AMOSI 4 - Bibliyeeda Ghaydit

¹ “Olleeysiiniit ng'asheanji, agoogeeni was dugwa Bashaniin, oondi uhuuda giijeeda Samariyahiin, agoogeeni ooghabwaschi siida barbariin, nea ghoalasaadi iheenga fuga gasa weeta, eeniisa siyeenatka nyaawa, ‘Ayeani gajealeaha!’

² Niyaak Ng'utamiida was ASEETA habeawooda aba ghaydidandaanyi asi ng'ula gayghwahidu askwearjoojiga badaydaang'u, jea ghoang'waanyeegwa aba sidageeda ghwanaghaang' ak eara dea huuydeananeegwa aba sidageeda ghwanaghaang' silealuuna ghweayeega.

³ Ak gajariteawana heeda sinyarja, nea gaba gatmooni sik seawadeeda mida madeadaanyi; ak gajajaksiina geat jeeda Harmoni,” nih gwarugu NG'UTAMIIDA.

Israeli ghwaray gida siinaal

⁴ “Apkaani Beteli, ak gootiinyi; apkaana Gilgali ak ghoahaachi giidiinyeanda; ayeani lukghumajeegeagwa gilinyoo ea sakteayda, ak gooyeadu haleanjeedeang'wa sisapa geadi bea ghadooweeda aba jeeda gilagi aba jeeda gilatamanamughuush aba gilinyoo ea eawooji samwagu,

⁵ ak ghoataydi lukghumeeda haleanjeeda sisabwa geadi bea badiischooda was gidasimwatawiit, ak goorukwiidi haleanjeeda sisabwa geadi bea jeedeesh oataydi, nea goorukwiidi saawa; aba gideaba gidahaguuweegwa gil sinooda, Ea fuga Israeli!” gwarugu Ng'utamiida was ASEETA.

⁶ “Ak gaydaweadaneegwa hamita aba jeeda mujiinajeegeagwa sean, nea ghwasuunya mukaate aba heedoondi sean, ak ea mii abiikni heedeanyu,” gwarugu NG'UTAMIIDA.

⁷ “Ak ghabwada nih naadealaneegwa roopta hean nea gudughwashoada sheeh samwagu aba lajita booga; gaydanung' gwaroobassa roopta mujiineanagi, ak ghaanung' ea maroobasiina roopta mujiineeda niirja; ghwanyas hijagi roopta, nea heeda mwanyasa roopta ghaghajaamiit;

⁸ hean ghang'eat fuga mujiinaji iyeenya ghana samwagu, ak gaweay gagasa beega leeyda, aba mujiineanagi ak ea madeayi; ak ea mii abiikni heedeanyu,” gwarugu NG'UTAMIIDA.

⁹ “Ak gaydalaseagwa ak ghoanyaschi geayda ng'waan; nea ghaabwari darari madameegeagwa was boosteaneedeang'wa ea madameegeagwa bea sabiibu, ea shaboogheeteang'wa ea saytuunajeegeagwa gaydanung' ghwaak deashamga; ak ea mii abiiksean,” gwarugu NG'UTAMIIDA.

¹⁰ “Ak ea neayeadu bugusteang'wa geeyooda muy uurji deaghayi bea Misri; nea ghaabwarji gheareemangeagwa aba ng'uta; ak ea naayaachi faraasajeegeagwa deasheagiit; ak ghaanung' gaweay shearooda ng'uh bea murearoodeang'wa jeeda sareenuukeagwa; ak ea mii abiikni heedeanyu,” gwarugu NG'UTAMIIDA.

¹¹ “Ea naanung' goosha fiisu ng'ay aba jeedeang'wa, gawuurji gidaghayi nung' ASEETA gooshealda fuga Sodoma ea Gomora, ak gawuurji ghweendooda silealna jeeda beasta; ak ea mii abiikni heedeanyu,” gwarugu NG'UTAMIIDA.

¹² “Asi nih gichea dasimaneey gil, Ea Israeli, aba gideaba gaydasimaneey nih, asi adiing'diing'da geaw roonyeewana ASEATAANG'U, Ea Israeli!”

¹³ Aba gideaba NG'UTAMIIDA deaghayi sin giijeega gil, ak gwasin jeameeda, ak gwarukusa siida gida ateemsheata; ak ghwanung' gamisaniit ng'eanyiida sakteayda, ak ghwala badayda ng'eanyiida heeda geawiit– NG'UTAMIIDA, was ASEETA bea lugooda gheawungaaschi.