2 SAMWELI 2 - Bibliyeeda Ghaydit

Dawdi geanung' ghoah sugoocheanda Yuda

¹ Iimuchu nea ghang'ata ng'asheesu seaniin, ghoanyaash Dawdi NG'UTAMIIDA, gideaba, “Gaydaweesa mujiineeda wassean bea Yuda daang'waay?” Gwayeesha NG'UTAMIIDA, “Asaha una.” Ghwalamda Dawdi ak gwayeesha, “Gaydaang'waay aneeda?” Gwayeesha NG'UTAMIIDA, “Hebroni.”

² Ak ghwascheang'da Dawdi gawa hoowa, niny sea gadeemgaaschi asiyeenya, Ahinoamu bea ng'eanyiida Yesreeli, ea Abigaeli, ghayi was gatmooda Nabali, bea ng'eanyiida Garmeli.

³ Ak eara Dawdi ghwanung' ghwascheang'da fugaaschi mideawa niny, giliwas sih sea fugeaba gheanyi; ak goobiida mujiinajeega ng'eanyiida Hebroni.

⁴ Ng'ata gaweay fuga Yuda, ak ghoamwaar Dawdi aba hoowa, ghoah sugoocheanda jea goombal gheeh Yuda. Hean goobalool Dawdi nea gwayeesha, “Fuga ng'eanyiida Yabesh-gileyadi gea buy Sawli gil.”

⁵ Ng'ata goojeakta Dawdi giijasoodiga heeda fuga ng'eanyiida Yabesh-gileyadi nea gwayeesha, “Gagasa gagooneegwa NG'UTAMIIDA ghawooda, aba gideaba noosisi sugoocheandeang'wa ng'asheega miyaas, nea Sawli gil ak goobunyi.

⁶ Asi gidabal gwasinneegwa NG'UTAMIIDA ghamneawa baydeayda ea huumwa; ak eara aniini gaydasineegwa baydeayda uurji nih, aba gideaba noosinyi ng'asheanji.

⁷ Asi ghamneawa, gidabal geayiin geatingeagwa uurda, nea ghoahuuyi daruuschi; aba gideaba Sawliheeda was sugoocheandeang'wa nimi, ak ea niimwaaran gicha fuga gheeh Yuda doaw sugoocheanda jea goombaleegwa.”

Ishbosheti geanung' ghoah sugoocheanda Israeli

⁸ Nea Abneri, was orjeeda Neri, was shirikarajeanda haw bea Sawli, ea nigeanda Ishbosheti orjeeda Sawli, ak ghwaat giigheawda ng'eanyiida Mahanaimu;

⁹ ak ghwanung' ghoah sugoocheanda Gileyadi, ea dea fuga Asheri, ea dea Yesreeli, ea dea Efraimu, ea dea Benjamini, ea badayda Israeleeda sean.

¹⁰ (Orjeani bea Sawli was Ishboshetiin, abeeda gaba gweanyeew haradam damanda huweewa sugoocheanda Israeli, ak goombal gweanyeew iyeenya.)

¹¹ Abeeda damanda ambaleewa Dawdi Hebroni ambaleewa fuga gheeh Yuda gweanyeew ispwa ea sheeh lah.

Ng'ucheeda Israeli ea Yuda

¹² Iimuchu ghabeawa Abneri was orjeeda Neri, sea fuga gadiyeeda Ishbosheti was orjeeda Sawli hean ghabeawa ng'eanyiida Mahanaimu ak gaweay Gibeoni.

¹³ Eara Yoabu was orjeeda Seruya sea fuga gadiyeeda Dawdi, gwarita ak gwaroonyi fugiga aba murdeeda basooda meatkweeni nea goobiitpiit suurja aba meatkweeda niirja.

¹⁴ Hean ghwalamda Abneri ak gwayeesha Yoabu, “Geagasayi nung' ghang'eatng'eat gheareemang'su ak ghang'was aba madeedeanya.” Gwayeesha Yoabu, “Asaha dang'eatng'eada gaweay.”

¹⁵ Hean ghang'eatng'eat gaweay, ak gaweay meatkweeda niirja aba giteena mooneeda nyaawa; was fih damaniyeenya bea dooshta Benjamini ea dea Ishbosheti was orjeeda Sawli ea dea fih damaniyeenya was fuga gadiyeeda Dawdi.

