DANIELI 2 - Bibliyeeda Ghaydit

Giirgweatka Nebukadinesa

¹ Gweaydeaba iyeenya bea gheambalmeeda Nebukadinesa, goorgweadi Nebukadinesa; ak gwasawana gurooroadaanyi, ea gwarooda ruweangaaschi.

² Hean ghwanung' sugoocheanda eeguursa beeneediga ea deareemng'ajeega ea fuga Galdayo ang'urooni buuneeda gwarukusa sugoocheanda giirgweatkaaschi. Ng'ata ghapka ak ghamiinaada aba madeeda ng'utamiida.

³ Ng'ata gwayeesha sugoocheanda saawa, “Aniini geargweadayi, ak gwasawana gurooroodeanyu aba gideaba geagasayi danal gidawas.”

⁴ Hean ghwalamda fuga Galdayo ak gwayeesha sugoocheanda, “Ea sugoocheanda, gagasa abiidana ng'eanyiida damanda manda muudeanooda! Rukusiina fugaagu bea gadiyeeda giirgweatkaagu, ak gajeahiimna gidarugu.”

⁵ Ak gwayeesha sugoocheanda fuga Galdayo, “Ng'asheanda leabu heedeanyu huumwa: iimoonung' danal giirgweatka ea gidawas, gajealajaada roobuutkeagwa, ak ghoah gealgeagwa eemeega.

⁶ Ama oorugu giirgweatka ginyah, gaydagooneegwa gidagusguseega ea giimearda ea mureeda haw. Asi eahiimni giirgweatka ea ginyah.”

⁷ Hean ghwasha deabiyeenya, “Iirukusa sugoocheanda fugaaschi bea gadiyeeda giirgweatka, abeeda gajeerukusiina gidanyah.”

⁸ Ng'ata ghwasha sugoocheanda nea gwayeesha, “Ghaanali gideaba googischi jeeda damanda, aba gideaba ghoadaayi ng'asheanda leabu heedeanyu huumwa

⁹ ea gideaba iimeanung' danal giirgweatka, gaygaba siisi nyas ghoorjooda. Aba gideaba ghoamwaschi napooda ng'uyeega ea ng'asheega munyas aba madeedeanyu ea dayam fughareedeanyu. Asi arukunean giirgweatka, ak abeeda ghaanali gideaba gajarukunean gidanyah.”

¹⁰ Ghwasha fuga Galdayo ak gwayeesha sugoocheanda, “Manda jeeda ng'eanyiida siida jea ghoamu gwasin gidagasa sugoocheanda; aba gideaba manda sugoocheanda haw mideawa uurda niinyaashta ng'asheanda uurji nih aba heeda beeneediga ghana Galdayo.

¹¹ Ng'asheanda anyaashta sugoocheanda aahang'waay, ak ea manda siida ammu goohiimsa sugoocheanda geaghus aseecheeka, meabiiteena jeeda buuneeda.”

¹² Ak ghwanyareas sugoocheanda aba badaydeaba ng'asheanji ea ghwadikghta muuchi, ak ghwanung' ealas uhuuda fuga sean bareahi iheeni bea ng'eanyiida Babeli.

¹³ Hean geatayda iita gideaba aduulni fuga bareahi iheeni, ak geegasa eara Danieli sea bareandaanyi eenuuseada.

ASEETA goohiimsa Danieli gidarugu giirgweatka

¹⁴ Ng'ata ghwasha Danieli aba weaghooda nea ghwaat geaw ng'eanyi aba heeda Ariyoki, was shirikarajeanda haw ambal gea fur sugoocheanda, was dea weah ghabwar fuga bareahi iheeni bea Babeli;

¹⁵ ak gwayeesha Ariyoki, was shirikarajeanda haw bea sugoocheanda, “Ghwasaan anda ng'asheanda sugoocheanda aang'waan ea gwasunu?” Hean ghwanung' Ariyoki ghang'at iita Danieli.

¹⁶ Ng'ata gawa Danieli gah ak gamus sugoocheanda damanda jea gwanyeascheewa, ak gwarukusa sugoocheanda gidarugu giirgweatka.

¹⁷ Iidu gabiikta Danieli gheanyi ak gwarukusa iita Ananiya, ea Mishaeli, ea Asariya, sea bareandaanyi,

¹⁸ ak gwayeesha saawa agasa baydeayda ASEETA humng'eeda aba iiteaba ng'asheanji, ak abeeda ea meabwara Danieli sea bareandaanyi sea fuga bareahi iheeni bea ng'eanyiida Babeli.

