DANIELI 7 - Bibliyeeda Ghaydit

Danieli gwarugu iita gidasiihiimsa ( 7:1—12:13 ) Danieli goorgweatiisa diyean ang'wan

¹ Aba gweayda madeeda bea Belshasa was sugoocheanda Babeli, goorgweadi Danieli ak geahiimu aba jeeda uhuudeanyu damanda eali aba bulaliida, hean ghang'oar giirgweatka, ak gwarugu ng'asheega daah.

² Gwayi Danieli, “Ghaadaayi eawa aba jeeda giirgweatka, ak ging'ulayi, jeameeda gooyuuk meadajeega sean bea ng'eanyiida ak gooyuuk basooda.

³ Ak gwardu diyeang'su hees ang'wan aba jeeda basooda, nea gwaheeli.

⁴ Dea madeeda gawuurji ng'adiida ak gwandeawa meang'eega rabearda. Iidu nea geang'ulayi meang'eagaaschi ea silootiida, ak ea siitiing'da humng'eeda ghabeawa badayda sigeeda ak ghamiinaada aba geeshan iyeenya gawuurji siida; ak geataw fughareeda siida.

⁵ Ak ging'ulayi, diyeayda nuut, bea iyeenya, gawuurji idarooda. Ak geetiing'u meatkweanagi; ak gwandeawa gisheaji samwagu aba ghuutaanyi dageascheeda geeshatkaaschi; ak geeyeesha, ‘Ng'eada, ak giyaagi banyeega muuchi.’

⁶ Ng'ata hiji ghaang'weardi, ak uuw, ghaadaayi nuut dea uurji mariirda, mideawa meang'i ang'wan bea dariideanda aba badaydaanyi; nea diyeayda gaba iheeni ang'wan; ak ea siitaw gheambalmeeda.

⁷ Iidu ghaadaayi eawa aba giirgweatka, ak ging'ulayi, diyeaydeaba ang'wan ak ea muy nea ng'waan ak gwandeawa uurda; ak gwandeawa geeshatka gharinga; ak gweakiida nea gwanyarjeaweada, ak iissa gwadeambiirsa ak ghwadas aba geeshangaaschi. Ak ea sajaadawaat mawuurji diyeanga suurja sean mida madeadaanyi; ak gaba gujaw damanamughuush.

⁸ Hean geang'ulayi gujaka, ak ging'ulayi, ak gwarina dageascheeda nyaawa gujaweeda nuut, mwanang', nea madeeda gwanda gujaw samwagu bea gea gwachi bea madeeda ak geelootu gumsheaka; ak ging'ulayi, gujaweeni gwandeawa gheanyaga uurji gea siida, ea ghuuta rukuuna ng'asheega hees.

Gidasiihiimsa siida mida gweanyeeka manda muudeanooda

⁹ Iidu nea ghaang'weardi, geejip hoorgajeega ak goopteadawa hoorgeanagi siida ghayi bay gwanda damanda manda muudeanooda; nea hang'weakaaschi eaeeshish ea ghawaar gapkeanda, nea buudeega uhuudaanyi ghawaar buudeega miyaasiin bea gisilleanda; hoorgeadaanyi gwandeawa ng'ushapta beasta, geeshangaaschi ea beasta yeat.

¹⁰ Gwarina madeadaanyi eenda beasta; ak gagadiiyeesa fuga nyiit sagalamnyooji sagalama niny, ak ghamiinaada aba madeadaanyi fuga nyiit sagalamnyooji damanamughuush; ak ghang'eat ghuuta girgweageeda, ak geayaawaada gitaabwajeega.

¹¹ “Hean ghaang'weardi aba nyeashta ng'asheega hees rugu gujaweeda. Nea damanda eang'uli, geenuus diyeayda, ak geebwara darari saseadaanyi ak geatayda eaghwarda aba beasta.

¹² Gawuurji giduurji aba heeda diyeanga suurja, gageanda gheambalmeeda nyaawa, nea eaweega nyaawa geekeawiidi ea ghwahita damwan.

¹³ Ak ghaadaayi aba jeeda giirgweatka eaweeda, asi ng'ula, aba jeeda shamooghuutka humng'eeda ghwaan siida uurji orjeeda siida ak gawa heeda siida ghayi mideawa eaweega damanda manda muudeanooda ak geeyeadu ea ghwahidu madeadaanyi.

