2 SAMWELI 7 - Bibliyeeda Ghaydit

Giijasta Natani weesa Dawdi

¹ Hean damanda abiideewa sugoocheanda jeedeaba gheanyi, nea niidaw NG'UTAMIIDA fuufeanda aba heeda weajoodigaaschi sean neaweesa,

² ghwalamda sugoocheanda ak gwayeesha Nataneeda was sibaneeda, “Asi ghamneawa ng'ula, aniini geandi jeeda gheeda gubooyeeka, nea sandakwajeanda neajeeda bea NG'UTAMIIDA goobiita jeeda maheemajeanda.”

³ Ak gwayeesha Natani sugoocheanda, “Una, ak gisini ng'asheesu sean mida jeeda gurooroadaang'u; aba gideaba NG'UTAMIIDA gindeawi.”

⁴ Hean eaweedida ghwahidu ng'asheanda NG'UTAMIIDA heeda Natani ak gwayeesha,

⁵ “Una ak giyeeshi siideanyu bea gadiyeeda was Dawdi gideaba, ‘Gwayi NG'UTAMIIDA: Ang'iing'i gaydeeknean gheeda jea deabiida?

⁶ Aniini mii deabiida jeeda gheeda ghang'eada damanda earuuni fuga Israeli jeeda ng'eanyiida Misri ea ghoah askweareani, amadu geabiiti jeeda maheemajeanda ghoah giibindeanyu.

⁷ Nea aba ng'eanyoojiga sean ea neayeewi sea buuneesean bea Israeli, neada ea nearukusi siida ng'asheanda aba jeeda fuga wassean laja girgweageeda bea Israeli, was dea earukusi haghweadoodigeasu bea gisilga was fugeasu bea Israeli, nea geayeeshi, “Ghwasaan inyas ea mideeknean gheeda gubooyeeka?”’

⁸ Asi ghamneawa eeshiina siideanyu bea gadiyeeda was Dawdi, ‘Asi gwayi NG'UTAMIIDA bea lugweega, geajeananeey jeeda ghooriida gisilga, ak gihuuwi sugoocheanda jea ghoahaaghwa fugeasu bea Israeli;

⁹ ak ea sindeayi aba hiji wassean uwi, ak ea neaheeleeweey weajoodigaagu sean ghang'amwa madeadaang'u; ak gaydanung' gwaheedu gheawungaagu, gawuurji gheawunga fuga hees bea ng'eanyiida.

¹⁰ Ak gaydaloat heeda jea goobiida fugeasu was Israeli, ak gaydang'aapta saawa, ak goobiida jeeda ng'eanyiida nyaawa, ak ea maygudeeneayi; nea fuga bwariiy jaliida ea maygudu ghwasat saawa gicha,

¹¹ gawuurji gidaghayi bea mwadi, ghang'eada damanda ghayi aaloadi fuga laja girgweaguutka aba badahuuka fugeasu was Israeli; ak gaydagooneegwa fuufta aba heeda weajoodigeagwa sean. Gabiisa gwayi gicha NG'UTAMIIDA gwayi NG'UTAMIIDA gaydasineey gheeda.

¹² Nea ang'iing'i damanda jea ghwahina damandaang'u ak giluudayeewi ghweanigaagu aba ng'eanyi, gaydeadiing'u jeacheangaagu jea gamaseawneey, was gea jea gwaleabu saseadaang'u, ak gaydeamajeek sugoocheanduumeadaanyi.

¹³ Ak gayghwadeas gheeda aba gheawungeasu, ak gaydasin hoorgeadaanyi damanda manda muudeanooda.

¹⁴ Gaydoaw ghwaan, ak gayghoah orjeedeanyu. Iisin ng'asheega munyas, gaydalas niny aba bileangida buuneesean ea aba gisilasiida buuneeda;

¹⁵ ak ea maydageandeawa bariinyeegeasu bea huumwa headaanyi, gawuurji gidaghayi eageandeaydi aba heeda Sawli, ghayi eageandeawi madeedeang'wa.

¹⁶ Nea gheang'u ea sugoocheanduumeadaang'u gaygamajeegiit damanda manda muudeanooda aba madeedeanyu; nea hoorgeadaang'u gaygamajeegiit damanda manda muudeanooda.’”