¹⁹ Ak geehiimsa ng'asheanda Danieli aba jeeda giirgweatka eawa. Ak gabadiischeesa Danieli ASEETA humng'eeda.

²⁰ Gwayi Danieli: “Gagasa eebadiischeesa gheawunga ASEETA damanda mamuudeana manda muudeanooda, was dea mideawa weaghuumeeda ea uurda.

²¹ Niny gwayama damanyoojiga ea roobuutka gweanyeeka; niny gageaniida sugoodiga nea goombiidi sugoodiga; ak goodawi weaghuumeeda fuga weaghoodi ea fughareeda fuga mideawa fughareeda;

²² niny iissa ghoahiimu haleanjeeda hang'oonyi funyaat; ak ghwanal gidamida jeeda misaneeda, ak gwanda headaanyi weeshinda.

²³ Nea ang'iing'i, Ea ASEETA ghweanigeasu, geabadiischooweey nea geakghaambiicheey, aba gideaba nigoonyean weaghuumeeda ea uurda, ak ea ninung' danal gidasing'aleay, ak ea ninung' eanala ng'asheega ng'utamiida.”

Danieli gwarukusa sugoocheanda giirgweatka ea gidarugu

²⁴ Ng'ata gawa Danieli heeda Arioki, was dea ghayi loat sugoocheanda ghwalas uhuuda weaghoodiga Babeli; hean gawa ak gwarukusa ng'asheesu niny gideaba “Adiidu gilasi uhuuda fuga weaghoodi bea Babeli; aadaan madeeda sugoocheanda, ak gaydarukusa sugoocheanda gidawas.”

²⁵ Hean ghwaat Arioki Danieli madeeda sugoocheanda nea ghwalamwach, ak gwayeesha niny: “Naanyaschi aba jeeda fuga siipaleakna ng'eanyiida Yuda siida jea ghwanung' ghwanal sugoocheanda gidarugu.”

²⁶ Ghwalamda sugoocheanda ak gwayeesha Danieli, siguura gheawungaaschi Belteshasa, “Ang'iing'i giimuusi nung' danal gidarugu giirgweatka aadaayi ea gidawasi?”

²⁷ Ghwalamda Danieli ak gwayeesha sugoocheanda, “Manda deareemng'ajeega ghana beeneediga ghana fuga nal searoojiga miinga dea ammu gwarukusa sugoocheanda gidafunyaat anyaashta sugoocheanda,

²⁸ ak gwanda ASEETA mida humng'eeda ahiimu ng'asheega funyeadi, ak ea ninung' ghwanal sugoocheanda siguura Nebukadinesa gida jea ghwahidu galanya. Giirgweatkaagu ea ng'asheega siitaheachneey aba jeeda uhuudaang'u damanda iwiili geaw aba bulaliida suh:

²⁹ Ang'iing'i, Ea sugoocheanda, damanda iwiili geaw aba bulaliida ghwahidu ng'asheega jea ghwahidu galanya ak abeeda ASEETA ahiimu ng'asheega funyeadi gayghwanung' nala gida jea ghwahidu.

³⁰ Ak ghamneawa gili funyaadiin ea siihiimnaan, nea meakna gideaba geawooschi weaghoot ea dang'al buuneeda suurja, geegasa ghwanal sugoocheanda gidarugu giirgweatka, ak abeeda ginali gidarugu fughareadaang'u.

³¹ “Gidaahi, Ea ng'utamiida, ng'ula, sanaamooda haw. Gili mideawa uurda nea ghabwada weeshindean, ghamiinaada aba madeadaang'u, nea iing'ulayi gaybeala.

³² Uhuudeaba sanaamoan gaba dahaabooda miyaasiin nea daghataanyi ea geatinga geesina lapiya, jeadaanyi ea jimeergweaka gaba shaaba,

³³ geeshangaaschi gaba gharinyeanda, baneaguuka gaba meatkweenagi gharinyeanda ak gaba meatkweenagi sheang'weeda.

³⁴ Damanda ing'uli, ghang'adaan lagheaneeda meang'waanyana geatinda siida, ak ghwalas geeshangiga bea gharinyeanda ea sheang'weeda bea sanaamuun;

³⁵ ak geehirjeaweada gharinyeanda, ea sheang'weeda, ea shaaba, ea lapiya, ea dahaabu, geehirjeaweada sean, ea gawuurji mbarariida geayda sing'aal ea ghoah dearanga; ak ghwaat jeameeda, ak ea manda heeda jea eanyasa. Nea lagheaneedida nyarja sanaamuun ghoah giijeeda haw ak ghoanyiit ng'eanyiisean.

