweaniga, adoonyareesayi diibigeagwa, oareara nea ghoanung' ghwanyas mureeda ea giinealshooda Ng'utamiida.

Soomjooga ea Fuga hees

⁵ Soomjooga, asisiina mureeda fugeagwa hees bea ng'eanyiida, aba muuwda nea ghoaboadanyi, ea doobiiwnata guroorooda, gawuurji giloosisi Gristo;

⁶ nea mii gideaba googadiyeesi aba gheanyanga gil ak ghwahit, gawuurji fuga ahoosan buuneeda, gagasa gawuurji soomjooga Gristo, nea goosinyi ng'asheega bwariiy ASEETA leabu jih,

⁷ asina gadiyeedeang'wa nea goobeayi jeesinga miyaasiin aba gideaba googadiyeesi Ng'utamiida mii siida gil,

⁸ nea ghoanali gideaba gidamiy wassean sin siida, gaygabiikta ghwanyas gicha aba heeda Ng'utamiida, ea giing'oonyaneeda gil ghanea siida abal geawi.

⁹ Fuga hees, asisiina ng'asheega sunu saawa, nea ghoanung'waadi giimuuwda, nea ghoanali gideaba dea was siida nyaawa haw ea deang'wa gwanda humng'eeda, ea gideaba headaanyi manda shiitmeeda.

Dabita sean bea ASEETA bea ng'ucheeda

¹⁰ Aba huuydeanda awoosa majeekcheewi aba jeeda Ng'utamiida ea aba giimuusta ea uurdaanyi.

¹¹ Oang'waanya dabita ng'ucheeda sean bea ASEETA ak gajoamuusa oateala ng'asheega reengaweega bea meang'nyeandeenda.

¹² Aba gideaba ng'ucheedeanya maba saseeda ea foojeanda gaba badayda sugoocheanduumeeda ea gheambalmeeda aba badayda fuga ambaliischi bea jeedeaba misaneani, aba badayda shirikareeda meangeenda munyas aba jeeda darooraka humng'eeda.

¹³ Asi aba sareani oang'waanya dabita ng'ucheeda sean bea ASEETA, ak abeeda gajoamuusa ang'ucheena damandida bea ng'asheega munyasiin, abeeda iyoahiichi ghoamiinaadi.

¹⁴ Asi amiinaada, nea radeadi mananuunatkeagwa aba huumeanda, ak gookweali nea goodiinyi igeambooda ng'ucheeda doabiiwaat aba daghanunatkeagwa,

¹⁵ ak gidoogasiidi rukwiideayda Giijasta Miy bea hoyyooyda anung' gawuurji geeka aba geeshangeagwa;

¹⁶ aba badaydeaba suh seaniin, oang'waanya igeambooda masaweega, ak abeeda gajoamuusa ahiirjeaweada geatka sean bea furgweega bea diita muyiin.

¹⁷ Ak ghoang'waanyi ngoofajeanda hang'waay bea lealeanooda, ea ng'uta Guroorooda was ng'asheega ASEETA.

¹⁸ Amwaasha ASEETA damanyoojiga sean aba jeeda Guroorooda aba mooshta sean bea ASEETA ea badita. Ak ghoang'wearu nea ghoashng'u aba badita ASEETA aba badahuuka fuga ghaydidi sean,

¹⁹ ak gwasunu eara aba heedeanyu, ak abeeda ghaamuuschi darukuta iyaajaachi ghuuteanyu ak gearukuti makcheameeda funyaat bea giijasta miy,

²⁰ Ak aniini geawooschi siida siicheagu ak geandi ghealooniga; asi amwaasha ASEETA aba badaydeanyu daamu darukuta giijasta miy ghabeada gidamiisean rukuteayda.

Giighacheeka huuydean

²¹ Asi agooga iyoogasayi anala gideawuurjeewi ea gideasinyi, gaygwarukuneegwa Dikikoheeda aabwariinyi was orjeediyya ak gabiissa ea siida doabiiwaat gil aba heeda Ng'utamiida niny gaygwarukuneegwa haleanjeeda sean.

²² Ak ea neajeagu niny heedeang'wa aba badaydeaba ng'asheesu, ak ghoanali gidasiwuurjeewi, nea goomajeek jeesingeagwa.

²³ Gagasa ghwanyas orjoogiyya hoyyoo ea bariinyeega ea masaweega leabu heeda ASEETA was Bwaabwa ea Ng'utamiida was Yesu Gristo.

²⁴ Gagasa gagooneegwa ASEETA dagheerjeanduumeeda sea fuga sean bwariiy Ng'utamiida was Yesu Gristo, aba bariinyeega manda muudeanooda.