Ditto 2 - Bibliyeeda Ghaydit

Giinealshooda huumwa

¹ Asi ang'iing'i anaala ng'asheega miisa giinealshooda huumwa.

² Fuga hees gagasa gwandeawa gheadeenda, miina gheanyanga buuneeda, mideawa fughareenga, mideawa masaweega huumwa, mideawa bariinyeega huumwa ea majeeknata.

³ Ak eara gadeemga woosi gammiisa ea fuga siniisa geat mureeda gil, nea adagwanaba ng'uyeega, ghana leeyeanda, gammiisa gideaba gaygooneali ng'asheega miyaas,

⁴ ak gayghoanaal gadeemga manang'i gichea, ghabwariiy siyeenatka ea diibiga nyaawa,

⁵ nea gwandeawa fughareeda, ak ea miyaas, nea goobiida gealga nyaawa, nea inya jih, nea gwasissa siyeenatka nyaawa mureeda, aba gideaba ea meeng'eawa ng'asheega ASEETA.

⁶ Ak gireekusi eara gheareemanga gwandeawa gheadeenda.

⁷ Ahiimda geaw aba mureeda sean eadaa oormeeda gadiyoojiga miyaas, nea aba giinealshoadaang'u giihiimu seareeda miy, ea gideeneadayda,

⁸ nea ng'asheega sirugu bea huumwa ea meeyeateena ghuusi, ak abeeda siidida heawaan ghabwaspwas, aba ng'asheanda muy jea gwarukuna badahuukaasa.

⁹ Giing'oonyanga gammiisa gideaba gaygwasissa meanang'oodiga nyaawa mureeda, nea gahaguuwsa aba haleanjeeda sean, ak ea adagwasheaha ng'asheega,

¹⁰ ak ea adagwajagwadiisachi, gahaguuw gideaba gayghoahiimu doobiiwnata huumwa, ak abeeda aba haleanjeeda sean ghwanyas giinealshooda ASEETA was lealnoocheandeanya.

¹¹ Aba gideaba dagheerjeanduumeeda ASEETA lealu buuneesean siitaajiit,

¹² ak ghoanaaleasa eeheawana ng'asheega maba diini ea geawunda gheang'da, mideawa gheadeenda, ea doobiiwnata, ea eaweega miyaasiin aba jeedeaba ng'eanyiini,

¹³ nea geamuughu ghusooda mideawa ghawooda ea giidaheachta giigheambiita ASEETA haw ea lealnoocheandeanya was Yesu Gristo,

¹⁴ nea niny ghoadayda geaw aba badahuukaasa ak ghaweadaneasa ng'asheega munyas sean ak ghoamiidu fuga jea ghoah gaaschi nea gamilmiliidi aba sinooda ng'asheega miyaas.

¹⁵ Rukusiina buuneeda ng'asheesu, reekusiina nea giiwoowsi aba gheambalmeeda indeawi sean. Ak ea adiidu gafoolnyi siida.