³⁶ “Asi nih giirgweatka; asi gajeerukusiina sugoocheanda gidarugu.

³⁷ Asi, ang'iing'i Ea ng'utamiida, sugoocheanda sugoodiga, was ASEETA humng'eeda goona gheambalmeeda, ea uurda ea hawunda, ea giigheambiita,

³⁸ nea siida ghwayiin geatinda, aba heeda wassean mida, orjooga buuneeda, ea diyeanga jarooda, ea dariidaka humng'eeda, ghwanung' ambala sean–aba gideaba gindi uhuuda dahaabu.

³⁹ Ama ng'ata damandaang'u gayghwahidu sugoochean nuut mwanang'eeweey, ak gayghwahidu sugoocheanduumeedeaba samwagu bea lagheanga oomng'i jea goombal ng'eanyiisean.

⁴⁰ Ak gayghwahidu sugoocheanduumeedeaba ang'wan, nea majeekta gharinyeanda, aba gideaba gharinyeanda iissa gwanyarjeaweada nea ghang'al haleanjeeda, gaygwanyarjeaweada ak ghang'al suh seaniin.

⁴¹ Nea geeshanga idaahi ea mooringa hees was meatkweenagi sheang'weeda nea meatkweeda niirja ea gharinyeanda gil, gajea sugoocheanduumeeda jea ghabwaasha; ak gaygwanda jeeda hang'ooynata gharinyeanda, gawuurji gididaakti gharinyeanda gaguuyi sea duusheang'wajeanda.

⁴² Mooringa geeshanga iiwas meatkweenagi gharinyeanda nea meatkweeda niirja ea sheang'weeda gil, abeeda sugoocheanduumeeda gajea majeek meatkweenagi nea meatkweeda niirja gajea ng'arng'ar.

⁴³ Asi idaahi gharinyeanda guuyi sea sheang'weeda miy, gaygaba nih guuyi nuut aba gheenda, ak ea mayghoang'waay geat, gawuurji gidamoang'waayda geat gharinyeanda sea sheang'weeda.

⁴⁴ Nea aba damandeaba sugoodisu gayghamiinda ASEETA humng'eeda sugoocheanduumeeda nuut majeamu eayam, ghana eenung'usa gheambalmeadaanyi fih suuk. Ak gaygwanyarjeaweada sugoodisu seaniin ea goosha, ak gaygoobiida sugoocheanduumeeni damanda manda muudeanooda;

⁴⁵ gawuurji gididaakti lagheaneeda geeloona giijeeda nea masina geatinda siida, ak gwanyarjeaweada lagheaneeda, ea lagheaneeda oomng'i, ea sheang'weeda, ea lapiya, ea lagheaneeda meeng'meeng'i. Ninung' ASEETA haw ghwanal sugoocheanda gida galanya jea ghwahidu. Giirgweatsu huumwa gil, ak eara gidarugu ea huumwa.”

Sugoocheanda ghoadaw Danieli hawunda

⁴⁶ Hean ghoabeada sugoocheanda was Nebukadinesa ak ghang'uda gheamamdaanyi ng'eanyi, ak gwasissa Danieli mureeda, ak gwarukuta gideaba gajeatayda haleanjeeda sisabwa geadi bea ghadooweeda ea geediga ng'andidi aba badaydaanyi.

⁴⁷ Ak gwayeesha sugoocheanda Danieli, “Aba huumwa, ASEATAANG'U ASEETA aseecheeka gil ea Ng'utamiida sugoodiga, ak goohiimu ng'asheega funyeadi, aba gideaba niimuusi ahiimni ng'asheanji funyaadiin.”

⁴⁸ Ak ghoadaw sugoocheanda Danieli hawunda ea haleanjeeda hees miyaas, ak ghwanung' ghoah sugoocheanda aba ng'eanyiida sean bea Babeli, nea ghwanung' ghoah siida haweewa fuga weaghoodi bea Babeli.

⁴⁹ Ak gamus Danieli sugoocheanda, gideaba loada Shadraki, ea Meshaki, ea Abedinego goombal haleanjeeda ng'eanyiida Babeli; nea Danieli goobiida ghuuta gheeda sugoocheanda.