2 SAMWELI 16 - Bibliyeeda Ghaydit

Dawdi sea Siba

¹ Iidu nea ghwasuut Dawdi gilimwanang' uhuuda heayeeda, gwaroonyi sea Siba was siida gadiyeeda Mefibosheti, ea digeeni iyeenya sareesheat, nea gwanda badahuuka mukaataji bughalaji iyeenya, ea dameal bughala bea sabiibu, ea haghwi bughala bea geayda, ea shearooda difaayi.

² Hean ghwalamda sugoocheanda ak gwayeesha Siba, “Ghwasaan inyas giyeadu haleanjeeni?” Ghwasha Siba ak gwayeesha, “Digeeniga gaba gheeda sugoocheanda gaygwasareeni, mukaate ea haghweega geayda gayghwaak gheareemanga, nea difaayi gayghwali fugiga ahiili aba dareapcheedean.”

³ Ghwalamda sugoocheanda ak gwayeesha, “Gwanda yeenu orjeeda siidaang'u haw?” Gwayeesha Siba sugoocheanda, “Ng'ula, geanung'wi Yerusalemu; aba gideaba gwayi, ‘Eanean gheeh Israeli gaygoodeelnean sugoocheanduumeeda bwaabwa.’”

⁴ Hean gwayeesha sugoocheanda Siba, “Ng'ula, haleanjeeda sean bea Mefibosheti ghamneawa gaagu.” Gwayeesha Siba, “Aniini geamuscheey gideaba; nung' danyas alooheeda aba madeadaang'u, ng'utamiideanyu was sugoocheanda.”

Dawdi sea Shimeyi

⁵ Iidu damanda hina sugoocheanda was Dawdi Bahurimu, ghwahidu sih bea gheeh Sawli, siguura gheawungaaschi Shimeyi, was orjeeda Gera; hean damanda hina ghamwaashta.

⁶ Ak gafuta Dawdi lagheanga, sea fuga sean bea gadiyeeda sugoocheanda was Dawdi; ea fuga sean meanyi mida geatindaanyi bea dugwa ea meatkweadaanyi bea geatinda ghaadaam.

⁷ Iidu gwayi Shimeyi aba mooshteaydaanyi, “Una, una, siida foojeanda, was siida marachi gil!

⁸ Niwaldaaweey NG'UTAMIIDA mureandooda aba badahuukeagwa oogasean aba foojeanda gheeh Sawli, ghayi imbali hoorgeadaanyi; ak ghoadaw NG'UTAMIIDA sugoocheanduumeeda geatinga orjeedang'u was Absalomu. Daaha, ang'iing'i geegeananeey jeeda munyindaang'u; aba gideaba guwoosi siida foojeanda.”

⁹ Ng'ata gwayeesha Abishayi was orjeeda Seruya sugoocheanda, “Ghwasaan inyas gayghamwaashta ng'utamiideanyu was sugoocheanda gudeeni nimiin? Nung'waada gaydawa dalach gheata.”

¹⁰ Hean ghwalamda sugoocheanda ak gwayeesha, “Neada geendeayeesi naaha sea ang'iing'i orjoagaagu Seruya? Niny iimwaashta aba gideaba nirukusa NG'UTAMIIDA gideaba, ‘Mwaashta Dawdi,’ jea iidu gwayi, ‘Ghwasaan inyas gisini ng'asheesu?’”

¹¹ Ng'ata gwayeesha Dawdi Abishayi sea fugaaschi sean bea gadiyeeda, “Ang'ula, orjeedeanyu eajiilsi geaw gagasa ghabwaran; abeeda ea mayghwaraanya muuchi siisi bea eemeeda Benjaminiin! Anung'waada, anung'waada ghamwaashta; aba gideaba gidarukusa NG'UTAMIIDA niny.

¹² Abeeda gwadeepa ghwadaah NG'UTAMIIDA sawanadeedeanyu, ak abeeda gawalu NG'UTAMIIDA gea miyaasiin aba mooshteawi iteanyuun askweareani.”

¹³ Hean gaweay Dawdi sea fugaaschi aba naweeda, nea gwasik Shimei murdeeda heayeeniga deaschi niny ak ghamwaashta nea gawa, ak gafuta lagheanga nea ghwasakta birjeanda.

¹⁴ Ng'ata ghwahidu sugoocheanda Yordani sea fuga sean mideawa, nea nibur; ak gafuuf aba hoowa.

Absalomu aba Yerusalemu

¹⁵ Ak ghwahita Absalomu sea buuneesean bea Israeli Yerusalemu, nea gwandeayi sea Ahitofeli.

¹⁶ Muchu nea ghwahidu Hushayeeda eemeeda Arkite rooroochi Dawdi heeda Absalomu, ghwalamda Hushayi ak gwayeesha Absalomu, “Gagasa ghwanyas sugoocheanda eaweega geawi Gagasa ghwanyas sugoocheanda eaweega geawi!”

¹⁷ Gwayeesha Absalomu Hushayi, “Nih alooheadaang'u gil aba heeda siida irooroocheewi? Ghwasaan anda gwachi miideayeewani siida irooroocheewi?”

¹⁸ Ghwalamda Hushayi ak gwayeesha Absalomu, “Manda; aba gideaba siida loat NG'UTAMIIDA ea fiisu ea buuneesean bea Israeli, aniini gaydoaw siidaanyi, ak gaydandeayi sea niny.

¹⁹ Ak gicha, gamiisean dagadiyeesa ng'eaha? Neada ea mii orjeedaanyi? Gawuurji gidaghayi eagadiyeesiindi gweanu, eara ang'iing'i gaydagadiyeeseey.”

²⁰ Hean gwayeesha Absalomu Ahitofeli, “Argweakseasa; gajeesina naaha?”

²¹ Gwayeesha Ahitofeli Absalomu, “Una heeda gadeemga gweanu, ghayi nung'usa heeda gang'ula gheeda; ak gayghwayiiy buuneesean bea Israeli gideaba niinyareasnyi gweanu, abeeda gajeemajeek geatinga buuneesean indeawi.”

²² Ak ghamiinda maheemajeanda jea goobiida Absalomu aba uhuuda gheeda; ak gawa Absalomu heeda gadeemga ghwaan aba madeeda gheanyanga Israeelessean.

²³ Nea aba askwearjoojigiga iissa girgweageeda rukuta Ahitofeli iissa geamwasta gili ng'asheanda ASEETA; ak gamajeegiit girgweaguutka sean bea Ahitofeli, aba heeda Dawdi ea heeda Absalomu.