Efeeso 5 - Bibliyeeda Ghaydit

Giibinda jeeda weeshinda

¹ Asi ayaada geeshta ASEETA awuurjeewana diibiga sibwariiy.

² Ak ghoabeawi bariinyeega, gawuurji gidabwariiydaneasa Gristo ak ghoadayda geaw aba badahuukaasa, ak ghoah haleanjeeda sisapa geadi bea ghadooweeda ng'andit aba heeda ASEETA.

³ Nea hiseadayeanduumeeda ea ng'asheega munyas sean ghana gasooda ng'asheega munyas adiidu geeyiing'sa jeedeang'wa, aba gideaba nih ghwahit aba jeeda fuga ghaydidi.

⁴ Ak ea adiidu geeyiing'sa heedeang'wa ng'asheega baspaseega ea gea leendeeda ghana nyoota mureeda.

⁵ Agooga ghoanali ng'asheanji gideaba siida hiseada ghana dea sina ng'asheega munyas ghana dea gaseadayi haleanjeeda ea dea (bada gidamwadaagha ghwanung' ghoah ASEATAANYI) manda dea jea gwahearan gheambalmeeda Gristo ea ASEETA.

⁶ Adagwareenganeegwa sih aba ng'asheega mwadaagha, aba gideaba ng'asheega uurji suh, gayghwahidu nyarasta ASEETA badahuuka orjooga manda mureeda.

⁷ Asi adiidu goobareanyeewi saawa,

⁸ aba gideaba ghayi agooga goowooschi misaneeda, ak ghamneawa goowooschi weeshinda aba jeeda Ng'utamiida; asi abeeda diibiga weeshinda

⁹ (aba gideaba haghweega weeshinda geenyassa jeeda haleanjeeda sean miyaasiin ea doobiiwnata ea huumwa),

¹⁰ nea ghoang'eachi nalooda gidabwariiy Ng'utamiida.

¹¹ Iissa ea adoosinyi gadiyoojiga manda haghweega bea misaneeda iissa ghang'wana ghoanung'waadi.

¹² Aba gideaba gaba baspaseega rukunooda ng'asheega sisin aba makcheameeda;

¹³ nea gida wassean iisinung' ghwadaajiit aba heedeesh abeeda gajeadaah, aba gideaba gida wassean sidaah weeshinda.

¹⁴ Hean ghoah gidasirukuna ng'asheanji bea gideaba, “Ng'eada ang'iing'eeda ing'uti ghaat, duunana heeda fuga nimeewa, ak Gristo gaygagoonyi weeshinda.”

¹⁵ Ang'ula muuchi aba gidoabeadi, adoowuurjeewi fuga manda fughareenga, awuurjeewana gea mida fughareenga,

¹⁶ ak googadiyeati muuchi damani oondeawiin aba gideaba askwearjoojisu gea munyas gil.

¹⁷ Aba sareani adoowooschi dasheahi, gagasa anala gideaba Ng'utamiida gagasa naaha jea asina.

¹⁸ Asi adooboogidayi aba difaayeeda jea gahuteaweegwa; ghang'wana geenyiideegwa Guroorooda Ghaydit.

¹⁹ Oopaloolana geat ng'asheega nyiigheega ea duumjeenga guskuseega ea sarmoojiga guroorooda, asarmasiina Ng'utamiida nea ghoammiidu daghanuunatkeagwa aba jeesingeagwa sean,

²⁰ nea goobadiischeesi ASEETA was Bwaabwa galeagasean aba ng'asheega sean aba gheawunga Ng'utamiideanya was Yesu Gristo.

Siyeenatka ea gadeemga

²¹ Asinisiina geat mureeda gawuurji gidoosiniisiindi Gristo mureeda.

²² Gadeemga, asinisiina siyeenndigeagwa mureeda gawuurji gidoosiniisiindi Ng'utamiida.

²³ Aba gideaba siyeeda goombal gatmoadaanyi, gawuurji gidambalda Gristo ganiisa, nea niny ea lealnoocheandaanyi gil.

²⁴ Gawuurji gidasiniisiinda ganiisa Gristo mureeda, asi eara gadeemga dasisiina siyeenatka nyaawa mureeda aba haleanjeeda sean.

²⁵ Siyeenatka, abwariinya gadeemgeagwa, gawuurji gidabwariiyda Gristo ganiisa ak gabeagu geaw aba badaydaanyi,

²⁶ ak abeeda gabaysiina giimiinoadaanyi nea goohuun aba beega ea ng'asheanda.

²⁷ Abeeda gwanyaksa geaw ganiiseeda ghaambiidaat, mandeawana munyinda, ghana ng'asheega munyas sean, ak ea ghaydit biissa ea meerukunana badayda munyinda.

²⁸ Ak eara headiga gammiisa gideaba gayghabwariiyda gadeemga nyaawa gidabwariiyda saseenuuka nyaawa. Siida bwariiy gatmoadaanyi eara niny ghabwariiy geaw.

²⁹ Aba gideaba manda siida sit saseadaanyi, inyeessa ghoarear nea gookwealsheesa, gawuurji gidahinniida Gristo ganiisa,

³⁰ aba gideaba aseasa geewaschi roobuutka saseadaanyi.

³¹ “Aba seareani ng'eedeeda gaygwanung'usa heeda ghwaan ea ghaamwat ak gwandeayi sea gatmoadaanyi, ak fiisu asiyeenyean gayghoah saseanagi.”

³² Makcheameeni funyaadiin aahaw ak aniini geabalooli badayda Gristo ea ganiisa;

³³ ak daba siisi bwariiyda gatmoadaanyi saseadaanyi, ak gatmooda ea dasisiina siyeadaanyi mureeda.