AYUBU 3 - Bibliyeeda GhayditAyubu gooniiksa ASEETA 1 Hean iing'ata ghwajaat ghuutaanyi Ayubu ak ghamwaashta eaweeda ghayi sijiila. 2 Ak gwayi Ayubu: 3 “Gagasa eamwaashta eaweeda ghayi sijiilanean, ea eaweeda ghayi iyeeni ‘sirat baleanda was baleanda’. 4 Eaweedida gagasa gamisaniit, ak gagasa ea masina gil ASEETA aba humng'eeda, ak ea mooboong'na weeshinda. 5 Gidabal gwadukuta misaneeda, ak ghoah daanyi misaneeda haw, nea goobiida uhuudaanyi shamooghuutka, nea goomuuw misaneedeaba askweari. 6 Eaweedida gagasa ghoang'waay misaneeda haw ak ea mahoosasiina eawoojiga jeeda gweayda. Nea meayiina jeeda mooneeda sheega. 7 Asi eaweedida gagasa ghoah soonooda, nea adagwarina jeadaanyi hooseaneega. 8 Ak gagasa eamwaashta giika mooriida askweariin. Giika jea ghwaheat diyeaydida siguura Hagiireeda hawiin. 9 Ak ea damisaniidi miingaaschi bea muchuunooda, nea gagasa weeshinda ak ea mwanyasa, ak ea mwadaaha weeshinda muchuunooda. 10 Aba gideaba eaweedida mii adeala jeata iya. Nea mii funya ea mwaadaahi sawanadeeda. 11 “Ghwasaan anda mwameawi damanda sijiilanean? Ak ghaaroachi damanda sijiilanean 12 Ghwasaan anda gookaran iya? Ak ghwasaan anda geareerji gidinga? 13 Aba gideaba gwachi gajeasupnyan ak geayi saw, gwachi gajea siiluulan ak geafuufchi. 14 Sea sugoodiga ea fuga ambaliischi bea ng'eanyiida, ghayi biikta gwasin eemeega nyaawa. 15 Ghana sea fuga hees mideawa dahaabu, ghayi anyiit lapiya gealga nyaawa. 16 Ghana gawuurji bunyita jeata siji nea geehoosu, gwachi maydanda dawuurji ghameeka mii ghwadaah weeshinda. 17 Aba hoowa fuga munyas maygoodeawiit buuneeda, ak eara gea nibur gaygafuuf. 18 Aba hoowa fuga mida ghealooniga gwanda jeeda miyeenooda sean, ak ea meayiinya ghuuta siida miineadaysa. 19 Fuga hees ea gea manang'i gwanda hoowa, siida soomjeanda gaygoobal geaw aba heeda siidaanyi haw. 20 “Ghwasaan iijea eataw weeshinda dea mida jeeda sawanadeeda, ea gea sawana gurooruunatka eataw eaweega. 21 Siida gasa miyeeda ak ea mwami, ak gagasa miyeeda ea ghang'al gida siitiiw funyaat. 22 Ak gahoosan muuchi, nea gang'weela inyeesa iidaah bung'eeda. 23 Ghwasaan iijea eataw weeshinda siida sidukuta naweadaanyi, dea niineaweesa ASEETA hilgweanda. 24 Aba gideaba sawanadeedeanyu ghwahitaayda gil hamita gil, nea giimuumdeanyu gawuurji beega weay. 25 Gidida awali niibisean nea dea ng'uteewean muuwdean ea naanyaschi. 26 Aniini meandeawani miyeenooda, nea mwaapti ng'eanyi nea meafuufi, ak ghwahidu sawanadeeda.” |
The Bible in Datooga © Bible Society of Tanzania, 2015.
Bible Society of Tanzania