2 SAMWELI 8 - Bibliyeeda Ghaydit

Jooriischooda lugooda Dawdi

¹ Iimuchu nea ghang'ata ng'asheesu ghabwar Dawdi fuga Filisti ak ghwajoar, ak gageanda Dawdi Metagama aba geatinga fuga Filisti.

² Ak ghwajoar Moabu, ak goodeena saawa ghealooda nea nibwada jeesinga ng'eanyi, ak goodeen ghealooni iyeenya jea ghwanung' gameewa, ea ghealoanagi mughuush jea eapuut.

³ Ak eara Dawdi ghwajoar Hadadeseri was orjeeda Rehobu, sugoocheanda Soba, damanda beewa ghwanyasa gicha uurda aba eenda Furati.

⁴ Ghoareat Dawdi niny fih sagalama ea bughalaji ispwa ding'da faraasajeega, ea shirikaraji sagalamnyooji diktam badiina geeshanga; ak ghwalajaada Dawdi geeshanga faraasajeega sean angiir mutukwajeega, ak ghoabuut faraasaji bughala deay aba giingiir mutukwajeega.

⁵ Iimuchu nea ghwahidu fuga Shaamuyda Dameski ghaweat Hadadeseri was sugoocheanda Soba, ghabwar Dawdi fih sagalamnyooji diktam ea iyeenya bea Shaamu.

⁶ Ak ghwayiin Dawdi heeda jea eeratiisa buuneeda Shamooda Dameski; ak ghoah fuga Shaamu fuga gadiyeeda Dawdi nea gweadu haleanjeeda guskuseega. Ak ghoadaw NG'UTAMIIDA Dawdi jooriischooda aba hiji weah sean.

⁷ Ak gageanu Dawdi igeambooniga dahaabu ghayi eada fuga gadiyeeda Hadadeseri, ak gweadu Yerusalemu.

⁸ Nea gidang'eada Beta ea Berotayi was mujiinajeega was sugoocheanda siguura Hadadeseri, gageanda sugoocheanda was Dawdi lagheanga saang'a oomng'i.

⁹ Iimuchu gwayiing'shi Doyi sugoocheanda Hamati gideaba nijoar Dawdi lugooda sean bea Hadadeseri,

¹⁰ hean goojeakta Doyi orjeedaanyi siguura Yoram gaweesa sugoocheanda siguura Dawdi, googeachi niny, nea gagwarsa nea gwayeesha gisini gidahit gideaba ging'ucheewi Hadadeseri ak gijoari; aba gideaba iimiisean gang'uchi Hadadeseri sea Doyi. Ak gweadu Yoram haleanjeeda lapiya, ea dahaabu, ea gea lagheanga oomng'i;

¹¹ ak eara suh ghoadaw sugoocheanda was Dawdi NG'UTAMIIDA, sea lapiya ea dahaabooda ghayi adayda leabu eemoojiga sean ghayi joar,

¹² gea leabu Edomu, ea Moabu, ea Amoni, ea Filisti, ea Amaleki ea gea was haleanjeeda siyeasa Hadadeseri orjeeda Rehobu, was sugoocheanda Soba.

¹³ Ak ghwanung' Dawdi gageawiit gheawungaaschi. Iimuchu nea gabiigu, ghabwar fih sagalamnyooji damasis bea Edomu aba mwangoachiyda Balang'da.

¹⁴ Ak gwasin heeda jea ghoah museasajeega lugweega aba jeeda ng'eanyiida Edomu; ak gwasissa jeeda ng'eanyiisean bea Edomu museasajeega lugweega, ak ghoah buuneesean bea Edomu fuga gadiyeeda Dawdi. Ak ghoadaw NG'UTAMIIDA Dawdi jooriischooda aba hiji weah sean.

¹⁵ Ak goombal Dawdi Israeleesean; ak gwasissa Dawdi ng'asheega doobiiweadi nea ghwanung' gooyang'deay buuneesean.

¹⁶ Abeeda Yoabu orjeeda Seruya goombal lugooda; nea Yehoshafati orjeeda Ahiludi ea siida ng'oora askwearjoojiga;

¹⁷ nea Sadoki orjeeda Ahitubu sea Ahimeleki orjeeda Abiyatari ea ashoohoodiga; ea Seraya ea siida ng'oorshachi,

¹⁸ nea Benaya orjeeda Yehoyada goombal fuga Gereti ea fuga Beleti; nea orjooga Dawdi ea ashoohoodiga.