AMOSI 7 - Bibliyeeda Ghaydit

Giirgweatiisiinda deashamga

¹ Suh ng'asheega ahiimnean NG'UTAMIIDA was ASEETA gil: ng'ula, gwasin deashamga damanda duu ghaftu seenga doomeelda ng'ula abeeda seenga damanda doomeelda gil iing'ata lajooda booga sugoocheanda.

² Iidu nea niihiit deashamga agita nyeega badayda ng'eanyiida, hean geayeenyi, “Ea NG'UTAMIIDA was ASEETA, geamuscheey samsiina! Yakobo gayghamiinaadaydaan? aba gideaba aamwanang'!”

³ Ak ghwanung'waada NG'UTAMIIDA ng'asheanji; “Ng'asheanji maygwasa,” gwarugu NG'UTAMIIDA.

Giirgweatiisiinda beasta

⁴ Suh ng'asheega ahiimnaan Ng'utamiida was ASEETA gil: ng'ula, Ng'utamiida was ASEETA gaguurda goorgweach aba beasta, ak ghwaak eara ng'eanyoojiga hees sheagi jih, ak ghwaak eara ng'eanyiida.

⁵ Hean geayeenyi, “Ea Ng'utamiida was ASEETA, geamuscheey nung'waada! Yakobo gayghamiinaadaydaan? Aba gideaba aamwanang'!”

⁶ Ak ghwanung'waada NG'UTAMIIDA ng'asheanji; “Ak eara ng'asheanji ea maygwasa,” gwarugu Ng'utamiida was ASEETA.

Giihiimnooda gidasiiteeniida

⁷ Ak ghoahiimnaan: ng'ula ghamiinaada Ng'utamiida aba murdeeda ghamarda nea ghwadeakta gidasiiteeniida, abeeda gidasiiteeniida gwanda geatindaanyi.

⁸ Ak gwayeeshiinean NG'UTAMIIDA, “Amosi, gidaahi naaha?” Ak geayeeshi, “Ghaadaayi gidasiiteeniida.” Hean gwayi NG'UTAMIIDA, “Ng'ula, gaydayiin gidasiiteeniida bugusta fugeasu was Israeli; ak ea maygudu gabiikta dasuut saawa;

⁹ nea heeda meaji gwadiyeada bea Isaka gayghwanyas salgheang'da, ak heeda ghaydit bea Israeli gajeadatas, ak gaydang'eat dang'uchi gheeh Yeroboamu aba ng'uta.”

Amosi sea Amasiya

¹⁰ Hean ghoadayda iita Amasiyaheeda was ashoohoocheanda Beteli, ghoadaw sugoocheanda Israeli Yeroboamu nea gwayeesha, “Ning'useey Amosi foolayda aba bugusta fuga Israeli; ak ng'eanyiida ea mayghoamu ghamilikghta ng'asheagaaschi sean.

¹¹ Aba gideaba gwayi Amosi, ‘Yeroboamu gayghami aba ng'uta, ak fuga Israeli gaygaweay soomjeandumeeda ghwanung'wa heeda ng'eanyiida nyaawa.’”

¹² Ak gwayeesha Amasiya Amosi, “Ea orjeeda siida deaha ng'asheega mang'awsiina ng'eanyiida Yuda ak giyaagi mukaate aba hoowa, nea giramwaari ng'asheega aba hoowa;

¹³ nea adagudibiikti ramoorana aba Beteli, aba gideaba heeda ghaydit bea sugoocheanda, ak ea gheeda sibata ASEETA bea sugoocheanduumeeda.”

¹⁴ Hean ghwasha Amosi ak gwayeesha Amasiya, “Aniini meawoosi sibaneeda nea meawoosi orjeeda sibaneeda; aniini geawooschi jeagiischoocheanda dugwa, nea geafurayi meaghayga,

¹⁵ ak gaguurnean NG'UTAMIIDA aba geeshta hawanda nooga, ak gwayeeshiinean NG'UTAMIIDA, ‘Una, ramoorasiina fugeasu was Israeli.’

¹⁶ “Asi aleeysiiniit ng'asheanda NG'UTAMIIDA. Aba gideaba ang'iing'i giyeeni, ‘Adiramoorsi badayda Israeli, ak ea adirukwiidi ng'asheega munyas aba badayda gheeh Isaka.’

¹⁷ Aba gideaba gwayi NG'UTAMIIDA: ‘Gatmoadaang'u gaygwahiseada aba jeeda mujiini, nea orjoagaagu ea haweagaagu gayghoabeada aba ng'uta, ak ng'eanyiidaang'u gajeelaja aba mareamarooda; nea ang'iing'i gaymeewsiina ng'eanyiida ririnnyeanda, ak fuga Israeli gajeesheagiida ng'eanyiidaanyi eayaat soomjeandumeeda.’”