2 SAMWELI 3 - Bibliyeeda Ghaydit

¹ Ak gwanda ng'ucheeda geaw dageascheeda fuga gheeh Sawli sea fuga gheeh Dawdi; ak ghwanyas Dawdi uurda muuchi, nea gooshealeada uurda Sawli.

Orjooga Dawdi

² Nea orjooga Dawdi sijiilsa aba Hebroni: duweacheadaanyi geeguura Amnoni was ghaamwat Ahinoamu, bea ng'eanyiida Yesreeli,

³ nea abeeda deaba iyeenya geeguura Gileabu, was orjeeda Abigaeli was masinung'weanda Nabali bea Garmeli; nea deaba samwagu geeguura Absalomu was orjeeda Maaka was hudeaba Dalmayi was sugoocheanda Geshuri;

⁴ nea deaba ang'wan, geeguura Adoniya orjeeda Abitali; nea deaba muut, geeguura Shefatiya was orjeeda Abitali;

⁵ nea deaba lah geeguura Itreamu bea Eglaheeda was gatmooda Dawdi. Suh geejiilsa Dawdi aba Hebroni.

Abneri gaguuyi sea Dawdi

⁶ Abeeda aba damani gwanda ng'ucheeda dageascheeda fuga gheeh Sawli sea fuga gheeh Dawdi, abeeda ghwanyas Abneri uurda aba gheeh Sawli.

⁷ Abeeda Sawli gwandeawa gwealeeda siguura gheawungaaschi Rispa, was hudeaba Aya; ak ghwalamda Ishbosheti ak gwayeesha Abneri, “Ghwasaan inyas guwi heeda gwealeeda gweanu?”

⁸ Ak ghwanyareas muuchi Abneri aba badayda ng'asheega Ishbosheti, ak gwayeesha, “Neada aniini geawooschi uhuuda gudeeda Yudahi? Askweareani geasisi mureeda gheeh Sawli was gweanu, ea heeda orjooga ghaamwat, ea buweadeagaaschi, ak ea mwayiinyi geatinga Dawdi, ak ghamneawa goowoowsean aba badaydeaba gatmooni.

⁹ ASEETA simana Abneri ng'asheanji ea suuk gea naawa suh, iimeasisiini Dawdi gidaksa NG'UTAMIIDA habeawooda,

¹⁰ dageandeawa sugoocheanda gheeh Sawli, ak ghaamiindi hoorgeeda Dawdi goombal Israeli nea goombal Yuda, ghang'eada Dani ea ghwahita Beer-sheba.”

¹¹ Ak ghwaraay Ishbosheti gwarukusa Abneri ng'ashaan nuut, aba gideaba ghoawal niny.

¹² Ng'ata goojeakta Abneri giijasoodiga heeda Dawdi aba Hebroni ak gwayeesha, “Ng'eanyiini gabeang'a? Eesina neajeeda sea aniini, ak ging'ulayi geatindeanyu gaygwanda badaydaang'u ak ghaanung' ghapka fuga sean bea Israeli headaang'u.”

¹³ Ghwalamda Dawdi ak gwayeesha, “Ghwadoabiiw; gaydasin neajeeda sea ang'iing'i; ak geagasayi ng'asheanjagi aba headaang'u; nea gideaba, mwaydaaha gheanyangeasu, ea eaghus ghanyi eani Mikali, was hudeaba Sawli, aba damanda uwuni daahana gheanyangeasu.”

¹⁴ Hean goojeakta Dawdi giijasoodiga heeda Ishbosheti orjeeda Sawli, ak gwayeesha, “Goonean gatmoodeanyu was Mikali eanyeari dimbaji bughala bea fuga Filisti.”

¹⁵ Ak goojeakta Ishbosheti buuneeda ghoareat Baltieli baleanda Laisheeda was siyeedeaba gatmooni.

¹⁶ Ng'ata goodeayi siyeadaanyi sea niny nea gooyeawdeada, ak ghwaat geeshta ea ghwahita Bahurimu. Hean ghwalamda Abneri ak gwayeesha niny, “Una biikta”; ak gabiikta.

¹⁷ Ak gabalool Abneri sea gweargwa Israeli, nea gwayeesha, “Ghayi googaseadayi Dawdi ghoah sugoocheandeang'wa.

¹⁸ Asi ghamneawa asina ng'asheanji; aba gideaba nirukuna badayda Dawdi gideaba, ‘Aba geatinda siideanyu was Dawdi gaydalealu fugeasu was Israeli aba geatinga fuga Filisti, ea aba geatinga weajoodiga nyaawa sean.’”

¹⁹ Ak gwarukusa Abneri fuga Benjamini, ak gawa Abneri eara heeda Dawdi ak gwarukusa aba Hebroni ng'asheega sean miyaasiin aba madeeda fuga Israeli, ea aba madeeda fuga sean bea gheeh Benjamini.

²⁰ Ng'ata gawa Abneri heeda Dawdi aba Hebroni nea goodeana fih diktam, ak gwasissa Dawdi ghweelmeeda Abneri sea fuga mideawa.

