2 SAMWELI 10 - Bibliyeeda Ghaydit

Dawdi ghwajoar fuga Amoni ea fuga Shaamu

¹ Iimuchu nea ghang'ata ng'asheesu ghami sugoocheanda Amoni, ak ghoang'waay gheambalmeeda orjeedaanyi siguura Hanuni.

² Ak gwayi Dawdi, “Aniini gaydasissa mureeda Hanuni orjeeda Nahashi, gawuurji gidaghayi sinda ghwaan mureeda aba heedeanyu.” Hean goojeakta Dawdi fugaaschi bea gadiyeeda gageandeawa salgheang'da aba badayda ghwaan. Ak ghapka fuga gadiyeeda Dawdi jeeda ng'eanyiida fuga Amoni.

³ Iidu gwayeesha sugoodiga fuga Amoni Hanuneeda was ng'utamiida nyaawa, “Ang'iing'i iing'ulayi Dawdi goojeagu fuga buwa gageanda salgheang'da aba gideaba gwasissa gweanu mureeda? Neada Dawdi ea meajeakna fugaaschi bea gadiyeeda ghwadaah mujiini, nea ghaghwalda gheang'da, ak ghwalas uhuuda?”

⁴ Hean gageanu Hanuni fuga gadiyeeda Dawdi, ak gaba siisi sireakghu deamuuka meatkweenagi, ak gealajaada bugusuunatka hang'weaka nyaawa, ea gabiikuuna jimeergweaka, ak ghwanung'waada gaweay.

⁵ Iidu nea geerukusa Dawdi goojeakta buuneeda gwaroonyi saawa, aba gideaba fugiga nibwaspwas muuchi. Ak gwayeesha sugoocheanda, “Oopiidana Yeriko ea gwaheetu deamuukeagwa, abeeda goobiigu.”

⁶ Hean nea gwajeeng'u fuga Amoni gideaba nimunyasiidi aba madeeda Dawdi, hean goojeakta fuga Amoni buuneeda ghwasha fuga Shaamu mida Bet-rehobu, sea fuga Shaamu mida Soba, hita sagalamnyooji diktam bea shirikareeda badiina geeshanga, sea sugoocheanda Maaka mideawa fih sagalama, sea fuga Dobu, hita fih sagalamnyooji damaniyeenya.

⁷ Iimuchu nea ghwayiiy Dawdi ng'asheesu, goojeakta Yoabu sea lugooda mideawa uurjeenga.

⁸ Hean ghapka fuga Amoni ak gwajip geat aba ng'ucheeda aba ghuuta dooshta; nea fuga Shaamu bea Soba sea fuga Rehobu, sea fuga Dobu ea gea Maaka, gaba geat aba ng'eanyiida bwara.

⁹ Iidu nea ghwadaah Yoabu gideaba ng'ucheeda ghang'eat aba badaydaanyi aba mwadi ea aba bwadaw, hean gagwalu fuga siloat bea Israeli, ak gwajip aba madeeda fuga Shaamu;

¹⁰ nea buuneadaanyi mwaatkwa ghwayiin geatinga orjeeda ghaamwat was Abishayi, ak ghwanung' gwajip geat gang'uchi sea fuga Amoni.

¹¹ Ak gwayeesha, “Iideepa gaburdeawean uurda fuga Shaamu, abeeda gajaweadaan; ama deepa gaburdeaweey uurda fuga Amoni, abeeda gaydoan daweanyi.

¹² Asi adaruusiita, ak geeng'uchi muuchi aba badahuuka buuneedeanya ea aba badahuuka mujiinajeega ASEETEANYA. Ak gidabal gwasin NG'UTAMIIDA gidagasa.”

¹³ Hean gwaneekiisa Yoabu sea fuga mideawa gang'uchi sea fuga Shaamu; ak gamng'aw aba madeadaanyi.

¹⁴ Iidu nea ghwadaah fuga Amoni gideaba gamng'aw fuga Shaamu, hean gamng'aw eara saawa aba madeeda Abishayi, ak gaweay jeeda mujiini. Ng'ata gabiikna Yoabu ng'ucheeda fuga Amoni, ak ghwahidu Yerusalemu.

¹⁵ Iidu nea ghwadaah fuga Shaamu gideaba nijoar fuga Israeli, hean ghabwat geat.

¹⁶ Ak goojeakta Hadadeseri buuneeda, gooruudu fuga Shaamu mida giigheawda Furati; ak ghapka ea ghwahidu Helamu, sea Shobaki was shirikarajeanda haw ambal lugooda Hadadeseri nea goosheedeawa.

¹⁷ Iidu nea geerukusa Dawdi, ghabwada geat Israeleesean, ak ghoaghaawa Yordani, ak ghapka Helamu. Ak gwajip geat fuga Shaamu gang'uchi Dawdi, ak gang'uchi sea niny.

¹⁸ Hean gamng'aw fuga Shaamu aba madeeda fuga Israeli; ak ghabwar Dawdi fuga Shaamu fih bughalaji ispwa mideawa mutukwajeega, sea fuga nyiit sagalamnyooji haradam ding'da faraasajeega, ak ghang'ut Shobaki was shirikarajeanda haw bea lugooda nyaawa, ak gameewsa geeshangiga.

¹⁹ Iidu nea ghwadaah sugoodiga sean gadiyeesa Hadadeseri gideaba nijooriischi fuga Israeli hean gagasa duupcheeda aba heeda fuga Israeli, ak gagadiiyeesa. Ak ghoawal fuga Shaamu gideaba gayghaweat gicha fuga Amoni.