2 Goriinto 3 - Bibliyeeda Ghaydit

Soomjooga neajeedeesh

¹ Asi sing'eachi giidiing'noodeaba geat gicha? Ghana sigasayi gidagasiida buuneeda suurja barawajeega gwarsiinda jea ghapka heedeang'wa, ghana gwaleabu heedeang'wa?

² Agooga goowooschi barawajeandeanya bea gwarsiinda, sing'oorsa jeesinga gurooruunatkeagwa, biissa ea nalaat nea ghoasoamwa buuneesean;

³ ak ghoahiimu gideaba goowooschi barawajeanda leabu heeda Gristo sigooneasa aseasa, meang'waarana galaamu geang'waara Guroorooda ASEETA majeek, ak ea mii badahuuka lagheanga gil geeng'oorsa badahuuka gurooruunatka hang'oonyi bea buuneeda.

⁴ Nea geendeawi masaweega aba madeeda ASEETA aba naweeda Gristo.

⁵ Mii gideaba geahiichi geat aseasa gil aba giipkeata ng'asheanda wassean gideaba gwaleabu heedeanya aseasa; hidoodeanyu gwaleabu heeda ASEETA,

⁶ aba gideaba niny dea nung' eamuusa eahuuwa fuga gadiyeesa neajeedeesh, meeng'oorsiina jeeda barawajeanda geang'waar aba jeeda Guroorooda; aba gideaba gising'waar was deaweeda gaygwanuus, nea Guroorooda gagoona eaweega.

⁷ Asi ghamneawa deaweedeeda miyeeda, iissa ghafunya geaw jeeda barawajeega lagheanga, ghwaan nea gweadu giigheambiita ak abeeda ea mang'ula fuga Israeli gheamamda Musa aba gidameang'meang'da, amadu ghwasuunya aba giduurji,

⁸ abeeda deaweedeeda Guroorooda ea majeefurda ak ea majeadeapta aba giigheambiita hawi?

⁹ Nea iimida giigheambiita jeeda deaweeda jea gweadu girgweaksiinda, abeeda deaweedeeda doobiiwnata gagasa ghang'ata aba giigheambiita.

¹⁰ Aba huumwa, aba badaydeaba ng'asheesu, gidaghayi mideawa giigheambiita ea mudugwandeawa giigheambiita earahay, nea gweagu giigheambiitida adaraamiin.

¹¹ Nea gidida suunyaan iyeadu giigheambiita, abeeda gida jea ghwashng'u gaygwandeawa giigheambiita haw muuchi.

¹² Ak iinukwa geandeawi rarooda, ng'asheanda uurjunu, ada abeeda geawooschi muranga,

¹³ nea meewuurjeewani Musaheeda ghayi dukuta gheamamdaanyi ak abeeda ea mwadaaha muuchi fuga Israeli mudeanoodeaba giigheambiitida suunyaan.

¹⁴ Iidu fugheerga nyaawa geanung' gahang'oonyiidi; aba gideaba eara askweareani damanda siisoamwana neajeedeaba garayi, gili siikwealiisa uhuudean gudugwanda heeda, geaghus eegeanda iiguuyi siida sea Gristo.

¹⁵ Ea, eara askweareani iisiissoamwa deaweedeeda Musa geedukuta fugheerga nyaawa;

¹⁶ nea siida iiyamsa geaw Ng'utamiida hean geegeanda gidida awiimiin.

¹⁷ Asi ghamneawa Ng'utamiida Guroorooda, nea heeda mida Guroorooda Ng'utamiida, gwanda giibaldeaba geaw.

¹⁸ Hean aseasa eesa sean, aba gheamamda meedukuta, ng'ula giigheambiita Ng'utamiida, siyam gawuurji sea niny ghang'eada giigheambiita ea gagul giigheambiita; aba gideaba ng'asheanji gwaleabu heeda Ng'utamiida was Guroorooda.