DANIELI 6 - Bibliyeeda Ghaydit

Danieli aba jeeda shoomanda ng'anyeeka

¹ Hean ghabwariiy Dariyo gideaba gaygoombiit aba jeeda sugoocheanduumeeda fiisu hees bughala ea diktam aba jeeda ng'eanyiidaanyi sean;

² ak ghwayiin madeedeaba suh sugoodisu hees samwagu, was akaleala Danieli, ak goodawi sugoodisu seaniin iita, ak abeeda ea mwaaga sugoocheanda lugooda.

³ Iidu gabay ghoahiimu Danieli gideaba gaygwasin gadiyeeda ng'al gea sugoodiga hees suurja sean ea fuga hees, aba gideaba gwandeawa guroorooda miy; ak gagasa sugoocheanda ghwanung' goombal ng'eanyiisean.

⁴ Muchu gagasa sugoodiga hees ea fuga hees gichea eaniigha aba badayda Danieli aba gida ahaaghwiita ng'eanyiida; ak ghwaraay ghwanyas gichea gwadiing'sa iheenga ghana ramaseanda, aba gideaba ea doabiiwaat, ak ea meanyasana ramaseanda ghana giidiinyeanda.

⁵ Ng'ata gwayi fiisu, “Aseasa meanyasi gichea eaniighana aba badayda Danieli geaghus eanyasana badayda deaweedeeda ASEATAANYI.”

⁶ Iimuchu gwaneaji sugoodisu heesiin sea fuga hees aba heeda sugoocheanda haw ak gwayeesha, “Ea sugoocheanda haw Dariyo, gagasa nyasa eaweega manda muudeanooda!

⁷ Nea sugoodiga hees sean bea jeeda ng'eanyiida, sea sugoodiga manang'i, ea fuga hees ea gweargwa girgweageeda ea sugoodiga hees hidu goombal ng'eanyiida ak gwaneajeesa gideaba darada sugoocheanda diigheanda ak goomajeek, gideaba siida wassean jea ghabwat aseeta wassean ghana siida, aba jeemba askwearjooji diktam ea damanamughuush, nea mwaghusnyi, Ea ng'utamiida, gajeejaksa jeeda shoomanda ng'anyeeka.

⁸ Asi ghamneawa, Ea sugoocheanda, rada diigheanda ak ging'waari barawajeanda, ak ea meayamwa, gawuurji deaweedeeda fuga Medi ea dea Ajemi, mwoamu eayam.”

⁹ Hean ghang'oar sugoocheanda was Dariyo barawajeanda ak goomajeek.

¹⁰ Iidu nea ghwadaah Danieli gideaba sing'waar barawajeanda, gawa jeedeaba gheanyi ak ghwajaat seawuutka ghooriida mida humng'eeda duukusa Yerusalemu; ak gwatkuy aba gutung'weakaaschi niba samwagu aba jeeda askwearda ak ghamwaash ASEETA nea gabadiischeesa ASEATAANYI, gawuurji gidasiniida.

¹¹ Ng'ata gwaneaji fiisu ak ghapka ghwadaah Danieli nea ghabwat ASEETA nea gooyeawusa.

¹² Hean gaweay ak gwaneekiisa sugoocheanda, aba iita diigheanda, “Ea sugoocheanda! Neada ang'iing'i ea mii ng'oara diigheanda, gideaba siida wassean jea ghabwat aseeta wassean ghana aba jeemba askwearjooji diktam ea damanamughuush nea mwaghusnyi, Ea sugoocheanda, gajeejaksa jeeda shoomanda mida ng'anyeeka?” Ghwasha sugoocheanda nea gwayeesha, “Ng'asheanji eamajeek, gawuurji deaweedeeda fuga Medi ea fuga Ajemi, mwoamu eayam.”

¹³ Hean ghwasha saawa aba madeeda sugoocheanda, “Danieleedida was siida siipaleakna ng'eanyiida Yudahiin moawala gheang'daang'u, Ea sugoocheanda, ghana diigheanda ghayi iradi, niny iissa ghabwat ASEETA niba samwagu aba jeeda askwearda.”

