AMOSI 3 - Bibliyeeda Ghaydit

¹ Olleeysiiniit ng'asheega rugu NG'UTAMIIDA aba badahuukeagwean, Ea fuga Israeli aba badahuuka fuga sean bea gheeda, ghayi earuuni ng'eanyiida Misri:

² “Fuga aanali agooga gil ak ghwahit aba jeeda buuneesean mida badayda ng'eanyiida; asi gaydaaganeagwa ghoorjooda aba giidiinyeanyeekeagwa sean.

Gadiyeeda sibaneeda

³ “Fih iyeenya gayghoamu gaygoodeay meakghusa ea nineaji?

⁴ Heapi ng'adiida iissa ghoahaawda aba dareabeeta nea mwaaga gili? Heapi dayeenda ng'adiida gaygooyeawda aba heeda abiita nea mii ghwanyas gili?

⁵ Heapi darideanda gaygoobisa jeeda ghuduumbwaada aba badayda ng'eanyiida, nea manda gidaghasi? Heapi ghuduumbwaada maygootkwealsa badayda ng'eanyiida, nea mii ghoang'waay gili?

⁶ Gajeaghuut durumbeati aba mujiini, ak ea mabeala buuneeda? Mujiini gayghwanyas gidamuy, meakghusa gwasin NG'UTAMIIDA?

⁷ Aba huumwa Ng'utamiida was ASEETA maygwasin gil nea mii goodaheachsa makcheameadaanyi fugaaschi bea gadiyeeda was sibangaaschi.

⁸ Ninya ghuuta ng'adiida; mayghabeal ng'eaha? Gabalool Ng'utamiida was ASEETA; ghoamu ng'eaha geaghus ghwaramoarani?”

Giishealda fuga Samariya

⁹ Arukwiida aba gealga bea Ashuru, ea aba gealga ng'eanyiida Misri, nea giyeeni, “Abwada geat aba iheenga giijeega Samariya, ak ghoadaayi deawiitmeeda haw mida jeedida, ea ghabasta mida bugusta nyaawa.”

¹⁰ “Ak ea mwanala sinooda ng'asheega doobiiweadi,” gwarugu NG'UTAMIIDA: “fugiga adiiwi ng'asheega munyasiin ea giireeta haleanjeeda buuneeda aba jeeda gealga nyaawa.”

¹¹ Asi gwayi NG'UTAMIIDA was ASEETA: “Gaygwaneaweesa ng'eanyiida weajoocheanda, ak gayghwanung' ng'eanyi uurdaang'u, ak gajeegeanda gealgeagwa.”

¹² Asi gwayi NG'UTAMIIDA: “Gaygawuurji gidayeawiida jeagiischoocheanda geeshan iyeenya, ghana muulaneanagi bea iita, hean ea gichea eayaawda fuga Israeli mida Samariya gil, sea gea mida badayda bulaliida mida hang'weaka miyaas.”

¹³ “Oaleaydiit, ak goomuuwu ng'asheega gheeh Yakobo,” gwarugu Ng'utamiida was ASEETA, ASEETA hoauur bea lugooda,

¹⁴ “ak eaweedida gaydaaga ghoorjooda fuga Israeli aba giidiinyeanyeeka nyaawa, gaydaaga ghoorjooda heeda wagoojiga aba Beteli, gajealach gujaka heeda wagiida ak goobitpisa ng'eanyi.

¹⁵ Ak gaydanyarja gealga sisin bea gooroogeeda, ea gealga sisin aba damanda daknooda, ea gealga sisna gujaka beeshta gaygwanyara, ak gealga hees gaygwanyara,” gwarugu NG'UTAMIIDA.