DANIELI 5 - Bibliyeeda Ghaydit

Ghweelmeeda Belshasa

¹ Iimuchu gwasissa sugoocheanda siguura Belshasa ghweelmeeda haw fuga nyiit sagalama was ng'utamoojigaaschi, ak ghwali difaayi aba madeeda fuga nyiit sagalama.

² Iidu nea gwasamu Belshasa difaayi, gwayeesha ayeani dabita ghayi sisna dahaabu ea gea sisna lapiya ghayi geandeawa ghwaan was Nebukadinesa jeeda gheeda sibata ASEETA aba Yerusalemu, ghwaleayda sugoocheanda sea ng'utamoojigaaschi, sea gadeamgaaschi, sea gwealajeagaaschi.

³ Ng'ata geeyeadu dabita sisna dahaabu ea gea sisna lapiya ghayi sigeanda aba jeeda gheeda sibata ASEETA, was gheeda ASEETA mida Yerusalemu; hean ghwaleayda sugoocheanda sea ng'utamoojigaaschi, ea gadeamgaaschi ea gwealajeagaaschi.

⁴ Ghwali difaayi, ak gagwarsa aseecheeka dahaabu ea gea lapiya, ea gea lagheanga oomng'i, ea gea gharinga, ea dea geeta ea dea lagheaneeda.

⁵ Deagheata geadaah mooringa siida aba ghamarda gheeda sugoocheanda, nea gwadeaschi sea heeda siyiina gheaboong'nyeanda; ak ghwadaah sugoocheanda geatinda nea gang'oorshi.

⁶ Hean ghwayamwa oormeeda sugoocheanda, ak ghoapkaat fughareadaanyi; ak gang'arng'ariidi roobuutkaaschi, ak ghabwar geat gutung'weakaaschi.

⁷ Ak gooyeawda sugoocheanda nea goojuur nea gagasa ghwahidu deareemng'ajeega, fuga Galdayo ea fuga nal searoojiga miinga. Ak gwayeesha sugoocheanda fuga weaghoodi bea Babeli, “Siida jea ghoasoamwa ng'ooruutsu, ak gwarukunean gidanyah, gajeekwealsa hang'da oomu, nea geayiin gheata surumnyeanda dahaabu, ak gayghoah siideaba samwagu jea goombaliischi aba jeedeaba sugoocheanduumeeda.”

⁸ Hean ghwahidu fuga sean was weaghoodi bea sugoocheanda, ak ghwaraay ghoasoamwa ng'oorda ghana ghwanung' ghwanal sugoocheanda gidarugu.

⁹ Ghaham ng'eanyi muuchi sugoocheanda was Belshasa, ak ghwayamwa oormeadaanyi; nea ng'utamoojigaaschi ghang'ut muuwda.

¹⁰ Iidu iiy gheamata sugoocheanda, ng'asheega sugoocheanda ea gea ng'utamoojigaaschi ghwaan jeeda ghooriida ghweelmeeda; ak gwayi gheamata sugoocheanda, “Ea sugoocheanda, gagasa nyasa eaweega manda muudeanooda! Adaghahamng'eanyi fughareadaang'u, adaghoabealnyi ng'asheesu mida uhuudaang'uuni ghana ghwayamwa oormeadaang'u.

¹¹ Gwanda jeeda sugoocheanduumeadaang'u siida mideawa guroorooda ghaydit bea aseecheeka. Aba damanda was gweanu sugoocheanda, ghoahiimu siisi gideaba gwandeawa fughareeda weaghuumeeda, urji weaghuumeeda aseecheeka, ak ghwanung' sugoocheanda siguura Nebukadinesa was gweanu, ghoah sugoocheanda haweewa beeneediga, ea deareemng'ajeega, ea fuga Galdayo, ea fuga nal searoojiga miinga,

¹² aba gideaba gwandeawa guroorooda miy ea nalooda ng'asheega, ak ghwanal gwaroobu giirgweatka, ak ghoamu gwarugu ghwasiildeanga, nea ghoamu ghaweat sawanaduutka geaghus Danieli, ghayi guura sugoocheanda Belteshasa. Asi nung' eeguursa Danieli, ak gaygwargu gidawas.”

Danieli gwarukuta gising'waar

¹³ Hean geeyeadu Danieli madeeda sugoocheanda. Ghwalamda sugoocheanda ak gwayeesha Danieli, “Ang'iing'i guwoosi Danieleedida was siida Yahudi siipaleagu was dea ghayi eana sugoocheanda was bwaabwa ng'eanyiida Yudahi?

