2 SAMWELI 9 - Bibliyeeda Ghaydit

Dawdi sea Mefibosheti

¹ Hean gwayi Dawdi, “Gudugwanda siida abit aba jeeda gheeh Sawli, jea deahiimsa alooheeda leabu heeda Yonatan?”

² Abeeda gwanda siyagi bea gadiyeeda bea gheeh Sawli siguura gheawungaaschi Siba, ak geeguursa ghwaan heeda Dawdi; ak gwayeesha sugoocheanda niny, “Ang'iing'i guwoosi Sibahi?” Ghwalamda ak gwayeesha, “Siidaang'u bea gadiyeeda nihi.”

³ Gwayeesha sugoocheanda, “Manda eara siyagi bea gheeh Saulihi, jea deahiimsa niny inyeanda jeeda ghayi earukusi ASEETA gideaba gaydasin?” Hean gwayeesha Siba sugoocheanda, “Gwanda orjeeda Yonatan; nea gaba geeshta badeeda.”

⁴ Ghwalamda sugoocheanda ak gwayeesha niny, “Niny gwanda yeenu?” Ghwalamda Siba ak gwayeesha sugoocheanda, “Nukwa gheeh Makiri orjeeda Amieli, mida Lodebari.”

⁵ Ng'ata goojeakta sugoocheanda was Dawdi buuneeda ak geeyeana gheeh Makiri orjeeda Amieli, mida Lodebari.

⁶ Nea Mefibosheti orjeeda Yonatan, was orjeeda Sawli ghwahidu heeda Dawdi, ak ghoabeada ak ghabwada jih ng'eanyi ak gamus aba mureeda. Ak ghwalamda Dawdi ak gwayeesha, “Mefibosheti!” Ak ghwasha nea gwayeesha, “Ng'ula siidaang'u bea gadiyeeda.”

⁷ Hean gwayeesha Dawdi niny, “Adibeali, aba gideaba gaydaahiimneey inyeanda jeeda aba badayda gweanu was Yonatan, ak gaydeadeelneey ng'eanyiisean ghayi bea Sawliheeda was gweanu; ak gajagiisacheena aba measeedeanyu galeaga sean.”

⁸ Ng'ata gwasissa mureeda, ak gwayeesha, “Siidaang'u bea gadiyeeda naaha ea eeyi bwak ea gayng'ula gudeeda nimi uurjeewean?”

⁹ Hean gaguursa sugoocheanda Siba, was siida gadiyeeda Sawli, ak gwayeesha, “Haleanjeeda sean bea Sawli ea haleanjeeda sean bea gheanyi naadawji orjeeda siidaang'u haw.

¹⁰ Nea ang'iing'i sea orjoagaaschi sea fugaaschi bea gadiyeeda gaygabarsa ng'eanyi niny, ak gaygweadu booga nyas, ak abeeda ghwanyas orjeeda siidaang'u haw mukaateeyda jea ghwaak; nea Mefibosheti was orjeeda siidaang'u haw gaygweagiischeewa galeaga sean badayda measeedeanyu.” Abeeda Siba gwandeawa orju damanamuut ea fih diktam bea gadiyeeda.

¹¹ Ng'ata gwayeesha Siba sugoocheanda, “Aba iita ng'asheega sean ghayi rukusa ng'utamiideanyu was sugoocheanda siidaanyi bea gadiyeeda, gaygwasin siidaang'u bea gadiyeeda.” Ak gweagiischeewa Mefibosheti aba uhuuda measeeda Dawdi, nea gawuurji orjeanagi aba jeeda orjooga sugoocheanda.

¹² Abeeda Mefibosheti gwandeawa gheareemaneeda siguura gheawungaaschi Mika. Ak buuneesean mida gheeh Siba ghoah fuga gadiyeeda Mefibosheti.

¹³ Ak goobiida Mefibosheti Yerusalemu; aba gideaba gweagiisacheewa galeaga sean uhuuda measeeda sugoocheanda. Ak gaba badeeda aba geeshanga sean.