2 SAMWELI 11 - Bibliyeeda Ghaydit

Dawdi sea Batsheba

¹ Muchu nea ghwahita damanda muweedeaba gweaydida, damanda badiina sugoodiga ng'ucheeda, goojeakta Dawdi Yoabu, goodeayi sea fugaaschi bea gadiyeeda, sea buuneesean bea Israeli; ak ghawalda mureandooda aba heeda fuga Amoni, ak gwaneaweesa Raba. Nea Dawdi geenung'usa Yerusalemu.

² Iimuchu eaweecha shing'ada, nea ghang'eat Dawdi aba badayda bulaliidaanyi ak gwaneayi aba uhuuda gheeda sugoocheanda, ghwadaah damanda mideewa uhuuda gheeda gatmooda nea goohuushi; nea gatmooda aamiy muuchi.

³ Ak goojeakta Dawdi buuneeda ghwanyas iiteaba gatmooni. Hean gwayeesha siyagi, “Neada nih ea mii Batshebahi was hudeaba Eliyamu, gatmooda Uriyaheeda eemeeda Hiti?”

⁴ Hean goojeakta Dawdi giijasoodiga, ak gweadu niny; ak ghwaan headaanyi, ak gwaluudayi. (Aba gideaba gatmoodida niimmiidu geaw aba ririnnyeandaanyi.) Ng'ata gabiikta gheanyaawa.

⁵ Ak gagweayiit gatmooda; ak goojeakta eerukusa Dawdi, gideaba, “Aniini naadurumwaniichi.”

⁶ Ng'ata goojeaksa Dawdi Yoabu, ak gwayeesha, “Nung' ghwaan Uriyaheeda eemeeda Hiti.” Ak ghwanung' Yoabu gawa Uriya heeda Dawdi.

⁷ Iidu nea ghwahita Uriya headaanyi; ghoanyaashta Dawdi gidasin Yoabu, ea iita buuneeda, ea giduurji ng'ucheeda.

⁸ Ghwalamda Dawdi ak gwayeesha Uriya, “Asi rarang'aada ak guwi gheang'u, ak giihuuni geeshangaagu.” Ak ghabeawa Uriya gheeda sugoocheanda, ak gweadu geeshta hamichoojiga miyaasiin leabu heeda sugoocheanda

⁹ Amadu gwalil Uriya aba gidaghuuta gheeda sugoocheanda sea buuneesean bea gadiyeeda gheeda ng'utamiidaanyi, ak ea mwararang'aada gawa gheanyi.

¹⁰ Iidu nea geerukusa Dawdi gideaba, “Uriya mii ghwararang'aada gawa gheanyi,” Ghwalamda Dawdi ak gwayeesha Uriya, “Neada ang'iing'i ea mileapni bareanyeeka? Ghwasaan anda mirarang'aadani una gheang'u?”

¹¹ Ghwalamda Uriya ak gwayeesha Dawdi, “Sandakwajeanda neajeeda ea fuga Israeli ea Yuda goobiita jeesinga meandoojiga; nea ng'utamiideanyu was Yoabu sea fuga gadiyeeda ng'utamiideanyu gwanda ng'eanyiida eesh; asi gaydawa gheenyu, ak geayeagiischi nea gealeeshi, ak gealuudayeewi gatmoodeanyu? Aba gidiibiideati, ea gidabiideata gurooroadaang'u, maydasin ng'asheanji.”

¹² Hean gwayeesha Dawdi Uriya, “Abiidana hiji eara askweareani, amabeeda numuji gaydasikseey una.” Hean goobiida Uriya Yerusalemu eaweedida, ea eaweeda niirja.

¹³ Ak gaguursa Dawdi niny, ak gweagiischi aba madeadaanyi nea gwaleeshi; ama hita shing'ada gwarita ak gawa gwalil aba badayda bulaliidaanyi sea fuga gadiyeeda ng'utamiidaanyi, ak ea mawa gheanyi.

¹⁴ Muchu sakteayda ghang'oar Dawdi barawajeanda gaweesa Yoabu, ak ghwanung' ghwaat Uriya.

¹⁵ Nea gang'oorsa jeeda barawajeanda gideaba, “Iina Uriya madeeda ng'ucheeda heeda ng'waan, amang'ata ginung'usi heeda, ak abeeda geabwaay ak geabwar ghami.”

¹⁶ Hean damanda ghasa Yoabu mujiini, ghwayiin Uriya heeda nal gideaba gwanda fuga meanyi.

¹⁷ Ak ghapka fuga mujiini ak gang'uchi sea Yoabu; ak gameewa fuga mwaatkwa bea gadiyeeda Dawdi aba jeeda buuneeda. Ak eara Uriyaheeda eemeeda Hiti geabwar.

¹⁸ Ng'ata geecheakta Yoabu ak gwarukusa iita ng'asheega sean bea ng'ucheeda;

¹⁹ ak gwayeesha siidida siicheaktean, “Iidu nea nihit rukusiinda sugoocheanda iita sean bea ng'ucheeda,

²⁰ ak ghwanyareas sugoocheanda, ak gwayeeshiineey, ‘Ghwasaan ang'iing'i inyas guwi ea neekiisiina mujiini ak ging'uchi? Neada ea moanali gideaba gaygafuteegwa aba uhuuda ghamarda?

²¹ Neada ea ng'eaha siida bwar Abimeleki orjeeda Yerubesheti? Neada ea mii gatmooda jakna ischooda uhuuda ghamarda ak ghami aba uhuuda ghamarda?’ Ak abeeda gajeena, ‘Siidaang'u bea gadiyeeda was Uriyaheeda eemeeda Hiti eara niny nimi.’”

²² Hean ghang'eat siida siicheagu gwarukusa Dawdi ng'asheega sean eesha Yoabu una rukuta.

²³ Ghwalamda siida siicheakta ak gwayeesha Dawdi, “Buuneeda ghwajoareasa ak ghwanyagaada, ak ghwanyasaneasa mooheeda; ak geakghuumdi bwadaw ea ghwahita deascheeda dooshta.

²⁴ Ak gafteasa fuga mideawa geatka aba uhuuda ghamarda; nea fuga mwaatkwa bea gadiyeeda sugoocheanda ea nimeewa; ak eara siidaang'u bea gadiyeeda was Uriya bea eemeeda Hiti eara niny nimi.”

²⁵ Ghwalamda Dawdi ak gwayeesha siida siicheagu, “Asi gajeeshiina Yoabu, ‘Adinung' ghwanung' ng'asheanji sawanana, aba gideaba ng'uta ghwaakta nih gidakta diita; amajeega ng'ucheadaang'u aba badaydeaba mujiineani, ak gibwaanyi.’ Ak giimajeegi niny.”

²⁶ Iimuchu nea ghwayiiy gatmooda Uriya gideaba siyeadaanyi was Uriya nimi, hean gagutu heareega siyeadaanyi.

²⁷ Hean nea ghang'ata gutuunooda heareega, goojeakta Dawdi siida gweadu gheanyi, ak ghwanung' ghoah gatmoadaanyi, ak gwajiilsa baleanda. Iidu ng'asheanda sin Dawdi ghoanyareas NG'UTAMIIDA.