DANIELI 10 - Bibliyeeda Ghaydit

Giirgweatka Danieli aba ghuuta ghealooda Digrisi

¹ Aba gweaydeaba samwagu bea sugoocheanduumeeda Dariyo was sugoocheanda Ajemi geehiimsa Danieli ng'asheanda, was siida ghayi siguura Belteshasa. Nea ng'asheanda gaba huumwa, ak ea jaliida hawi. Ak ghwanal ng'asheanda ak gwarugu gidawas giirgweatka.

² Aba askwearjoojigiga, abeeda aniini Danieli geagiisanyi wiikaji samwagu.

³ Ak ea mwayaagi hamita miy, mwayaagi banyeega ghana difaayi mii gwasik ghuuteanyu, ak ea mwang'wa dayeershi earahay, aba wiikaji samwagu.

⁴ Hita eaweeteaba diktam ea ang'wan bea sheeda madeeda, damanda eamiinaadawi aba mareeta eenda haw, was Digrisi,

⁵ geagatkachi gheanyangeasu ak ghaang'weardi, ak geang'ulayi, siida akwa hang'weaka eashish, nea geerada manandaanyi ghealooda sisna dahaabu bea ng'eanyiida Ufasi.

⁶ Saseadaanyi ghoameang'daayda booshcheanda, nea gheamamdaanyi gawuurji dadamandeeda, gheanyangaaschi gawuurji gheaboonyanga yeat, geatingaaschi ea geeshangaaschi ghoameang'daayda lagheaneeda oomng'i sisiy, nea nyeashta ng'asheagaaschi ghwanyaashta nyeashta fuga saang'a.

⁷ Ak geakghusan aniini Danieli nea gabwageaw dea daah giirgweatka, nea fuga eandeawi ea mwadaaha giirgweatka, hean ghang'ut muuwda muuchi ak gamng'aw ak gaweay ghafuy geat.

⁸ Ak geanung'wanaan heeda nea gabwageaw ak ghaadaayi Giirgweatsu heesiin, hean gooshealanean uurda; ak ghwayamwa gheamamdeanyu, ak ea meapuunaan uurda.

⁹ Ng'ata ghayiinyi ghuuta ng'asheagaaschi; hean aayiinyi ghuuta ng'asheagaaschi, ghaabeadi ak ghaabwadi jih ng'eanyi ak gealili nea ghaang'udi gheamamdeanyu ng'eanyi.

¹⁰ Ak ging'ulayi, ghoang'waanyan geatinda ak ghwanung' ghaboadan geatingeasu ea gutung'weakeasu.

¹¹ Ak gwayeeshiinean, “Ea Danieli, siida sibwariiy muuchi, ang'waanya muuchi ng'asheega earukuneey, ak gimiinaadi, aba gideaba aniini geecheaknean headaang'u.” Damanda abaloolanean, ghaang'eachi nea ghaabwaadanyi.

¹² Hean gwayeeshiinean, “Adibeali Danieli, aba gideaba ghang'eada eaweeda ghayi bea madeeda inung' ghwanal fughareadaang'u ng'asheega ak gumwasi aada geaw ng'eanyi aba madeeda ASEETA, ea siyiiy ng'asheagaagu ak ghaawunyi aba badayda ng'asheagaagu.

¹³ Nea siida jea ghoah sugoocheanda Ajemi geang'ucheewi eawooji diktam ea agi; ng'ata ghwahidu Mikaeleeda was malaykajeanji haw, aba jeeda malaykajeega ak ghaweadan, ak geanung'usi niny aba hoowa sea siida haw bea sugoocheanduumeeda Ajemi.

¹⁴ Ak ghwaan ghwanung' nala gichea gwahisa buuneadaang'u askwearjoojiga jea ghwahidu. Aba gideaba giirgweatsu gaba askwearjoojiga jea ghwahidu.”

¹⁵ Damanda abaloolanean ng'asheesu, geabunyi uhuudeanyu deageal ng'eanyi ak ghwaroat ghuuteanyu.

¹⁶ Ak ging'ulayi, siyagi uurji sea orjooga buuneeda ak ghawaas ghuuteanyu; ak ghaajaachi ghuuteanyu ak geabalooli. Ak geayeeshi niny was siida miinaada aba madeedeanyu, “Ea ng'utamiideanyu, giirgweatsu gwasawanan ak ghwanung' dang'arng'ariit ak gooshealanean uurda.

¹⁷ Gayghoamuustaan siida gadiyeeda bea ng'utamiideanyu goobalool ng'utamiideanyu? Aba gideaba mutandeawa uurda, ak ea mudugwanda jeedeanyu giisiimeanda.”

¹⁸ Hean gabiikta gicha siida uurji siida ak ghawaasan ak ghaanyaschi uurda.

¹⁹ Ak gwayi, “Ea orjeeda siida sibwariiy muuchi, adibeali, gagasa beaha hoyyoo; majeegiida ak gidaruusiidi muuchi.” Hean abaloolan, ghaanyaschi uurda ak geayi, “Nung'waada gabalool ng'utamiideanyu, aba gideaba niimajeegan.”

²⁰ Ng'ata gwayi, “Ginali ang'iing'i gideanean headaang'u. Asi ghamneawa gaydayam geaw dang'uchi fuga hees bea Ajemi; amang'ata hiji sea niny, guwi gayghwahidu siida haw bea Yunani.

²¹ Ak gaydarukuneey gidasung'oar aba jeeda gitaabooda huumeanda: manda eara siyagi eaweecheewi aba ng'ucheeda sea fiisu geaghus Mikaeli, was malaykajeandaang'u.