Efeeso 4 - Bibliyeeda Ghaydit

Gidaguuyeata saseeda

¹ Asi aniini, geawooschi siida ghealooniga aba badayda Ng'utamiida, geamuscheegwa gideaba oatoabiiwa eaweega deaschi sea guurnooda ghayi siguurneegwa,

² nea gooyeadayi geat ng'eanyi ak goowooschi garbapi, nea ghoahang'waanyi nea goomilikideaysi geat aba bariinyeega,

³ agassa gideaba gajaguuyeena aba Guroorooda nea gearadaneegwa hoyyoo.

⁴ Saseeda ea agi, ea Gurooroanagi, gidaghayi siguursiindaneegwa,

⁵ Ng'utamiinagi, masaweega ea agi, giibaatiisanda ea agi,

⁶ ASEETA ea agi was Ghweandeanya eesa sean, ak ghang'ataawa sean ak gagadiiy aba jeedeaba sean ak gwanda jeeda buuneesean.

⁷ Nea dagheerjeanduumeeda gaba siisi siitaw aba aseasa aba giteena gidaguh Gristo.

⁸ Hean geeyi, “Iidu nea gwadiyeada ea gawa humng'eeda heesheagi goodeayi fuga ng'uta, ak ghoadaw buuneeda haleanjeeda.”

⁹ (Aba rukunooni ayi, “Gwadiyeada,” gideabeadaanyi naaha ii mii gideaba earada ghwararang'aan ea ghwahidu heeda hiing'aada aba jeeda ng'eanyiida.

¹⁰ Dea ghayi rarang'aan dea earada diyeada gwasheagiit ea ghwalaabwa hoowa humng'eeda seani, ak abeeda ghoanyiit haleanjeeda sean.)

¹¹ Hean gageanu mwaatkwa ghoah giijasoodiga, nea mwaatkwa ghoah sibanga, nea mwaatkwa ghoah fuga jea gwarukwiida giijaasta miy, mwaatkwa ghoah haghweadoodiga ea giinealshoodiga,

¹² ak ghoadaw fuga ghaydidi uurda jea gwasina gadiyeeda ASEETA ak geemajeek saseeda Gristo,

¹³ ea eeyi bwak ea eanyasa masaweega siguuyeesi ea fughareeda Orjeeda ASEETA ak geehitiisi heeda eahuuwa headiga, aba giideenda giteena hidooda Gristo;

¹⁴ aba gideaba adeebiikti gicha eahuuwa diibiga, ak geejakseasa hoowa ea hoowa, nea ghwadeasa gilinyoo ea jeameeda bea giinealshooda fughareenga, aba milmilanda buuneeda ea seechmeeda nea geayaachi naweedinga reengani buuneeda.

¹⁵ Asi, eang'waanya huumeanda aba bariinyeega nea geeheetu ea eahita heedeaba niny aba haleanjeeda sean, ninyeeda was uhuuda aba jeeda Gristo,

¹⁶ niny googuuyi saseessean ak ghwanung' ghoang'waay geat roobuutka, ak ghoadaw gilinyoo ea roobadeeda gil gichea gwasinda gadiyeadaanyi muuchi ak aba sareani gwaheedu saseessean nea ghwadeas geaw aba bariinyeega.

Giibindeesh aba jeeda Gristo

¹⁷ Asi gearukuneegwa ng'asheanji, aba badayda Ng'utamiida, gideaba adoapiideati gidabiideata fuga Eemoojiga, saawa gooteemsheesa ng'asheega mwadaagha mwahida;

¹⁸ ak fughareenga nyaawa ea sinung' gamisaniidi, ak ea siheeli sea eaweega ASEETA, aba leendeeda mida jeenyaawa nea gwasin hang'ooynacheeka jeesinga nyaawa;

¹⁹ Iidu nea nideang'suusi ghoabuuta geat jeeda ririnnyeanda ak abeeda gwasin gilinyoo ea ng'asheega munyas gil.

²⁰ Ak agooga ea mii gissiinaaldaneegwa aba badayda Gristohi!–

²¹ abeeda ghayi iyoayiinyi ak ghaanaaleegwa aba badaydaanyi, huumeanda mida jeeda Yesu.

²² Oapuuda searoojigeagwa bea garayi bea giibinda biissa eamuy aba haleanjeeda sigaseadayi reengani fih,

²³ asina geat gaweeriidi gurooruunatkeagwa ea giiteemshoodeang'wa.

²⁴ Ak daba siisi mideawa gurooroodeesh, sisin gawuurji ASEETA aba doobiiwnata huumwa ea ghaydidanda.

²⁵ Asi anung'waada ng'uyeega, daba siisi abaloola giischeewoocheandaanyi huumeanda, aba gideaba aseasa geewooschi fuga weechi.

²⁶ Anyareasa ak ea adiidu goosinyi riing'eeda; ak ea adagamikta nea gudawoosa nyareeseadi,

²⁷ ak ea adoatawji meang'nyeandeenda gheata.

²⁸ Mareanghweanda danung'waada gwadishta, dang'eada ghuuta gadiyeeda miy aba geatingaaschi, ak ghwanyas gichea ghoadaw fugiga gassean.

²⁹ Adagwarina ghuusigeagwa ng'asheega munyas, inyeessa goobalooli gea miyaasiin jea ghaweat gilinyoo ea siida gil, ak ghoadaw dagheerjeanduumeeda fuga aleeyseegwa iit.

³⁰ Ak ea adoang'udi gurmeahiida Guroorooda Ghaydit bea ASEETA, aba headaanyi siirooreegwa aba eaweeda ghuhooda.

³¹ Asi ageandeawana geat ng'asheega sean ng'weani was mukunooda ea nyarasta ea giijuureanda ea napooda ng'uyeega nea goosheagiidi geat gea munyas sean,

³² asi awoosa inyeani jeesin aba heeda buuneeda suurja, bayiida buuneeda, samiisa geat, gawuurji gidasamsiindaneegwa ASEETA aba jeeda Gristo.