DANIELI 8 - Bibliyeeda Ghaydit

Gidasiihiimsa Danieli was lagweenda ea mbooyda

¹ Hita gweaydeaba samwagu bea sugoocheanduumeeda Belshasa geargweaday aniini, Danieli, iing'ata giirgweatka ghayi bea madeeda.

² Ak ghaadaayi aba giirgweatka; ak ghaang'weardi ak ghaadaayi geandi mujiineeda haw was Susa, mida jeeda ng'eanyiida Elamu; ak geargweadayi, nea geandi ghuuta eenda Ulai.

³ Geagatkachi gheanyangeasu ak ghaadaayi, lagweenda nea ghamiinaada aba mareeta ghealooda. Ak gaba gujaw iyeenya; nea gujaka duwaawi ea geawi, ak gujaweanagi gameaji ea geaw mawuurji niirja, ak gujaweeda meaji ea geaw gahuuydean aba rinooda.

⁴ Ak ghaadaayi lagweenda nea gweagu nea gwarakta ea wiilooda ng'eanyiida ghayeawa ea wiilooda ng'eanyiida biyeara; ak ea manda diyeayda ammu ghamiinaada aba madeadaanyi, ak ea manda gidammu gwalealna aba uurdaanyi; ak iissa gwasinda ng'asheega gidagasiida nea goodiing'u geaw.

⁵ Damanda duu deateemsheewa, ging'ulayi, ghwaan ghwarayda leabu heeda biyeara ak gwalagu bugusta ng'eanyiisean, nea maweapa ng'eanyi; nea mbooyda gwandeawa gujaweeda daamdaamwaat aba dageascheeda gheanyangaaschi.

⁶ Hean ghwaan heeda lagweenda mideawa gujaw iyeenya, aadaayi nea ghamiinaada aba mareeta ghealoodean, ak gafachsa aba uurdaanyi nea nyareasaat muuchi.

⁷ Ak ghaadaayi nea ghwaan ea gwaneekiisa lagweenda, nea ninyareeksa ak ghwalas lagweenda ak gwahirjeaweada gujakaaschi asiyeenya; ak ea mudugwandeawa lagweenda uurda jea ghamiinaadawa aba madeadaanyi, ak gwajaksa ng'eanyi lagweenda ak ghoalaapta ng'eanyi; ak ea manda gidammu ghaweat lagweenda aba uurda mideawa ghwarayda.

⁸ Ak goodiing'u geaw ghwarayda ea ghwaraanya; iidu aba uurda, geehirja gujaweadaanyi haw, iidu aba hoorgeadaanyi gwardu gujaka deamdeameadi ang'wan gal meadaji ang'wan bea ng'eanyiida.

⁹ Ng'ata gwarina jeedeaba gujakiga gujaweeda mwanang', ak gwaheedu muuchi nea gagal wiilooda ng'eanyiida biyeara, nea gagal heeda ghayeawa, nea gagal ng'eanyiida ghaambiidaat.

¹⁰ Ak gwaheedu muuchi, ea gang'uchi lugooda humng'eeda; ea lugooda mwaatkwa bea miinga ak gwahisa ng'eanyi, ak gooleapsa ng'eanyi.

¹¹ Iissa goodiing'u geaw ak gafool eara fuga ambaliischi bea lugooda humng'eeda; ak geegeandeawa haleanjeeda sisabwa geadi bea ghadooweeda, nea heeda abiita ghaydit geenyarja.

¹² Hean gwasin buuneeda riing'eeda ak ghwanung'waada giidaydeayda lukghumajeega doabiiw; ak geejaksa huumeanda ng'eanyi, hean gagadiiy gujaweeda aba haleanjeeda sean sin ak ghwanyagaada.

