2 SAMWELI 4 - Bibliyeeda Ghaydit

Ishbosheti geabwar ghami

¹ Iimuchu nea ghwayiiy Ishbosheti was orjeeda Sawli, gideaba nimi Abneri aba Hebroni, gang'ada damealga, ak ghwahal geat buuneesean bea Israeli.

² Abeeda orjeeda Sawli gwandeawa fih iyeenya was shirikareeda hees ambal lugweega; nea gheawunga dea madeeda geeguura Baana, nea gheawungeaba niirja geeguura Rekabu, was orjooga Rimoni bea dooshta Benjamini bea ng'eanyiida Beroti (aba gideaba eara Beroti geanung' gaba Benjamini;

³ ak gamng'aw fuga Beroti ak gaweay Gitaimu, ak ghoah rabasta aba ng'eanyiita ea ghoah ghamneawa).

⁴ Nea abeeda orjeeda Sawli was Yonatan gwandeawa orjeeda badeeda. Abeeda gaba gweanyeew muut damanda hitaawa iita, Sawli sea Yonatan ng'eanyiida Yesreeli; ak ghwaat huda areeri ak gamng'aw; iidu damanda fwaja nea ghwalamwach, ghoabeada ak ghwanyas badeeda. Ak geeguura gheawungaaschi Mefibosheti.

⁵ Nea abeeda orjooga Rimoni bea eemeeda Beroti, Rekabu ea Baana, gaweay, ak ghwahita gheeh Ishbosheti, askweari nea gwadagu.

⁶ Ak ging'ulayi, gatmooda mida gidaghuuta ghoaleal ngaano, ak ghang'uta ghaat ak gwalil; ak gaweay gah orjeeda ghaamwat was Rekabu sea Baana.

⁷ Iidu nea ghapka jeeda gheeda, ak gawiil geaw aba badayda bulaliidaanyi aba jeeda ghooriidaanyi, geang'ut ak geabwar ghami, ak gealach gheata. Ak ghwaat uhuudaanyi, ak gaweay nea gwasik naweeda Araba eaweesean,

⁸ ak gweadu uhuuda Ishbosheti heeda Dawdi aba Hebroni. Ak gwayeesha saawa sugoocheanda, “Nukwa uhuuda Ishbosheti, orjeeda Sawli, was weajoocheandaang'u, ghayi saach eaweagaagu; niwalda NG'UTAMIIDA aba badayda ng'utamiideanyu was sugoocheanda askweareani aba badayda Sawli sea jeacheangaaschi.”

⁹ Hean ghwasha Dawdi ghuuta Rekabu ea Baanayda was orjeeda ghaamwat, was orjooga Rimoni bea eemeeda Beroti, “Aba gidamideata NG'UTAMIIDA, was dea lealu eaweegeasu aba jeeda sawanaduutka sean,

¹⁰ iirukunean siyagi gideaba, ‘Ng'ula, Sawli nimi,’ nea ghaghay giyeadu iita miy, ak ghaang'waanyi ak ghaalaji gheata aba Siklagi, nih gidageatindaanyi aadawji aba ng'asheagaaschi.

¹¹ Abeeda mayghwaraanya muuchi, iibwar fuga munyas siida doabiiwaat aba jeedeaba gheanyi aba badayda bulaliidaanyi, asi ghamneawa maydagasa foojeandaanyi aba geatindaang'u, ak ghaabwarjeey aba badayda ng'eanyiida?”

¹² Ak gwarukusa Dawdi gheareemangaaschi, ak ghabwar fugiga, ak ghwalajaada geatinga nyaawa ea geeshanga, ak ghwarata aba ghuuta dabascheanda aba Hebroni. Ak gageanda saawa uhuuda Ishbosheti, ak gabung'sa jeeda bung'eeda Abneri aba Hebroni.