¹⁷ Nea aba ng'asheesu seaniin, ea aba ng'asheesu sean sitahaajiin, goobalool Natani Dawdi.

Dawdi ghamwaash ghawooda badiischooda

¹⁸ Ng'ata gawa sugoocheanda was Dawdi ak goopteada aba madeeda NG'UTAMIIDA, ak gwayeesha, “Aniini geawooschi ng'eaha Ea sugoocheanda was ASEETA, ak gheenyu ea naaha gil, bwak ea eanean heeda sheagi ayang'u? sheaktunu?

¹⁹ Nea gicha ng'asheanji ea mwanang' aba madeeda gheanyangaagu, Ea NG'UTAMIIDA was ASEETA; ak gibalooli badayda gheeda siidaang'u bea gadiyeeda aba damanda haw jea ghwahidu, ak ea niihiimnaan seaygoojiga jea ghwahidu, Ea NG'UTAMIIDA was ASEETA!

²⁰ Ak abeeda aniini Dawdi gaygutayeeshiineeyiin ang'iing'i? Aba gideaba ang'iing'i ginali siidaang'u bea gadiyeeda Ea NG'UTAMIIDA was ASEETA!

²¹ Aba badayda heeleesiindaang'u, ea aba gurooroadaang'u, nisini ng'asheesu hees seaniin ak girukusi siidaang'u bea gadiyeeda.

²² Asi ang'iing'i guwoosi haw, Ea NG'UTAMIIDA was ASEETA; aba gideaba manda siida uurjeeweey, ak ea manda ASEETA nuut murdeadaang'u, aba badayda ng'asheega sean siyiinyi aba iidigaasa.

²³ Gwanda aneamwa jeeda ng'eanyiida uurji fugaagu was Israeli ghayi weah ASEETA ak gwalealu ghoah fugaaschi, ak gwasissa geaw gheawunga, nea gwasissa saawa ng'asheega hees ea gea deamdeameadi, ak giiruuteawi madeeda buuneadaanyi eemeeda sea aseecheeka nyaawa?

²⁴ Ak ea niimajeeksi geaw fugaagu bea Israeli ghoah fugaagu damanda manda muudeanooda; nea ang'iing'i Ea NG'UTAMIIDA, ea nihuuwi ASEETA nyaawa.

²⁵ Asi ghamneawa Ea NG'UTAMIIDA was ASEETA, amajeega ng'asheanda ghayi irugu aba badayda siidaang'u bea gadiyeeda ea ghoah damanda manda muudeanooda ea aba badaydeaba gheanyi, ak gisini gidaghayi irugu;

²⁶ ak geakghambiit gheawungaagu damanda manda muudeanooda, ak gwayi, ‘NG'UTAMIIDA bea lugweega niny ASEETA ambal Israeli,’ sea gheeda siidaang'u bea gadiyeeda was Dawdi gajea majeek aba madeadaang'u.

²⁷ Aba gideaba ang'iing'i Ea NG'UTAMIIDA bea lugweega, guwoosi ASEETA Israeli, dea sin giidaheaji aba heeda siidaang'u bea gadiyeeda, nea giyeeni, ‘Gaydadeekneey gheeda’; ak abeeda ghwanyas siidaang'u bea gadiyeeda uurda jea ghamwaasha ASEETA ghawooda aba headaang'u.

²⁸ Asi ghamneawa, Ea NG'UTAMIIDA was ASEETA, ang'iing'i guwoosi ASEETA, nea ng'asheagaagu gaba huumwa, ak ea niheeleesi siidaang'u bea gadiyeeda ng'asheega miyaas;

²⁹ asi ghamneawa gagasa goohoosanyi ng'asheanji ak gibadiischeesi gheeda siidaang'u bea gadiyeeda, ak abeeda goobiida madeadaang'u damanda manda muudeanooda; aba gideaba ang'iing'i, Ea NG'UTAMIIDA was ASEETA, nirugu ng'asheesu, nea aba giidawdaang'u bea ghadooweeda gajeataw gheeda siidaang'u bea gadiyeeda ghawooda damanda manda muudeanooda.”