DANIELI 11 - Bibliyeeda Ghaydit

¹ Ak gwasunu aba heedeanyu, aba gweayda madeeda bea Dariyo bea Medi, ghaang'eachi damiinaada daweat niny nea geamajeekchi.

Sugoocheanda Misri ea Shaamu

² “Ak ghamneawa gaydaahiimneey huumeanda. Ng'ula, gayghwahidu sugoodi samwagu jeeda ng'eanyiida Ajemi; nea deaba ang'wan gajeabaruur ea ghang'al suurja sean; hean nea ghwanya uurda aba baruureagaaschi, gayghoang'waal sugoocheanda Yunani.

³ Ng'ata gayghwahidu sugoocheanda mideawa uurda, jea goombaliischi aba uurda haw ak gwasin gidagasa.

⁴ Iimuchu nea niimbaliischi gayghwanyar sugoocheanduumeadaanyi ak gwadarsa murdaji ang'wan bea humng'eeda, nea maygaba jeataanyi ak ea maygawuurji gheambalmeeda ghayi itaanyi; aba gideaba sugoocheanduumeadaanyi gajeegeanda ak gaweesa fih suuk.

⁵ “Iimuchu gayghwanyas uurda sugoocheanda mida wiilooda ng'eanyiida biyeara, gaygwandeawa uurda muuchi ea ghoadaraam niny nea gheambalmeadaanyi gajea gheambalmeeda hawi.

⁶ Ng'ata gweanyeeka saang'a gwasin neajeeda, ak gaygawa huda sugoocheanda mida wiilooda ng'eanyiida biyeara heeda sugoocheanda mida wiilooda ng'eanyiida ghayeawa ak gwasin hoyyoo; ak ea maygwandeawa geatindaanyi uurda, nea niny ea jeacheangaaschi ea mayghoamu ghamilikghta; aba gideaba gajeatayda, sea fugaaschi bea gadiyeeda, ea jeaptaanyi, ea siida abiita gheanyi.

⁷ “Damanyoojigiga gwarina guumdoadaanyi damealeanda jea gawa hoorgeadaanyi; ak gaygang'uchi sea lugooda ak gawa jeeda hilgweanda gheeda sugoocheanda mida wiilooda ng'eanyiida ghayeawa, ak gaygang'uchi ak gaygwajooriischi.

⁸ Gayghwasar aseecheeka nyaawa ghwaat ng'eanyiida Misri nea ghwaat eara haleanjeeda sisin sibada ea haleanjeeda nyaawa bea sheayeeda haw sisna lapiya ea gea dahaabu; ak gayghang'ata gweanyeeka nea maygang'uchi sea sugoocheanda mida wiilooda ng'eanyiida ghayeawa.

⁹ Iimuchu gaygawa jeeda ng'eanyiida sugoocheanda mida wiilooda ng'eanyiida biyeara ak gaygabiikta jeeda ng'eanyiidaanyi.

¹⁰ “Ak gayghoang'eat orjoagaaschi ng'ucheeda ak ghoawaam eemeetuw was lugooda, jea ghapka ak ghwanyiit ea ghang'ata, ak gang'uchi ea ghwahita ghamardeaba ng'eanyi.

¹¹ Ng'ata gawa sugoocheanda mida wiilooda ng'eanyiida biyeara, ak gawa nea ninyareas, ak gayghoan gang'uchi sea sugoocheanda mida wiilooda ng'eanyiida ghayeawa; ak gayghoang'waay eemeeda saang'a, ak gajeayiin geatingaaschi.

¹² Iidu nea siing'waay eemeetuw, gayghaghwar geaw gurooroadaanyi, ak ghabwar lugooda nyiit sagalamnyooji niba damanamughuush, ak ea mwashing'na jooriischoadaanyi.

¹³ Aba gideaba sugoocheanda mida wiilooda ng'eanyiida ghayeawa gaygabiikta ghoawaam eemeetuw, saang'a ea ghwanaawa gea madeeda; hean ng'ata gweanyeeka gaygabiigu nea ninyas lugooda saang'a mideawa dabita saang'a.

¹⁴ “Aba damandida gayghang'eat fuga saang'a jea gang'uchi sugoocheanda mida wiilooda ng'eanyiida biyeara; sea fuga bwariiy jaliida bea ng'eanyiidaang'u gaygoodiing'u geat gideaba ghwanal giirgweatka; ak gayghwaraay.