¹⁶ Ak gaba siisi ang'ooyna weajoocheandaanyi uhuuda, ak ghang'uda ng'utaanyi gisheajeega siida mida murdeeda; ak ghoabeada duwaawi. Ak geeguura gheawungeaba ng'eanyiita Helkat-hasurimu, mida ng'eanyiida Gibeoni.

¹⁷ Ghang'waaniit ng'ucheeda muuchi askweardida; nea Abneri sea fuga Israeli geabwar aba madeeda fuga gadiyeeda Dawdi.

¹⁸ Abeeda gwanda hoowa orju samwagu bea Seruya nea Yoabu gil, ea Abishayi sea Asaheli. Nea Asaheli ea asasiida geeshanga gea darweeta;

¹⁹ ak ghwaat Asaheli geeshta Abneri; nea aba eata geeshta ea magala meatkweeda geatinda dugwa ghana meatkweeda geatinda ghaadaam aba eata geeshta Abneri.

²⁰ Ng'ata gwasachsa ghaat bwadaw ak gwayi, “Siida ang'iing'i Asaheli?” Ghwalamda niny ak gwayeesha, “Siida aniini.”

²¹ Hean ghwalamda Abneri ak gwayeesha niny, “Yamwa geaw gala geatindaang'u bea dugwa ghana geatindaang'u ghaadaam ak giing'waanyi gheareemaneanagi ak giireadi dabitaanyi bea ng'ucheeda.” Nea Asaheli ea mayghwanung'waada eadita geeshtaanyi.

²² Gabiikta gicha Abneri ak gwayeesha Asaheli, “Yamwa geaw ak ginung'waadi eanooga geeshteanyu; ghwasaan inyas gaydalasnyi ak giibeadi? Abeeda gaydaamuustaan gideaba gaydagatgat gheanyangeasu aba madeeda orjeeda geamadu was Yoabu?”

²³ Ak ghabeawa yamiteaba geaw; hean ghang'ut Abneri jeadaanyi aba uuta ng'utaanyi, ak gwariteawa ng'uta badaydaanyi; ak ghoabeada aba hoowa, ak gameewsa hiji. Nea fuga sean hidu heeda abeedeaysa Asaheli ak ghami, gawus ghamiinaada.

²⁴ Ng'ata gamaseaw Yoabu sea Abishayi ak ghwaat geeshta Abneri; nea damanda riikghta gamikteawa aseeta ghwahita heayeeda Ama, mida madeeda Giya gal dareapcheeda Gibeoni.

²⁵ Hean ghabwat geat fuga dooshta Benjamini aba geeshta Abneri, ak ghoah lugoanagi, ak ghamiinaada aba uhuuda heayeeda.

²⁶ Ng'ata gaguursa Abneri Yoabu ak gwayeesha, “Ng'uta gayghwaak buuneeda damanda manda muudeanooda? Minali gideaba iimuchu huuydeanda gayghang'waaniit? Gajeeyi bwak ea ghoah eeju gideaba ginung'waadi ea mireekusiini fugaagu ghwanung'waada eadita geeshta orjooga ghaamwat?”

²⁷ Ghwalamda Yoabu ak gwayeesha, “Aba gidabiideata ASEETA gwachi inyeeda ea mibalooli, gwachi gajea ninung'waada sakteayda eadita geeshta orjooga ghaamwat.”

²⁸ Hean ghaghuut Yoabu durumbeati; ak ghamiinaada buuneesean, ak ghwanung'waada gicha eata geeshta fuga Israeli, ghana gabiikta gicha ng'ucheeda.

²⁹ Hean gawa Abneri sea fugaaschi eaweesean nea gwasik dageascheeda Araba; ak ghoaghaawa Yordani, ak ghwahita Mahanaimu.

³⁰ Ak eara Yoabu gabiikna eadita geeshta Abneri, hean nea nibwada geat buuneesean, was fuga gadiyeeda Dawdi ghwashoadeewa fih damashageash ii mearara Asaheli.

³¹ Abeeda fuga gadiyeeda Dawdi nibwar fuga Benjamini, sea fuga Abneri, ak gameewa fih bughalaji samwagu ea laadam.

³² Ak ghwaat musta Asaheli ak gabung'sa jeeda bung'eeda ghwaan, mida Betlehemu. Nea Yoabu sea fugaaschi gwaneayi eaweesean, ak gamucheawsa saawa aba Hebroni.