DANIELI 12 - Bibliyeeda Ghaydit

Damanda huuydean

¹ “Damandida gayghwahidu malaykajeanda siguura Mikaeli, was malaykajeanda haw ahaaghwa buuneadaang'u ak gaygwanda damanda jea eeng'uchi, manda dea uurji aba dea ning'eada eemeeda ea ghoah damani; abeeda damandida buuneadaang'u gajeelealu, was fuga sing'oorsa gheawunga nyaawa jeeda gitaabu.

² Nea fuga saang'a lil aba jeeda sigeeda gayghang'eatng'eat ak ghwanyas eaweega manda muudeanooda, nea mwaatkwa ghwanyas baspaseega ea foolda maygamuudean.

³ Abeeda fugiga weaghoodiin gayghoameang'daayda humng'eeda; nea fuga jea ghwayam fuga saang'a gwasin ng'asheega doobiiweadi gayghoameang'daayda miinga damanda manda muudeanooda.

⁴ Asi ang'iing'i, Danieli, rada ng'asheega, ak giyiini gitaabu giirooraneeda, ea ghwahita damanda muudeanooda. Gaygwasalda fuga saang'a nea gagal hiji ea hoowa nea gayghoahaada fughareenga.”

⁵ Ak ghaang'weardi aniini Danieli, ak ging'ulayi, ghamiinaada fih iyeenya suuk, ak ghamiinaada akaleala aba mareeta ghealooda meatkweeni, ak ghamiinaada niirja aba mareeta ghealooda meatkweeda niirja.

⁶ Ak geayeeshi siida akwa hang'weaka miyaas, nea ghamiinaada aba badayda beega ghealooda, “Gajeeyi bwak ea ghoah eeju mudeanoodeaba ng'asheesu deamdeameadiin?”

⁷ Iidu siidida akwa hang'weaka miyaas, nea ghamiinaada aba badayda beega ghealoodean, gagatkat geatindaanyi bea dugwa ea geatindaanyi ghaadaam nea googeal humng'eeda; ak ghayiinyi nea gweaksa habeawooda dea mida damanda manda muudeanooda, gideaba gaygwanda damanda, ea damanyooji iyeenya, ea gidamwahita damanda; nea iidu nea sihirja uurda fuga ghaydidi ak gamuudean, abeeda ng'asheesu seaniin gajeahiit.

⁸ Ak ghayiinyi, ak ea mwaanali gidawas. Ng'ata geayeeshi, “Ea ng'utamiideanyu, huuydeandeaba ng'asheesu gaygawuurjiin?”

⁹ Ak gwayi, “Una heechea una, Danieli, aba gideaba ng'asheega sirat ak ea siiroor ea ghwahita damanda huuydean.

¹⁰ Gayghoamiidu geat fuga saang'a, ea gaweeriidi, ea gamiyeasiidi; nea fuga munyas gaygwasin munyinda; ak ea manda siida muy jea ghwanal; nea fuga weaghoodi gayghwanal.

¹¹ Nea damandida sigeandeawa haleanjeeda ghadooweeda sighwardaan, ak ghamiinaada gidida muy jea gweadu nyariidean, gaygwanda askwearjooji sagalama ea bughalaji samwagu ea diktam ea damanamuut.

¹² Siitaw ghawooda fugiga amuughu askwearjooji sagalama ea bughalaji samwagu ea diktam ea damanamuudiin.

¹³ Asi una heechea una ea ghwahita huuydeanda; ak gayfuufa, ak gaymiinaada aba headaang'u siloat ea ghwahita muudeanooda askwearjoojiga.”