¹⁵ Abeeda sugoocheanda mida wiilooda ng'eanyiida ghayeawa gayghoan ak gang'alsa sigeeda guumsheaka ghamarda majeekcheewi bea mujiini. Ak gayghwaraay lugooda leabu wiilooda ng'eanyiida biyeara gang'uchi ghana eara lugooda simuush, mandeawana uurda jea ghoamuusa.

¹⁶ Aba gideaba siida jea ghwahidu gang'uchi sea niny gaygwasinda gidagasiida, ak ea manda siida jea ghamiinaada aba madeadaanyi; ak gayghamiinaada aba ng'eanyiida ghaambiidaat, ak goobiida sean jeeda gheambalmeadaanyi.

¹⁷ Ak gayghwasach gheamamdaanyi ak ghoana uurda sean bea gheambalmeeda, nea ghwaan gagasa hoyyoo ak gwasin. Ak gayghoadaw niny huda ak gwanyarja ng'eanyiida; ak ea mayghwanyas.

¹⁸ Ng'ata gayghwasach gheanyangaaschi googeal ng'eanyiida ghuuta basooda, ak gayghoang'waay fuga saang'a; ak gayghwajoar shirikarajeanda haw bea darooraka ak goosha ghwarjeadaanyi; aba huumwa gayghwayamwa ghwarjeadaanyi gabiiksa niny.

¹⁹ Ng'ata gayghwasach gheanyangaaschi googeal heeda mida ghamarda ng'eanyiidaanyi; ak gajeajoar ak ghoabeada, ak ea maygudeadaah.

²⁰ “Iimuchu gaygweadu geeshta siida jea goojeakta siida ang'oonyi gwaadi aba jeeda ng'eanyiida goomajeek sugoocheanduumeeda; nea iing'ata askwearjoojisu ng'ay gayghwanyar, nea mii aba nyarasta ghana aba ng'ucheeda.

Sugoocheanda muy bea Shaamu

²¹ Iing'ata gayghwahidu siida jea ea muy mamiisiina ghoah sugoocheanda; ak gayghoan nea mwaheada buuneeda ak ghwanyas sugoocheanduumeeda aba milmilanda.

²² Ak gayghahoan lugooda mida madeadaanyi ak ghoadaarda, eara ashoohoodiga ASEETA Haw gayghahoan ak ghwalas uhuuda.

²³ Ghang'eada damanda sisna neajeeda sea niny gaygwareengani eemoojiga suurja, ak gayghwanyas uurda muuchi, earapeadi ambal ng'eanyiida mwanang'.

²⁴ Gayghoan jeeda ng'eanyiida baruur nea mwaheada buuneeda; ak gaygwasin gidaghayi miigwasin ghweanigaaschi ghana gheambaghweanigaaschi, ak gaygoodearsa jeeda fugaaschi haleanjeeda, ea dabita ang'waay aba ng'ucheeda. Ak gayghamwaal gichea ghaghasta gealga, aba gheadi nuwaas.

²⁵ Ng'ata gayghoawaam lugooda saang'a jea gang'uchi sea sugoocheanda mida wiilooda ng'eanyiida biyeara ak gang'uchi sea lugooda saang'a muuchi mideawa uurda; ak ea mayghamiinaada, aba gideaba geereengani nea geegasa eaghas niny ak ea mayghoaw.

²⁶ Nea eara fugiga ak hamitaanyi miyiin gagasa ghabwar; amadu lugoadaanyi gajeahoan, ak gealajaada gheatkweaka.

²⁷ Abeeda gaygoobiitpiit sugoodi iyeenya ak goombuuchi aba hijagi; nea jeesinga nyaawa ea munyas ak gaba siisi reengani niirja. Ak ea mayghwanyas gidagasa; aba gideaba muudeanooda miighoah damanda hit.

²⁸ Amadu gaygabiikta ng'eanyiidaanyi nea ghwaat haleanjeeda geanda, nea gurooroadaanyi gayghwasit neajeeda ghaydit. Ak gaygwasin gidagasa, ak gabiikta ng'eanyiidaanyi.

²⁹ “Iihita damanda hit gaygabiikta ea ghwahita ng'eanyiida mida wiilooda ng'eanyiida biyeara; ak damani ea maygawuurji gidaghayi uurji bea mwadi.

