AMOSI 2 - Bibliyeeda Ghaydit

Moabu

¹ Asi gwayi NG'UTAMIIDA: “Fuga Moabu nisin riing'eeda gicha, ak aba sareani gaydalas saawa; aba gideaba ghaghwarda geaka sugoocheanda Edomu.

² Ak gaydanung' gawa beasta badayda Moabu, ak ghwaak gealga Geriyoti, ak gayghami Moabu aba nyeashta, ea giijuureanda ea ghuuta durumbeati:

³ Ak gaydabwar fuga ambaliischi mida bugusta, nea geanuuschi fugaaschi hees sea niny,” gwarugu NG'UTAMIIDA.

Yuda

⁴ Asi gwayi NG'UTAMIIDA: “Fuga Yuda nisin riing'eeda gicha, ak aba sareani gaydalas saawa; aba gideaba geaheawa deaweedeeda NG'UTAMIIDA, nea meang'waanya diigheanyeekaaschi, ak ea ninung' ng'uyeega nyaawa ghwaramwas saawa, gidaghayi sin ghweaniga nyaawa.

⁵ Ak gaydanung' gawa beasta badayda Yuda, ak gayghwaak gealga Yerusalemu.”

Ghoorjooda ASEETA aba heeda fuga Israeli

⁶ Asi gwayi NG'UTAMIIDA: “Fuga Israeli nisin riing'eeda gicha, ak aba sareani gaydalas saawa; aba gideaba nishaayda doobiiwnata aba lapiya, nea fuga barbari geeshaaydaawa geeka–

⁷ inyeesa geapuuta uhuuda siida bwarbwar jeeda birjeanda badayda ng'eanyiida, nea geayam geat eegal naweeda mwadoabiiwa, nea inyeesa siida ea ghwaan gaweay hichpa gatmoanagi sina gadiyeeda, ak aba sareani geadatas gheawungeasu ghaydit;

⁸ nea iissa geela murdajeega hiji was wagiida aba badayda hang'weaka ghayi mida raduutka; ea jeeda gheeda ASEETA nyaawa, nea geali difaayeeda fuga siyaaga ghoorjooda.

⁹ “Ak ghaanung' goosha fuga Amori aba madeanyaawa, ayang'da geawundaanyi dea gubooyeeka, nea gwandeawa uurda majeekta dea saboojiga; ak gaydanung' goosha haghweagaaschi aba uhuuda, ea hawungaaschi aba ng'eanyi.

¹⁰ Ak geascheeng'neegwa aba ng'eanyiida Misri, ak geawi madeedeang'wa gweanyeew haradam aba jeeda dareapcheeda, ak goombali ng'eanyiida fuga Amori.

¹¹ Ak gaydageanu orjusu ng'ay aba jeedeang'wa ghoah sibanga, ea gheareemang'su ng'ay aba jeedeang'wa ghoah fuga adeaga geat ASEETA. Heapi nih huumwa, Ea fuga Israeli?” Asi gwayi NG'UTAMIIDA.

¹² “Ak ghoanung' ghwali fuga difaayi fuga sacha geat ng'asheega munyas, nea gwarukusa sibanga ak gwayeesha, ‘Adoorukuti ramooranga.’

¹³ “Ang'ula, gaydadiing'seegwa ng'eanyi aba heeda oondi, gawuurji mutukooda nyiit sareenda booga ea gwadiing'sa ng'eanyi.

¹⁴ Fuga ng'weeni mayghaghu iisalda, ak eara dea mideawa uurda mayghoahaat uurdaanyi, nea eara muraneeda mayghoaghu eaweagaaschi;

¹⁵ nea siida mideawa ghuweang'da ea mayghamiinaada, nea siida asasi geeshan ea mayghoaghu geaw, ak eara dea ding'da faraasi ea mayghoaghu eaweagaaschi;

¹⁶ ak eara dea hang'waay gurooru aba jeeda muranga, askweardida gayghafwach nea dawiish,” Asi gwayi NG'UTAMIIDA.