¹⁴ Aniini naanyaschi iitaang'u bea gideaba gindeawi guroorooda ghaydit bea aseecheeka, ea gideaba gwanda jeadaang'u weeshinda ea nalooda ng'asheega ea weaghuumeeda huumwa.

¹⁵ Asi siyeadu madeedeanyu, fuga weaghoodi, ea deareemng'ajeega, ghoasoamwa ng'ooruutsu ak ghwanung' danal gidarugu; ak ghwaraay gwarugu gidawas ng'asheesu.

¹⁶ Amadu ea naayiinyi gideaba giimuusi rukuni gidawas nea girgu ng'asheega funyeadi. Asi iimuusi Asoamwana ng'asheega sing'waar ak ginung' danal gidawas, gajeekwealseey hang'weaka oomng'i, ak geayiin gheataang'u surumnyeanda dahaabu, ak gayhuuwa siideaba samwagu jea goombaliischi aba jeeda sugoocheanduumeeda.”

¹⁷ Ng'ata ghwasha Danieli aba madeeda sugoocheanda ak gwayeesha, “Nung'waada haleanjeadaang'u mideawana, ak giidawi haleanjeadaang'u fih suuk; ak gaydeasoomasa sugoocheanda ng'asheega sing'waar ak gearukusi gidawas.

¹⁸ Ea sugoocheanda, ASEETA Haw bea Humng'eeda ghoadaw gweanu was Nebukadinesa sugoocheanduumeeda ea hawunda ea gharbeeda ea hawunda;

¹⁹ iidu aba hawundida adawiin, gwahirbaban buuneesean ea eemoojiga ea iidiga eemoojiga ak ghabeal aba madeadaanyi; ama gasa ghabwar siida ghabwar, amagasa ghoaghu siida ghoaghu; iissa goodiing'u siida gasa nea deagasa ghwahiing'da gwasin.

²⁰ Iidu nea gwasin ghwarjeeda nea ghahang'waanyiit gurooroadaanyi aba ghwarjeeda, hean geejakteawa hoorgeadaanyi bea sugoocheanduumeeda, ak geegeandeawa gheambalmeadaanyi;

²¹ ak geahoana jeeda buuneeda, ak geehinda fughareadaanyi dea diyeayda, nea giibindaanyi gwandeaydooschi sea diyeanga jarooda; ak geanung' ghwaakta nyeega deeda, nea ghabwar saseadaanyi rahooda humng'eeda, bwak ea ghwanal gideaba ASEETA Haw bea Humng'eeda goombal sugoocheanduumeeda buuneeda, ak ghoadaw siida gasa goombal.

²² Ak ang'iing'i orjeedaanyi, Belshasa, ea mii hiing'ni gurooroadaang'u, nea ginali ng'asheesu seaniin,

²³ amadu ea niidiing'u geaw aba badayda Ng'utamiida humng'eeda; ak geeyeadu dabiteaba gheanyi madeadaang'u, ak ang'iing'i sea ng'utamoojigaagu, sea gadeamgaagu, nea gwealajeagaagu ea nili difaayi aba heanyaawa; ak ea niighaambiidi aseecheeka sisna lapiya ea dahaabu, ea gea lagheanga oomng'i, ea gea gharinyeanda, ea gea geeta, ea lagheanga, mwadaaha gil ghana ghwayiiy ghana ghwanal, nea ASEETA was geatindaanyi uurdaang'u, abal naweadingaagu sean, ea misisiini mureeda.

²⁴ “Amadu aba madeadaanyi ghwahidu geatinda, ak ghang'oar ng'asheesu.

²⁵ Ak suh ea ng'asheega sing'waari: MENE, MENE, DEKELI, ea BERESI.

²⁶ Nih gidarugu ng'asheega: MOONEEDA gwarugu gideaba eawoojiga sugoocheanduumeadaang'u niyiida ASEETA ak gayghwanung' gamuudean;

²⁷ DURUMANATA, gideaba ang'iing'i siiteen durumanataang'u ak guwoosi asasi;

²⁸ DARDEAYDA, sugoocheanduumeadaang'u nidarda ak geataw fuga Medi ea fuga Ajemi.”

²⁹ Hean ghwanung' Belshasa eekwealsa Danieli hang'weaka oomng'i, nea geayiin gheata surumnyeanda dahaabu, ak geerugu ng'asheanda siipwaash ng'eanyiida aba badaydaanyi, bea gideaba gayghoah siideaba samwagu jea goombaliischi aba jeeda sugoocheanduumeeda.

³⁰ Jeedeaba eaweedida geabwar Belshaseeda was sugoocheanda Galdayo.

³¹ Ak ghoang'waay sugoocheanduumeeda Dariyoheeda ng'eanyiida Midiyani nea gaba gweanyeew laadam ea iyeenya.