¹⁴ Ak geataw niny gheambalmeeda ea gharbeeda ea sugoocheanduumeeda, ak abeeda buuneesean, ea eemoojiga, ea iidiga eemoojiga gaygagadiyeesa; nea gheambalmeadaanyi ea gheambalmeeda manda muudeanooda, nea sugoocheanduumeadaanyi manda muudeanooda, nyooh ea mayghang'ata, ea mwoamu eenyarja.

Geerugu iita gisiihiimu

¹⁵ “Nea aniini Danieli, ghahamng'eanyi guroorooda mida jeedeanyu ak ghwanung' giirgweatka mida uhuudeanyu dabeal.

¹⁶ Ak geaneekiisi siyagi aba jeedeaba fugiga miinaada aba hooweaniin ak ghaanyaashchi niny iita huumwa bea ng'asheesu seaniin. Ak gwarukunean, ak ghwanung' danal gidawas ng'asheesu.

¹⁷ ‘Diyeang'su asang'wan heesiin sugoodi ang'wani jea ghwahidu jeeda ng'eanyiida.

¹⁸ Nea fuga ghaydidi bea ASEETA Haw bea Humng'eeda gayghwanyas sugoocheanduumeeda, ak goombal ng'eanyiida damanda manda muudeanooda, maygamuudean.’

¹⁹ “Ng'ata geagasayi danal gidawas huumwa aba badaydeaba diyeangiga asang'wan mawuurji sea diyeanga seaniin, ak ea munyas muuchi, nea gaba geeshatka gharinga ea budilga lagheanga oomng'i; ak iissa gagasa ghwaak nea gwanyarjeaweada, nea ghoalaapta ng'eanyi aba geeshangaaschi;

²⁰ ak geagasayi danal iiteaba gujakiga atamanamughuush mida uhuudaanyiin, ea gujaweedida ridu ak goobeedeaysa gujaka asamwagu madeadaanyiin, was gujaweeda mideawa gheanyanga ea ghuuta rukuuna ng'asheega hees, nea iising'ula eahaweewa suurja.

²¹ Hean nea geang'ulayi, gang'uchi gujaweeni was fuga ghaydidi, ak ghwajoar,

²² ak ghwahidu siida mideawa eaweega manda muudeanooda ak gwasin girgweageeda fuga ghaydidi bea ASEETA Haw bea Humng'eeda, ak ghwahidu damanda jea gheang'waanya fuga ghaydidi sugoocheanduumeeda.

²³ “Ng'ata gwayi: ‘Aba iita diyeanga asang'wan, gaygwanda sugoodi ang'wan badayda ng'eanyiida, jea eeheeleat sea sugoodiga sean, ak gayghwajoar ng'eanyiisean, ak gayghoalaapta ng'eanyi, ak gwanyarjeaweada.

²⁴ Ak gwasunu gujaka atamanamughuush, jeedeaba sugoocheanduumeeni gaygwarina sugoodi damanamughuush, ak gaygamaseaw geeshta nuut jea goombaliischi; ak gajea sajaadawaat aba heedeaba suurja ghayi bea mwadi, ak gayghabwaay sugoodi asamwagu.

²⁵ Gaygwargu ng'asheega munyas aba badayda ASEETA Haw bea Humng'eeda, nea gwasawana fuga ghaydidi bea ASEETA Haw bea Humng'eeda, ak gayghwayam damanda ea deaweeda; ak gajeayiin geatindaanyi gilinuwaas, ea damanyooji iyeenya, ea gheadi mwahita damanda.

²⁶ Ak gaygoobiitpiit girgweageeda ak gooji girgweageeda, ak gheambalmeadaanyi gajeegeanda, ak geenyarja ea gwaduulean.

²⁷ Nea sugoocheanduumeeda ea gheambalmeeda ea hawunda sugoocheanduumajeega mida hing'eadayda humng'eeda gajeataw fuga ghaydidi bea ASEETA Haw bea Humng'eeda; abeeda sugoocheanduumeeda nyaawa gajea sugoocheanduumeeda manda muudeanooda, abeeda gheambalmoojiga sean gaygagadiyeesa saawa nea gwasissa mureeda.’

²⁸ “Nih muudeanooda ng'asheega. Nea aniini, Danieli, ea niibealan ng'asheega mida uhuudeanyu, ak ghwayamwa oormeedeanyu; ak ghaayiinyi ng'asheanji jeeda uhuudeanyu.”