2 SAMWELI 6 - Bibliyeeda Ghaydit

Sandakwajeanda neajeeda geeyeadu Yerusalemu

¹ Iimuchu ghoawaam Dawdi fuga sean siloat bea Israeli, fih sagalamnyooji diktam ea damanamughuush.

² Ak ghang'eat Dawdi ak gawa nea goodeayi sea buuneessean mideawa leabu Baal-yuda, gweana hoowa sandakwajeanda neajeeda bea ASEETA, siguurriideawa aba gheawunga NG'UTAMIIDA bea lugweega was dea abiita heetiyeadawa geeruubajeega.

³ Ak ghwasar sandakwajeanda neajeeda bea ASEETA aba badayda mutukoodeesh, ak gooruuna jeeda gheeh Abinadabu mida uhuuda heayeeda; nea Usa ea Ahiyo, was orjooga Abinadabu, abeeda ghamwanmwan mutukoodeesh sar sandakwajeanda neajeeda bea ASEETA;

⁴ Ng'ata goosheedeawa Ahiyo sandakwajeanda neajeeda.

⁵ Ak gang'weela Dawdi sea buuneesean bea Israeli aba madeeda NG'UTAMIIDA aba uurjeenga nyaawa sean, nea gwasarmanda gidoondoorajeega ea ginaandajeega ea bundiida ea igeambooniga ea gureayeeka.

⁶ Hean nea ghwahita heeda was bugharjeanda Nakoni, ghoahaakta Usa geatindaanyi ak ghoang'waay sandakwajeanda neajeeda bea ASEETA, aba gideaba gwateemban heewga.

⁷ Ak ghwayeat nyarasta NG'UTAMIIDA aba badayda Usa; ak ghwalas ASEETA niny aba gideaba gooheaksa geatinda sandakwajeanda neajeeda; ak gameewsa murdeeda sandakwajeanda neajeeda bea ASEETA.

⁸ Hean ghwanyareas Dawdi aba gideaba ghwalas NG'UTAMIIDA Usa; ak geeguura gheawungeaba ng'eanyiita Beres-usa ea ghoah ghamneawa.

⁹ Ak ghoawal Dawdi NG'UTAMIIDA eaweedida; ak gwayi, “Gayghwaandaan sandakwajeanda neajeeda bea NG'UTAMIIDA heedeanyu?”

¹⁰ Hean ea magasa Dawdi gweadu sandakwajeanda NG'UTAMIIDA jeeda mujiineeda Dawdi; ak ghoang'aamwa hoowa ak ghwaat gheeh Obed-edomu bea eemeeda Giti.

¹¹ Goobiida sandakwajeanda neajeeda bea NG'UTAMIIDA gheeh Obed-edomu bea eemeeda Giti sheeh samwagu; ak ghoadaw NG'UTAMIIDA ghawooda Obed-edomu ea gheanyi sean.

¹² Muchu geerukusa sugoocheanda siguura Dawdi gideaba, “Niidaw NG'UTAMIIDA ghawooda gheeh Obed-edomu ea haleanjeeda sean mideawa, aba badayda sandakwajeanda neajeeda bea ASEETA.” Hean ghang'eat Dawdi ak gawa ak gweadu sandakwajeanda neajeeda bea ASEETA aba gheeh Obed-edomu ea gweadu mujiineeda Dawdi nea geehoosan;

¹³ iidu nea niweay fuga aat sandakwajeanda neajeeda bea NG'UTAMIIDA ak ghwaloat geeshan lah, ghabwar lukghumeeda heeyda ea meayda riishaat.

¹⁴ Ak ghang'was Dawdi aba madeeda NG'UTAMIIDA aba uurdaanyi sean; ak geekwealsa Dawdi hang'da bumbun siikwealiisa hamarjoojiga.

¹⁵ Ng'ata gweadu Dawdi sea buuneesean bea Israeli sandakwajeanda neajeeda bea NG'UTAMIIDA nea goojuur, ea nyaashta gujaweeda.

¹⁶ Iidu nea ghwahidu sandakwajeanda neajeeda bea NG'UTAMIIDA jeeda mujiineeda Dawdi, ghoang'weardaawa seawadeeda hudeaba Sawli siguura Mikali, ak ghwadaah sugoocheanda was Dawdi gwadeambiiri nea ghang'was aba madeeda NG'UTAMIIDA; ak gafool niny aba jeadaanyi.

¹⁷ Ak gweadu sandakwajeanda neajeeda bea NG'UTAMIIDA, ak ghwayiin heeda eawoojisu abiita, was jeeda maheemajeanda miinda Dawdi sissa sandakwajeanda; ak ghoadayda Dawdi haleanjeeda ghadooweeda sighwarda ea haleanjeeda ghadooweeda bea hoyyoo aba madeeda NG'UTAMIIDA.

¹⁸ Iidu nea niihiit Dawdi giidaydeayda haleanjeeda ghadooweeda sighwarda ea haleanjeeda ghadooweeda bea hoyyoo, ghoadaw buuneeda ghawooda aba gheawunga NG'UTAMIIDA bea lugweega,

¹⁹ ak goodearsa buuneesean, was eemeeda Israeli, sean headiga ea gadeemga, ak gaba siisi siitaw mukaate, ea beashadeeda biyeeyda, ea mukaateeyda sisna sabiibu. Ak ghwadarda buuneesean, ak gaba siisi weah gheanyi.

²⁰ Ak gabiikta Dawdi googeachi gheanyi. Gwardu Mikali was hudeaba Sawli ak ghwaan roonyeeda Dawdi, ak gwayeesha, “Sugoocheanda Israeli ninung' gwaheedu gheawungaaschi askweareani, ak ghoahiimu dawiishnataanyi askweareani aba madeeda gheanyanga haweega fugaaschi bea gadiyeeda, gawuurji siitasha!”

²¹ Hean ghwalamda Dawdi ak gwayeesha Mikali, “Aniini ghaang'waschi nea geasisi NG'UTAMIIDA mureeda, was dea loadan aba hoorgeeda ghweandaang'u ea fugeaba gheanyi sean, ak ghwaloadan doaw sugoocheanda jea ghoahaaghwa Israeli, was fuga NG'UTAMIIDA, ak gaydahoosan aba madeeda NG'UTAMIIDA.

²² Ak gaydahiing'da geaw nea ghwaraanya, ea ayeena meawoosi gil aba madeeda gheanyangeagwa; nea aba heeda haweega irugu, aba heanyaawa gajeesinnean mureeda.”

²³ Nea Mikali was hudeaba Sawli ea mii ghwanyas baleanda ea ghwahita eaweeda miyeadaanyi.