DANIELI 4 - Bibliyeeda Ghaydit

Giirgweatkeaba iyeenya bea Nebukadinesa

¹ Muchu ghoadaw sugoocheanda was Nebukadinesa iita buuneesean, ea eemoojiga ea giliwas iita mida badayda ng'eanyiisean: Gagasa abeaha hoyyoo!

² Ooleeysiina iit ng'asheega miyaasiin deamdeameadi ea gwadeagwajeega ahiimnaan ASEETA Haw bea Humng'eeda.

³ Gwadeenachaan heesinyeeka gwadeagwajeagaaschi, ak gwadeenachaan ng'asheagaaschi deamdeameadi! Sugoocheanduumeadaanyi sugoocheanduumeeda manda muudeanooda, gil nea gheambalmeadaanyi ghang'eada seaygeeda ea ghwahita seaygeeda.

⁴ Aniini, Nebukadinesa, gealili aba jeedeaba gheenyu nea geamnyaanyi aba jeedeaba gheanyu haw.

⁵ Aniini geargweadayi giirgweatka nung' dabeal; damanda ealeewi aba bulaliida ak ghwanung' giirgweatkeasu dabeal.

⁶ Ak geasinyi diigheanda ak ghaanung' eeyeadu heedeanyu weaghoodiga sean bea Babeli, nea geagasayi gwarugu gidawas giirgweatka.

⁷ Hean ghapka beeneediga, ea deareemng'ajeega, ea fuga Galdayo, ea fuga nal searoojiga miinga; ak gearukusi giirgweatka, ak ghwaraay gwarukunean danal gidawas.

⁸ Iimuchu ghwahidu Danieli madeedeanyu was siida ghayi siguura Belteshasa nea geemaseaw gheawunga aseeteanyu, nea gwandeawa guroorooda aseecheeka ghaydidi ak gearukusi giirgweatka, nea geayeeshi,

⁹ “Ea Belteshasa, sugoocheanda beeneediga, aniini ghaanali gideaba guroorooda aseecheeka ghaydidi gwanda jeadaang'u ak ea manda ng'asheanda funyaat ghana dea hang'waay aba headaang'u, asi suh giirgweatka aadaayi; asi rukunean gidawas.

¹⁰ Asi giirgweatka eargweadayi nea gealili aba bulaliida suh: Ghaang'weardi ak ghaadaayi geeta haw aba bugusta ng'eanyiida; ak ea geaw muuchi.

¹¹ Ak gwaheedu geeta ea gamajeegiit, ea ghwahita uhuudaanyi humng'eeda, ak geamu eadaa aba muunda ng'eanyiisean.

¹² Nea seengaaschi aamiyaas ak eara haghweagaaschi aasaang'a, ak ghoamu ghwaak buuneesean. Nea goobiida jirooneadaanyi diyeanga jarooda, nea goobiida dariidaka humng'eeda damealgaaschi, ak ghwaak haleanjeeda sean mideawa eaweega haghweagaaschi.

¹³ “Ak ghaadaayi aba jeeda giirgweatkeasu damanda eali aba bulaliida, ak ging'ulayi, ghwararang'aana humng'eeda malaykajeanda ghaydit.

¹⁴ Ak goojuur aba nyeashta haw nea gwayi, ‘Laja geeta ghoabeada ak gilajaadi damealgaaschi, abuukni seengaaschi ak gihisti haghweagaaschi; ak gihoani diyeanga ghang'amwa guumda nea ghang'amwa dariidaka damealgaaschi.

¹⁵ Ak giibuudi mulooda ea hawungaaschi nea geerada aba ghealooniga gharinga ea lagheanga oomng'i, aba bugusta nyeega ng'eanyiida. Ak gagasa ghabwar rahooda humng'eeda; ak gagasa ghoah giibindaanyi jeeda nyeega sea diyeanga aba jeeda ng'eanyiida;

¹⁶ gagasa ghwayamwa fughareadaanyi bea gealaan ak geataw niny fughareeda diyeayda; ea ghang'ata gweanyeew ispwa.

¹⁷ Nih diigheanda siitaw malaykajeanda, was ng'asheanda leabu heeda ASEETA asagi ghaydit, ak abeeda ghwanal buuneesean gideaba ASEETA Haw bea humng'eeda gwandeawa uurda burdeawa sugoocheanduumeeda buuneeda ea gideaba ghoamu ghoadaw siida wassean loat, ak ghoadaw eara ea siida mwanang'eawa suurja.’

¹⁸ Suh giirgweatka eargweadayi aniini, aba gidarugu sugoocheanda was Nebukadinesa. Nea ang'iing'i, Ea Belteshasa, asi rukuni gidawas, aba gideaba fuga sean weaghoodi mida jeeda sugoocheanduumeedeanyu moamu gwarukunean danal gidawas, ak giimuusi ang'iing'i, aba gideaba guroorooda aseecheeka ghaydit gwanda jeadaang'u.”

Danieli gwarukuta iita giirgweatka

¹⁹ Iimuchu Danieleeda siguura Belteshasa, ghahamng'eanyi gilimwanang', nea ghwayamwa fughareadaanyi. Ak gwayi sugoocheanda, “Belteshasa, adaghoabealnyi giirgweatka ghana hamang'eanyi aba gidawas.” Ghwasha Belteshasa nea gwayeesha, “Ng'utamiideanyu, gidabal gagal giirgweatka fuga sinyi nea gagal gidarugu giirgweatka heeda weajoodigaagu!

