DANIELI 9 - Bibliyeeda Ghaydit

Danieli ghamwaash ASEETA aba badahuuka fugaaschi.

¹ Iimuchu aba gweayda madeeda bea sugoocheanduumeeda Dariyo orjeeda Ahasuero, bea eemeeda Midiyani, ghoah sugoocheanda ambal fuga Galdayo–

² aba gweayda madeeda bea gheambalmeadaanyi, abeeda aniini, Danieli, ghaasoamwanyi aba jeeda gitaabwajeega mooneeda gweanyeeka, aba gidarukuteayda ng'asheanda NG'UTAMIIDA rukusa sibaneeda siguura Yeremiya, bea gideaba gaygwanda Yerusalemu jeeda sawanadeeda gweanyeew laadam ea damanamughuush.

³ Ng'ata ghaasaji ghaat deageal heeda NG'UTAMIIDA was ASEETA, ak geamuschi niny nea ghaamwaashchi ghawooda nea ghaaghadoawanyi nea gealuuldi geaw nea geakweali hang'weaka guniyajeega nea geabiidi jeeda deareeda.

⁴ Ak ghaamwaashchi ghawooda aba heeda NG'UTAMIIDA was ASEETEANYU ak geaduukuuni, nea geayi, “Ea NG'UTAMIIDA haw, biissa aang'waan, was dea ang'oonyi neajeeda ea bariinyeega huumwa aba heeda fuga bwariiy niny ea ghoang'waay diigheanyeekaaschi,

⁵ aseasa sisinyi riing'eeda ak ea siitiinyi ak ea sifooli ng'asheega irukuneasa, ak ea sinung'usi heeda diigheanyeakaagu ea deaweedajeagaagu;

⁶ ak ea meeleeysiini iit fugaagu bea gadiyeeda was sibanga, rukwiisa sugoodigaasa, ea fuga hees jea ghoah sugoodiga ea ghweanigaasa gheawungaagu, ea aba heeda fuga sean bea jeeda ng'eanyiida.

⁷ Nea ang'iing'i, Ea Ng'utamiida, gisinayi ng'asheega doobiiweadi, nea aseasa iissa geesinyi ng'asheega baspaseega munyas gawuurji gideaba ghamneawa, aseaseeda mida ng'eanyiida Yahudi ea fuga mida Yerusalemu, ea Israeleeda sean, fugiga neekiin ea fugiga sheagiin, mida jeeda ng'eanyiisean ihoani, aba badayda ng'asheega munyas sinneey.

⁸ Nea aseasa, Ea Ng'utamiida, geewooschi fuga sina ng'asheega munyas bea baspaseega aba heeda sugoodigaasa ea fuga hees jea ghoah sugoodiga, ea ghweanigaasa aba gideaba sisineey riing'eeda.

⁹ Ng'utamiida was ASEETEANYA gabayiida nea gwasamiisa buuneeda; aba gideaba sisinyi ng'asheega munyas aba headaanyi;

¹⁰ ak ea masisiina mureeda ghuuta NG'UTAMIIDA was ASEETEANYA aba ging'ooyda deaweedajeagaaschi, ghayi iin madeedeanya aba geatinga fugaaschi bea gadiyeeda was sibanga.

¹¹ Buuneesean bea Israeli ninuus deaweedeadaang'u ak gwanung'usa heeda, ak ghaheawa gwasissa mureeda ghuutaang'u. Nea mooshteayda ea habeawooda sing'oorsa jeeda deaweedeeda Musa was siida gadiyeeda bea ASEETA ak ea siyiin badahuukaasa, aba gideaba sisissi niny riing'eeda.

¹² Ak ea niimajeek ng'asheagaaschi; ghayi rugu aba badahuukaasa ea badahuuka fuga ambaleasa, ak gweadu badahuukaasa nyariida haw; aba gideaba aba hing'eadayda humng'eeda manda ng'asheanda uurji dea sisima Yerusalemu.

¹³ Gawuurji gissing'oarda aba jeeda deaweedeeda Musa, hean ghwahidu badahuukaasa ng'asheesu seaniin, ak ghanyea miyeegasa alooheeda NG'UTAMIIDA was ASEETEANYA, ak geenung'usi heeda munyasnacheakaasa ak geang'waanyi huumeandaang'u.

¹⁴ Asi Ng'utamiida nibada sinoodeaba ng'asheesu munyasiin ak ea niyeadu badahuukaasa; aba gideaba NG'UTAMIIDA was ASEETEANYA ea doabiiwaat aba gadiyoojiga sean sin, ak ea meesisiini mureeda ng'asheega ghuutaanyi.

¹⁵ Asi ghamneawa, Ea NG'UTAMIIDA was ASEETEANYA, ghayi iiruuni fugaagu jeeda ng'eanyiida Misri aba geatinda mideawa uurda, ak ea nisisi geaw gheawunga, gawuurji gideaba ghamneawa, sisinyi riing'eeda, ak ea sisinyi gea munyas.