¹³ Ng'ata ghaayiinyi ghuuta malaykajeanda ghaydit nea gabalool; ak gwayeesha malaykajeanda nuut ghaydit dea balool, “Gaygooyang'daan damandeaba Giirgweatsu bea iita haleanjeeda sisabwa geadi bea ghadooweedean, ea gidida was riing'eeda eadu nyariidean, gajeeyi bwak ea ghoah eeju nung'weadayda heeda ghaydit ea lugooda humng'eeda ea gheeda sibata ASEETA siilaapta ng'eanyi?”

¹⁴ Ak gwayeesha niny, “Gaygageanu sakteawuut sagalamnyooji iyeenya, ea bughalaji samwagu shing'aduutka ea sakteawuutka, abeeda heeda ghaydit gaygabiikta ghamiitaayda gidaghayi bea mwadi.”

Giijasoocheanda was Gabrieli gwarugu iita giirgweatka

¹⁵ Hean aniini, Danieli iyaadaayi giirgweatka, geagasayi danal gidawas; ak ging'ulayi, ghamiinaada aba madeedeanyu akaleala uurji siida.

¹⁶ Ak ghayiinyi ghuuta siida aba mareecheeka Ulai, ak gaguuru, “Gabrieli, nung' ghwanal siisi giirgweatka.”

¹⁷ Ng'ata ghwaan ea gwaneekiisa heeda eamiinaadawi; hean nea ghwahidu, ghaabeali ak ghaabeadi ak ghaabwadi jih ng'eanyi. Ng'ata gwayeeshiinean, “Nala, Ea orjeeda siida, aba gideaba giirgweatka gaba damanda huuydean.”

¹⁸ Damanda abaloolanean, goobissean ruweanga durumani nea ghaabwadi jih ng'eanyi; ak ghawaasan ak ghwanung' damiinaada aba geeshangeasu.

¹⁹ Ak gwayi, “Ng'ula, gaydanung' nala gichea ghwahidu aba huuydeanda was nyarasta; aba gideaba gaba badayda damanda huuydean jea ghwahidu.

²⁰ Nea eara lagweenda iing'ulayi mideawa gujaw iyeenyean, suh sugoodiga Midiyani gil ea Ajemi.

²¹ Nea ghwarayda ea sugoocheanda Yunani; ak gujaweedida haw mida dageascheeda gheanyangaaschiin ea sugoocheanda madeeda.

²² Nea gujaweedida sihirja, ak gwarina hoorgeadaanyi gujaka asang'waniin, ea sugoodi ang'wan jea gwarina jeeda ng'eanyiidaanyi, ak ea maygwandeawa uurda uurji daanyi.

²³ Amadu aba huuydeanda gheambalmeeda nyaawa, gamunyasiidi muuchi ea ghwahit aba ghoorjooda, niny gajea sugoocheanda ghwarjeeda, jea ghwahidu nal gwaruku ghwasiildeanga.

²⁴ Niny uurdaanyi gajaahaw, ak gaygweadu nyariida jeeda ghoabeal buuneeda, ak gaygamnyeen aba gilinyoo gwasin, nea ghabwar fuga mideawa uurjeenga sea fuga ghaydidi.

²⁵ Nea aba milmilandaanyi gaygabaruura geatindaanyi aba ng'uyeega, ak aba fughareadaanyi gayghaghwar geaw. Ak gayghabwar fuga saang'a aba shamooda; ak gaygafool eara sugoocheanda haweewa sean; ak gaygagiinya nea mahirja geatimba sih.

²⁶ Giirgweatka shing'aduutka ea gea sakteawuutka sirugu huumwa; asi nung' ghoah makcheameeda, aba gideaba gayghang'ata askwearjoojiga saang'a nea miighoah huumwa ng'asheesu.”

²⁷ Nea aniini, Danieli, abeeda gealili nea ghaamnyaanyi ea ghwahita eawoojiga; ak ghaahaapchi ak ghaang'eachi sinooda gadiyeeda sugoocheanda; nea gwasawana jeedeanyu aba gideaba mwaanali gidawas giirgweatka.