¹⁴ Ng'ata nea ghwayiiy sugoocheanda ng'asheesu, hean ghwanyareas muuchi, ak gagasa aba fughareadaanyi gichea ghaweata Danieli; ak gwasin badiida ea ghwahita shing'ada nea gagasa gichea gwalealdeayda.

¹⁵ Ak ghapka fiisu heeda sugoocheanda nea nineaji, ak gwayeesha sugoocheanda, “Asi ghamneawa, Ea sugoocheanda, nih deaweedeeda fuga Medi gil ea dea fuga Ajemi gideaba manda siida jea ghwayam diigheanda nirat sugoocheanda.”

¹⁶ Ng'ata gwarukuta sugoocheanda gideaba, ayeani, ak geeyeadu Danieli ak geejaksa jeeda shoomanda mida ng'anyeeka. Ak gwayeesha sugoocheanda Danieli, “Gagasa gwalealneey ASEETA ibadayi.”

¹⁷ Hean geeyeadu lagheaneeda ak geedukuteawa ghuuta shoomanda, ak ghwayiin giirooraneadaanyi ea giirooranga ng'utamoojigaaschi, ea meayamwa gil aba badayda Danieli.

¹⁸ Hit ghang'eat sugoocheanda gawa gheanyi, ak gooluulda geaw eaweedida; ak ea manda hamita ak, nea gwaroota ruweanga.

¹⁹ Iimuchu, ghang'eat sugoocheanda ak ghwahal geaw gawa heeda shoomanda mida ng'anyeeka.

²⁰ Damanda neekiisiina shoomanda mida jeeda Danieli, hean goojuur muuchi ak gwayeesha Danieli, “Ea Danieli, siida gadiyeeda bea ASEETA mideawa eaweega, ASEATAANG'U ibadayi ghoamu gwalealnaneey heedeaba ng'anyeeksu?”

²¹ Ghwalamda Danieli ak gwayeesha sugoocheanda, “Ea sugoocheanda, gagasa nyasa eaweega manda muudeanooda!

²² Goojeagu ASEETEANYU malaykajeandaanyi ak ghwarat ghuusiga ng'anyeeka, ak ea mii gwahindanaan gil, aba gideaba geadaah gideaba meandeawani giidiinyeanda aba madeadaanyi; ea aba madeadaang'u, Ea sugoocheanda, aniini mii deadiiy.”

²³ Ak gahoosan sugoocheanda, ak gwayeesha ooruuni Danieli aba jeeda shoomanda. Ng'ata geeruuna Danieli jeeda shoomanda, ak ea meadaaha heeda nisawana aba saseadaanyi, aba gideaba ghaghus ASEETA.

²⁴ Ak gwayeesha, ayeani fugiga ghayi ahaakta Danieliin ak ghwanung' eehisa jeeda shoomanda mida ng'anyeeka–saawa sea diibiga nyaawa, ea gadeemga nyaawa; deagheata nea mii ghwahita uuta shoomanda mida ng'anyeeka gang'eesa ng'anyeeka ak gwahirjeaweada geaka nyaawa sean.

²⁵ Ng'ata gang'oorsa sugoocheanda was Dariyo barawajeega buuneesean, ea eemoojiga, ea ghuusiga buuneeda sean mida badayda ng'eanyiida: “Gagasa abeaha hoyyoo.

²⁶ Aniini ghaarachi diigheanda, bea gideaba aba jeeda gheambalmeedeanyu sean gagasa ghaboadan buuneeda nea ghabeal aba madeeda ASEETA Danieli, aba gideaba niny ASEETA mideawa eaweega, mida damanda manda muudeanooda; sugoocheanduumeadaanyi majeamu eenyarja, nea sugoocheanduumeadaanyi gaygwanda ea ghwahita huuydeanda.

²⁷ Niny goodayiida nea gwalealu, ak gwasima ng'asheega deamdeameadi ea gwadeagwajeega aba humng'eeda ea aba badayda ng'eanyiida, was dea ghayi lealu Danieli aba heeda uurda ng'anyeeka.”

²⁸ Hean gamnyeeni Danieli damanda Dariyo ea damanda gheambalmeeda Goreshi bea ng'eanyiida Ajemi.