¹⁶ Ea NG'UTAMIIDA, aba giduurji gadiyoojigaagu sean doobiiweadi, nung' gabiikta ng'eanyi nyarastaang'u ea ng'weaniidoadaang'u aba badayda mujiineadaang'u was Yerusalemu, ea heayeadaang'u ghaydit; aba badahuuka riing'eegaasa, ea aba badahuuka munyasnacheeka ghweanigaasa, aba gideaba Yerusalemu ea buuneadaang'u niiw fuga sijuuga aba jeeda buuneesean neaweeseasa.

¹⁷ Asi ghamneawa, Ea ASEETEANYA, aleeysiina iit mooshta ghawooda bea siidaang'u bea gadiyeeda ea haleanjeadaanyi bea ghadooweeda, aba badaydaang'u, Ea NG'UTAMIIDA, nung' ghoabwaay gheamamdaang'u headaang'u ghaydit, was dea ghayi sinyarja.

¹⁸ Ea ASEETEANYU, aleeyni iitaang'u ak giyiinyi; jaada gheanyangaagu ak ging'ulayi sawanaduutkaasa, ea mujiineeda siguuriideawa gheawungaagu; aba gideaba mudeetayiida haleanjeeda ghadooweeda ikaasa aba madeadaang'u aba badayda ng'eanyiideanya doobiiwseasa, geaghus aba baydeaydaang'u haw.

¹⁹ Ea NG'UTAMIIDA, aleaydiit; Ea NG'UTAMIIDA, samsiina; Ea NG'UTAMIIDA, aleaydiit ak gisini; adishing'di, aba badaydaang'u, Ea ASEETEANYU, aba gideaba mujiineadaang'u ea buuneadaang'u geeguuriisiina gheawungaagu.”

Gabrieli gwarugu ramooranga

²⁰ Damanda duu dabaloola nea ghaamwaashchi ghawooda, nea geaduukuuni riing'eegeasu ea riing'eega buuneedeanyu was Israeli, nea ghaadaydi haleanjeedeanyu bea ghadooweeda aba madeeda NG'UTAMIIDA was ASEETEANYU aba badayda heayeeda ghaydit bea ASEETEANYU;

²¹ damanda duu dabaloola nea ghaamwaashchi ghawooda, ghwahidu siida was Gabrieleeda ghayi aadaayi aba jeeda giirgweatka aba mwadi, ghwahidu heedeanyu nea ghang'eata damanda lukghumeedeaba shing'ada.

²² Ghwaan ak gwayeeshiinean, “Ea Danieli, asi ghamneawa ghaawunyi dagoonyi weaghuumeeda ea nalooda ng'asheega.

²³ Heeda iing'eadi giidaydeayda haleanjeeda ghadooweeda ghwahidu ng'asheanda ak ghaawunyi darukuneey, aba gideaba geabwariinyi muuchi; asi sikteawana ng'asheanda ak ginali giirgweatka.

²⁴ “Wiikaji laadam ea damanamughuush niba gweanyeew laadam ea damanamughuush gajea damanda jea eetina fugaagu ea mujiineadaang'u ghaydidi, ak goosha munyinda, ak nea gwaduulean riing'eeda, ak gwasin giiduupcheeda, ak gweadu eaweega manda muudeanooda doabiiwaat, ak gooroor giirgweatka ea sibaneeda, ak ghwayeash heeda ghaydit muuchi.

²⁵ Asi nala ak gijeeng'u gideaba gidang'eada damanda sirukuna ng'asheanda jea eebiiksiina deesta Yerusalemu ea ghwahidu siida simwaar, jea ghoah sugoocheanda, gayghang'ata wiikaji ispwa niba gweanyeew ispwa. Ak abeeda wiikaji laadam ea iyeenya gajeebiikta eadeas gicha nea geesin naweadinga ea maparoojiga, aba damanda sawanadeeda.

²⁶ Iing'ata wiikaji laadam ea iyeenya, abeeda gajeabwar siida simwaar, ak ea manda siida jea ghoaghiis hoorgeadaanyi; nea fuga siida haw jea ghwahidu gaygwanyarja mujiini ea heeda ghaydit. Nea huuydeandaanyi gayghwaanda guldeayda, ak aba huuydeanda gaygwanda ng'ucheeda; nea nyariida ea diigheanda sin ASEETA.

²⁷ Ak gaygwasin neajeeda majeek sea fuga saang'a aba jeeda wiikajeanda; ea aba eawoojiga mwahita wiikajeanda gaygwaduulu lukghumeeda ea haleanjeeda ghadooweeda; ak gajeayiin gidamuy deageaw was uhuuda gheeda sibata ASEETA ak gaygoobiida hoowa gwaroonyi siida jea gweadu nyariida, ea muudeanooda ghayi sissa ASEETA niny.”