²¹ Ghwalamda Abneri ak gwayeesha Dawdi, “Gaydang'eat dawa, ak ghaabwadi geat fuga sean bea Israeli ghapka heeda ng'utamiideanyu was sugoocheanda, ak gwasin neajeeda sea ang'iing'i, ak abeeda giimbali buuneesean bwariiy gurooroadaang'u.” Hean ghwanung' Dawdi gawa Abneri nea ghabeawa hoyyoo.

Abneri geebwar ghami

²² Hean gabiigu fuga gadiyeeda Dawdi sea Yoabu nea gwaleabu lugooda, nea gweadu easanga saang'a. Nea abeeda Abneri ea madeayi sea Dawdi aba Hebroni, aba gideaba ninung' gawa, nea ghabeawa hoyyoo.

²³ Iidu nea ghwahidu Yoabu sea fuga sean was lugooda mideawa, geeyeesha Yoabu, “Abneriheeda was orjeeda Neri ghwahidu heeda sugoocheanda, ak ea ninung' gawa, ak gawa nea ghabeawa hoyyoo.”

²⁴ Ng'ata gawa Yoabu heeda sugoocheanda ak gwayeesha, “Neada ang'iing'i ea nisini naaha? Ng'ula, Abneri ghwaan headaang'u; neada ghwasaan inyas giidawi beata, ak ea nuwa?

²⁵ Ang'iing'i ginali gideaba Abneri orjeeda Neri ghwaan gwareenganeey, ak ghwanal riteaydaang'u ea hinoadaang'u nea ghwanal ng'asheega sean iisini.”

²⁶ Iidu nea ghabeawa Yoabu madeeda Dawdi, goojeakta giijasoodiga ghwaat geeshta Abneri, ak geeteelna heeda healadeeda Sira; nea abeeda Dawdi ea mwanala gil.

²⁷ Iimuchu nea gabiikna Abneri Hebroni, ghwasach Yoabu niny aba jeeda dooshta ak ghwaat makcheameeda, ak ghang'ut jeeda, ak ghami, aba badayda foojeanda Asaheli was orjeeda ghaamwat.

²⁸ Iidu nea ghwayiiy Dawdi iita, gwayi, “Aniini ea sugoocheanduumeedeanyu maygwanda munyinda aba madeeda NG'UTAMIIDA damanda manda muudeanooda aba badayda foojeanda Abneri orjeeda Neri.

²⁹ Gagasa goobissa uhuuda Yoabu, ea dea fuga gheanyaawa sean; ak gidabal ea manda aba gheeh Yoabu siida mabearji mananda, ghana dea bearji udamusuura, ghana dea eada bileangida, ghana dea sibwara ng'uta, ghana dea mandeawana daghwarda!”

³⁰ Hean ghabwar Yoabu sea Abishayi was orjeeda ghaamwat Abneri, aba gideaba nibwar orjeeda ghaamwat was Asaheli aba ng'ucheeda Gibeoni.

Geebuy Abneri

³¹ Ng'ata gwayeesha Dawdi Yoabu sea fuga sean mideawa, “Abwaashaada hang'weakeagwa, ak gookweali hang'weaka guniyajeega, ak gooyeawdi aba badayda Abneri.” Ak ghwaat geeshta daleanda sugoocheanda was Dawdi.

³² Ak geebuy Abneri aba Hebroni; ak ghwajaat ghuut sugoocheanda ak gooyeawda aba heeda bung'eeda Abneri; ak gooyeawda buuneesean.

³³ Ak gagutu sugoocheanda heareega Abneri, nea gwayi, “Neada Abneri gayghameawda gidameewiida rageananeeda?

³⁴ Geatingaagu mii radeadi, geeshangaagu ea meerateena munyaloalajeega; gida abeadaayda siida aba madeeda fuga munyas nih ea gidiibeadaaydi.” Ak gooyeawda buuneesean gicha aba badaydaanyi.

³⁵ Ng'ata ghapka buuneesean ak gwadiing'sa Dawdi ghwaak hamita nea gudea askweari; hean ghwaak Dawdi habeawooda nea gwayeesha, “ASEETA sinnean ng'asheanji ea suuk gaasaang'a, iyaayaaji hamita ghana gida wassean nuut nea mii gamikta aseeta!”

³⁶ Ak gang'ula buuneesean, ak ghwadaah gideaba ghwahit aba saawa; gawuurji gidamiyaasta haleanjeeda sean sin sugoocheanda ak goohoosan buuneesean.

³⁷ Hean ghwanal buuneesean sea fuga sean bea Israeli eaweedida gideaba mii gidagasiida sugoocheanda gil gideaba gayghabwar Abneri orjeeda Neri.

³⁸ Ng'ata gwayeesha sugoocheanda fugaaschi bea gadiyeeda, “Agooga moanali gideaba sugoocheanda ea siida haw niibeedeayi askweareani aba Israeli?

³⁹ Nea askweareani geawooschi ng'arng'ar, earapeadi simwaaran doaw sugoocheandean; nea fiisu was orjooga Seruyaan ea hang'oonyi aba heedeanyu. Dawalda NG'UTAMIIDA munyinda siida muy gawuurji giteena giidiinyeandaanyi!”