Efeeso 3 - Bibliyeeda Ghaydit

Gadiyeeda Bawlo aba heeda Eemoojiga

¹ Aba sareani aniini Bawlo, was siida ghealooniga Gristo Yesu aba badahuukeagwa agooga fuga Eemoojiga–

² ama deepea noayiinyi iita siiteaganean bea dagheerjeanduumeeda ASEETA ghayi sigoonan aba badahuukeagwa,

³ gidanung' danalda makcheameeda aba giidaheachta gawuurji gida aang'oardi nea ghaanuwaasiichi.

⁴ Ak iyoasoomi ng'asheesu aang'oarjiin, abeeda gajajeeng'ni gida aanaldi gili funyaat bea Gristohiin,

⁵ ak ea meanung' ghwanal orjooga buuneeda aba seaygoojiga suurja gawuurji gidaghamneawa siitaheachsiinda giijasoodigaaschi ghaydidi ea sibanga aba naweeda Guroorooda;

⁶ nea gideaba, fuga Eemoojiga fuga jea gwahearaniischi gil ea aseasa aba hearaniischoanagi, nea gaba saseanagi, nea geeguuyeesi heeleesiindaanyi mida jeeda Gristo Yesu aba naweeda Giijasta Miy.

⁷ Aba badaydeaba giijasi miyiin geanung' doaw siida gadiyeeda gawuurji gidagoondanean ASEETA dagheerjeanduumeeda ghayi sigoonan aniini aba uurda sin gadiyeadaanyi.

⁸ Aba aniini, earapeadi eawooschi mwanang'eawa fuga sean ghaydidiin, abeeda geegu dagheerjeanduumeani, ak gearukwiisi fuga Eemoojiga meanang'oocheanduumeeda meesikideawana bea Gristo,

⁹ ak ghwanung' ghwadaah buuneeda sean badiida makcheameeda ghayi sifuy aba gweanyeeka aba heeda ASEETA sin haleanjeeda sean;

¹⁰ ak aba naweeda ganiisa abeeda weaghuumeeda ASEETA mwoamu eeteen abeeda ghwanal sugoodiga ea gheambalmeeda aba jeeda darooraka humng'eeda.

¹¹ Ng'asheanji gwasin nea gabaysiina gidagasiida maygamudean jeeng'u Gristo Yesuheeda was Ng'utamiideanyean,

¹² nea aba niny geendeawi dargooda nea geamuughu beata aba masaweagaasa aba jeedeaba niny.

¹³ Asi geamuscheegwa adagabur iheengeagwa aba sawanaduutkeasu aba badahuukeagwa, was giigheambiiteang'wa.

Bariinyeega Gristo

¹⁴ Ak aba sareani geatkunyi aba madeeda Bwaabwa,

¹⁵ was gumdooda gealga sean bea ng'eanyiida ea humng'eeda ak geeguushteawa,

¹⁶ hean abeeda aba giteena meanang'oocheanduumeeda giigheambiitaanyi gwadeepa gagooneegwa giimajeekta ea uurda aba naweeda Gurooroadaanyi aba siideaba jih,

¹⁷ nea goobiida Gristo jeesingeagwa aba naweeda masaweega, ak geeng'eapseegwa jeeda bariinyeega,

¹⁸ hean abeeda ghwanyas uurda jea goobareanyi sea fuga ghaydidi sean giteena baraknata ea geawunda ea geawunda humng'eeda ea gidayang'da sheaginda jeeda,

¹⁹ nea ghoanali bariinyeega Gristo ng'al fughareenga, ak abeeda geenyiideegwa hidooda sean bea ASEETA.

²⁰ Asi aba ninyeeda mideawa uurda gadiiyi aba jeesingaasa ghoamu gwasin ng'asheega saang'a ea ghang'al haleanjeeda simuschi ea gea siipkaachi,

²¹ daba niny giigheambiita aba jeeda ganiisa aba jeeda Gristo Yesu ea ghoah jeacheenga sean ea ghoah damanda manda muudeanooda. Amin.