²⁰ Geeta idaahi, heedu ea gamajeegiidiin, nea ghwahita uhuudaanyi humng'eedean, ak geadaah aba muudeanooda ng'eanyiisean;

²¹ nea seengaaschi aamiyaas nea haghweagaaschi aasaang'a, ak ghoah hamita haleanjeeda sean; ak goobiida diyeanga jarooda jirooneeda, nea goobiida dariidaka humng'eeda damealgaaschi–

²² Siida ang'iing'i gil, Ea NG'UTAMIIDA, dea heedu ak ghwanyas uurda. Hawundaang'u niheedu ea ghwahita humng'eeda, ak gheambalmeadaang'u ea nihita muudeanooda ng'eanyiida.

²³ Iidu nea ghwadaah sugoocheanda malaykajeanda was dea ghaydit, ghwararang'aana humng'eeda ak gwayi, ‘Laja geeta ak gimulmulaadi, ak giibuudi mulooda ea hawungaaschi jeeda sigeeda, ak giradi bugusta ghealooda gharinyeanda ea lagheanga oomng'i, ak ginung'usi jeeda nyeega madamnyeanda, ak ginung' ghabwar siisi rahooda humng'eeda; ak ginung'waadi gwandeayi sea diyeanga jarooda, ea ghang'ata gweanyeew ispwa’;

²⁴ nih gidarugu, Ea ng'utamiida: Nih diigheanda ASEETA Hoauur, hidu heeda ng'utamiideanyu was sugoocheanda,

²⁵ ak gajeahoananeey jeeda buuneeda, ak giibindaang'u gaymideaydooscheewana diyeanga jarooda; ak gajeanung' akta nyeega deeda, ak gajeashapnyi aba rahooda humng'eeda, ak gayghang'ata gweanyeew ispwa aba headaang'u, ak ginali gideaba ASEETA Haw bea humng'eeda goombal sugoodiga buuneeda, ak iissa ghoadaw siida gasa sugoocheanduumeeda.

²⁶ Nea aba gisirukuteayda gideaba nung'waada mulooda ea hawunga geeta, abeeda sugoocheanduumeadaang'u gajea dea huumwa ghang'eada damanda inali gideaba ASEETA goombal ng'eanyiida.

²⁷ Asi, Ea sugoocheanda, gagasa mwasa ng'asheegeasu; nung'usiina heeda riing'eagaagu ak gisini ng'asheega doobiiweadi, ea ng'asheagaagu munyas ak ghoahiimu baydeayda aba heeda fuga sisawan, ak abeeda ghoanyaschi ng'asheega miyaasiin bea miyeenooda.”

²⁸ Ng'asheesu seaniin ghwahidu badayda sugoocheanda siguura Nebukadinesa.

²⁹ Iing'ata sheeh damaniyeenya gwaneayeewa uhuuda gheeda haw mida Babeli,

³⁰ ak gwayi sugoocheanda, “Nih mii Babeleeda hawi ghayi aadeaschi aba uurdeanyu haw ghoah gheeda sugoocheanda bea giibinda bea gheambalmeedeanyu hawi?”

³¹ Damanda duu gwarina ng'asheesu ghuuta sugoocheanda, gwashuubean ghuuta leabu humng'eeda, “Ea sugoocheanda was Nebukadinesa, aleeysiina iit ng'asheega eargu: Sugoocheanduumeeda sigeandeawa headaang'u,

³² ak gajeahoananeey jeeda buuneeda, ak giibindaang'u gaymideaydooscheewana diyeanga jarooda; ak gajeanung' aga nyeega uurjeewana deeda; ak gayghang'ata gweanyeew ispwa aba headaang'u, ak gaynala gideaba ASEETA Haw bea humng'eeda goombal sugoodiga buuneeda ak iissa ghoadaw siida gasa sugoocheanduumeeda.”

³³ Mii ghoah gil gwasa ng'asheanda, sirukusa Nebukadinesa. Ak geahoana jeeda buuneeda, ak ghwaakta nyeega deeda, ak ghwashabwa saseadaanyi aba rahooda humng'eeda ea gageawiitiida buudeagaaschi dabiniga rabearda, nea budilgaaschi gooyang'achiida budilga madooyda.

Nebukadinesa ghoaghaambiit ASEETA

³⁴ Muchu nea ning'ata gweanyeew ispwa geagatkachi gheanyangeasu aniineeda was Nebukadinesa dea geal humng'eeda, ak gabiigu fughareedeanyu, ak geabadiischeesi ASEETA Haw bea humng'eeda, ak ghaaghaambiichi nea geasisi mureeda dea mida damanda manda muudeanooda; aba gideaba gheambalmeadaanyi dea iissa ghwashng'u, nea sugoocheanduumeadaanyi iissa goobiida ghang'eada seaygeeda ea ghwahita seaygeeda;

³⁵ aba gideaba fuga mida ng'eanyiida mawuurji gil, ak iissa gwasinda ng'asheega gidagasiida aba humng'eeda ea aba jeeda fuga abiita ng'eanyiida; ak ea manda siida ammu gwareekusa niny ghana gwayeesha niny, “Gisini naaha?”

³⁶ Iidu gabiiksean fughareedeanyu; hean gabiiksean giigheambiita ea uurdeanyu ea gharbeeda. Ak ghwadeaptanaan fugeasu hees ea ng'utamoojigeasu, ak geebiikta eegoonan sugoocheanduumeedeanyu ak geeheanean hawunda ea ghwanaawa dea ghayi bea mwadi.

³⁷ Asi ghamneawa aniini Nebukadinesa, ghaaghaambiichi nea geasisi mureeda nea geagwarsi sugoocheanda mida humng'eeda; aba gideaba gadiyoojigaaschi sean aamiyaas nea naweadingaaschi ghwadoabiiw; nea fuga ghwarjeeda gayghwahiing'u.