³⁰ Aba gideaba gayghwahidu maleambajeega Rumi gang'uchi niny, ak gayghabeal ak goosiipta, ak gayghwayam geaw ak gang'ula fugiga heawa neajeeda ghaydidiin.

³¹ Ak gayghwahidu shirikareadaanyi ak ghabwara ririnnyeanda gheeda sibata ASEETA ghaydit, nea gageanda haleanjeeda siyeada ghadooweeda sighwarda. Ak gayghamiinaada gidamuy eatu nyariida.

³² Gayghaghurghura milmilanda fugiga datas neajeedean; nea fuga nal ASEETA nyaawa gayghamiinaada nea majeekcheewi nea gang'uchi.

³³ Nea fuga weaghoodi aba jeeda buuneeda gayghwanung' ghwanal fuga saang'a, earapeadi jea eabwara mwaatkwa ng'uta, nea geaghwarda, ak geerada nea geareat haleanjeeda.

³⁴ Damanda sibwara fuga ASEETA, gayghwanyas weedi mwanang'. Ak gaygooguuyi geat fuga saang'a saawa aba milmilanda;

³⁵ iidu fuga mwaatkwa weaghoodi gaygameewa, ak geehuun nea geamiidu ak geanung' gaweeriidi, ea ghwahita muudeanooda damanda, aba gideaba miighwahita damanda hit.

³⁶ “Ak gwasin sugoocheanda gidagasa; ak gayghaghwar geaw nea goodiing'u geaw ea gwaneawna aseecheeka, ak gaygabalool ng'asheega munyas aba badayda ASEETA aseecheeka; Gaygamnyeen ea ghwahidu nyarasta ASEETA; aba gideaba gidasibada gajeesin.

³⁷ Mayghamwas aseecheeka ghayi bea ghweanigaaschi, ghana dea bwariiy gadeemga; ak ea mayghabwat aseeta wassean, aba gideaba gaygoodiing'na geaw suh seaniin.

³⁸ Gaygwasissa mureeda aseeta was ghamarda mawoosa suh; aseeta mwanala ghweanigaaschi ak gaygwasissa mureeda ak ghoadaw dahaabu ea lapiya, ea lagheanga hees sheayeat ea haleanjeeda hees sheayeat bea mugeayda.

³⁹ Gaygafur gealga majeekcheewi nea gaweechi aseecheeka eemoojiga; nea fugiga mwas ninyiin gaygoodiing'u ak gwasissa mureeda. Ak gayghwanung' ghoah fuga jea goombal fuga saang'a ak ghwalajaada ng'eanyiida ak ghoadaw.

⁴⁰ “Hean hita damanda huuydean gayghang'eat sugoocheanda mida wiilooda ng'eanyiida biyeara ak gang'uchi sea niny; ak gayghafwaja badaydaanyi sugoocheanda mida wiilooda ng'eanyiida ghayeawa nea ghabeada shaarara, nea ghwaat mutukwajeega ea faraasajeega, ea maleambajeega saang'a; ak gaygawa jeesinga ng'eanyoojiga ea ghoanyiit guldeayda beega ea ghang'ata.

⁴¹ Gayghoan jeeda ng'eanyiida ghaambiidaat. Ak ghabwar fuga nyiit sagalamnyooji damanamughuush niba damanamughuush, nea ng'eanyoojisu gajeegeandeawa geatindaanyi: Edomu ea Moabu ea fuga mwaatkwa siipuut bea Amoni.

⁴² Gayghoadoabiiw geatindaanyi gang'uchi darooraka, ak eara ng'eanyiida Misri ghanyea maygaboos.

⁴³ Gayghoah siida jea goombal haleanjeeda siitiing'da was dahaabu ea shiliingajeega ea haleanjeeda haw sheayeat bea Misri; ak gaygang'uchi Libya ea Gushi ak ghwaat geeshta.

⁴⁴ Nea iita leabu heeda ghayeawa ea wiilooda ng'eanyiida ghayeawa gayghoabeal niny, ak gaygawa mwadi gang'uchi nea nyareasaat muuchi ak ghabwar fuga saang'a.

⁴⁵ Ak gayghamiinaada maheemajeagaaschi hees bea sugoocheanduumeeda dageascheeda basooda ea giijeeda ghaambiidaat ghaydit; ak gayghami, nea manda siida jea ghaweat.