2 SAMWELI 5 - Bibliyeeda Ghaydit

Dawdi ghoah sugoocheanda Israeli ea dea Yuda

¹ Ng'ata ghapka eemoojiga sean bea Israeli heeda Dawdi aba Hebroni, ak gwayeesha, “Ng'ula, aseasa geewooschi geakaagu ea foojeandaang'u.

² Ghayi aba damwan, nea Sawli ea sugoocheanda ahaaghwaneasa gil, ang'iing'i gil dea aruudu fuga Israeli ak ghwanung' ghapka ghoah; ak gwayeeshiineey NG'UTAMIIDA, ‘Gayhuuwa sugoocheanda Israeli.’”

³ Hean ghapka gweargwa sean bea Israeli heeda sugoocheanda aba Hebroni; ak gwasin sugoocheanda was Dawdi neajeeda sea saawa aba Hebroni aba madeeda NG'UTAMIIDA, ak ghoamwaar Dawdi ghoah sugoocheanda ambal Israeli.

⁴ Abeeda Dawdi gaba gweanyeew diktam ea damanamughuush damanda ang'eada gheambalmeeda, ak goombaliischi gweanyeew haradam.

⁵ Aba Hebroni goombal fuga Yuda gweanyeew ispwa ea sheeh lah; ak aba Yerusalemu goombal fuga sean bea Israeli ea fuga Yuda gweanyeew diktam ea damasamwagu.

⁶ Ak gawa sugoocheanda sea fugaaschi Yerusalemu gang'uchi sea fuga Yebusi, was fuga bea ng'eanyiida, ak gwayeesha Dawdi, “Ang'iing'i mwanyuunyi hiji ii migeandani fuga ng'oowi ea fuga badeeda”, nea ghaghay gil, “Dawdi mayghoamu ghwaan hiji.”

⁷ Iidu ghabwar Dawdi fuga Sayuni, was mujiineeda Dawdi.

⁸ Ak gwayi Dawdi eaweedida, “Siida wassean jea ghabwar fuga Yebusi, ea dasiga jeeda shatkweanda beega, ak ghabwar fuga badeeda ea fuga ng'oowi, was gea sit guroorooda Dawdi.” Ak ghoah gideeneewa buuneeda, “Mayghapka fuga ng'oowi ea fuga badeeda jeeda gheeda.”

⁹ Hean goobiida Dawdi jeeda gheeda, ak gaguura mujiineeda Dawdi. Ak ghwadeas Dawdi mujiini nea gwaneaweesa ghang'eada Milo ea meadajeegeaba jih.

¹⁰ Hean gwaheedu Dawdi muuchi aba gideaba gwandeawa NG'UTAMIIDA was ASEETA bea lugweega.

¹¹ Iimuchu goojeakta sugoocheanda siguura Hiramu bea ng'eanyiida Diro giijasoodiga gaweay heeda Dawdi, ak gweasa geediga was guboyeeka, ea fuga beara geediga ea fuga deekshachi jea ghwadeas gheeh Dawdi.

¹² Hean gwajeeng'u Dawdi gideaba ninung' NG'UTAMIIDA ghoah niny sugoocheanda jea goombal Israeli, ea gideaba nighaambiit sugoocheanduumeadaanyi aba badahuuka fugaaschi bea Israeli.

¹³ Ak gweadu Dawdi gwealajeega saang'a ea gadeemga aba Yerusalemu, iing'ata hinnooda leabu Hebroni; ak gwaji Dawdi orjooga saang'a ea haweega.

¹⁴ Ak suh ea gheawungeaba fugiga diibigiga jih niny aba Yerusalemuun: Shaamuwa gil, ea Shobabu, ea Natani, ea Sulemani,

¹⁵ ea Ibhari, ea Elishuwa, ea Nefegi, ea Yafiya,

¹⁶ ea Elishama, ea Eliyada, ea Elifeleti.

Joorda fuga Filisti

¹⁷ Iidu nea ghwayiiy fuga Filisti gideaba simwaar Dawdi ghoah sugoocheanda Israeli, hean gaweay buuneesean bea Filisti gagasa Dawdi; ak ghwayiiy Dawdi, ak gawa Dawdi ghoah.

¹⁸ Hean ghapka fuga Filisti ak ghwadarda aba moangoachiyda Refaimu.

¹⁹ Ng'ata ghoanyaashta Dawdi aba heeda NG'UTAMIIDA, “Aniini gaydawa dang'uchi fuga Filisti? Gajiina saawa geatingeasu?” Ghwalamda NG'UTAMIIDA ak gwayeesha Dawdi, “Una, aba gideaba aba huumwa gaydayiin fuga Filisti geatingaagu.”

²⁰ Muchu ghwaan Dawdi ea ghwahidu Baal-perasimu, ak ghwajoar Dawdi saawa aba hoowa; ak gwayi, “Ning'adeesa NG'UTAMIIDA weajoodigeasu aba madeedeanyu, gawuurji guldeayda beega.” Ak geeguura gheawungeaba ng'eanyiita Baal-perasimu.

²¹ Ak gwanung'usa fuga Filisti sanaamajeega nyaawa hoowa, ak ghwaat Dawdi sea fugaaschi. Ak gageanda Dawdi ea fugaaschi.

²² Ak gabiikta gicha fuga Filisti, ak ghwadarda aba jeeda moangoachiyda Refaimu.

²³ Iidu nea gamus Dawdi NG'UTAMIIDA, gwayeesha, “Adiidu gischeang'di; ang'iing'i laabwana bwadaw, ak guweesi saawa aba madeeda geeta loongeanda.

²⁴ Ama iiyiinyi ghuuta nyaasha iheenga loongeega nea ghang'ata, abeeda giimajeegi geaw; aba gideaba nuwa NG'UTAMIIDA madeadaang'u ghabwar lugooda fuga Filisti.”

²⁵ Ak gwasinda Dawdi gidarukusinda NG'UTAMIIDA niny, ak ghabwar fuga Filisti ghang'eada Geba ea ghwahita Geseri.