1 SAMWELI 9 - Bibliyeeda Ghaydit

Sawli gwaroonyi Samweli

¹ Ghayi gwanda siispa dooshta Benjamini siguura gheawungaaschi Gishi, was orjeeda Abieli, orjeeda Serori, orjeeda Bekorati, orjeeda Afiya bea dooshta Benjamini was meanang'oocheanda;

² ak gwandeawa orjeeda Sawli, was gheareemaneeda miy aba leanga. Ak ea manda siida miy ng'al niny aba jeeda fuga Israeli; ak ea manda siida ayang'da aba geawunda aba jeeda buuneeda gabiikna buuneesean hamarjoojigaaschi.

³ Eaweecha gwarooda digeeniga Gishi, was ghweanda Sawli. Ng'ata gwayeesha Gishi orjeedaanyi was Sawli, “Geani siyagi aba jeeda fuga gadiyeeda ak ging'eadi adeayeewana ak gooweayi agasa digeeniga.”

⁴ Hean gwasik dageascheeda heayeeniga ng'eanyiida Efraimu ak gwasik bugusta ng'eanyiida Shalisha, ak ea mwanyasa digeeniga. Ak gwasik bugusta ng'eanyiida Shaalimu, ak ea mwanyasa. Iidu gwasik jeeda ng'eanyiida Benjamini, ak ea mwanyasa.

⁵ Iidu nea ghwahita ng'eanyiida Sufu, gwayeesha Sawli fugaaschi bea gadiyeeda mideawa, “Apkaani, eebiikta, gwadeepa bwaabwa ea mudu gwaduuba ng'asheega digeeniga ak ghang'ut gurmeahiida aba badahuukaasa.”

⁶ Ak gwayeesha niny, “Ng'ula, gwanda siida ASEETA aba jeedeaba mujiineani, ak ea siida siiwali gheang'da; eeweaya headaanyi; gwadeepa gwarukuneasa iita bareanyeakaasa gwadeepa gwarugu heechea eanyasana.”

⁷ Ng'ata gwayeesha Sawli siidaanyi bea gadiyeeda, “Abeeda iisiweayi, gajeatawa naaha siida? Aba gideaba mukaateeyda mida jeesinga shageanigaasa niisha, ak ea meendeawani gidamiy jea eeyeasiina siida ASEETA. Geendeawi naaha?”

⁸ Gabiikta siida gadiyeeda ak gwayeesha Sawli, “Aba hiji, geandeawi shekeeli, ak gaydaadaw siida ASEETA, ak gwarukuneasa heechea eegala.”

⁹ (Ghayi aba ng'eanyiida Israeli, iiwea siida ghang'al ASEETA, gida gwayi, “Abeeni, eeweaya heeda siida ng'ushta”; aba gideaba ghamneawa siida was sibaneeda ghayi geeguura siida ng'ushta.)

¹⁰ Ak gwayeesha Sawli siidaanyi bea gadiyeeda, “Ghwahit; beeni eeweaya.” Ak gaweay mujiini heeda mida siida ASEETA.

¹¹ Damanda ding'deawa heayeeda ea ghwahita mujiini, gwaroonyi haweega nea ghapka ghwaram beega, ak gwayeesha, “Siida ng'ushta gwanda hiji?”

¹² Ghwasha nea gwayeesha, “Gwanda hiji; ng'ula, gwanda madeadaang'u. Lamwajaada; aba gideaba gudea hinoadaanyi gil gwaleabu mujiini, aba gideaba gaygwasin buuneeda lukghumeeda askweareani aba heetiyeada sibata ASEETA.

¹³ Damanda ihitaawi mujiini, gaynyasa niny, damanda miighabeawa agiischooda aba heetiyeada sibata ASEETA; aba gideaba maygweagiischi buuneeda ea ghwahidu, aba gideaba geaghus ghanyi ghamwaash ASEETA aba badayda lukghumeeda; ak abeeda gaygweagiischi fuga siguursa. Asi una siyeang'da, aba gideaba gaybay nyasa.”

¹⁴ Ng'ata ghwascheang'da gaweay mujiini. Hean nea gaweay jeeda mujiini, ghwadaah Samweli nea gwardu ghwaan roonyeeda nyaawa damanda beawa heeda diyeada sibata ASEETA.

¹⁵ Eaweecha nea miighwahidu Sawli, goohiimsa NG'UTAMIIDA Samweli ng'asheanda:

¹⁶ “Numuji damanda uurji nih gaydeajeagu siida jea gwaleabu ng'eanyiida Benjamini, ak gajamwaara niny ghoah siida haw jea goombal fugeasu was Israeli. Gayghaweat fugeasu aba geatinda fuga Filisti; aba gideaba naadaayi sawanadeeda buuneedeanyu, aba gideaba nihidu shooka nyaawa heedeanyu.”

¹⁷ Iidu nea ghwadaah Samweli Sawli, gwayeesha NG'UTAMIIDA niny, “Nih siida ghayi earukuneey iitaanyi gil! Niny siida jea ghoahaaghwa fugeasu.”

¹⁸ Hean gwaneekiisa Sawli Samweli aba dooshta, ak gwayeesha, “Gwanda yeenu gheeda siida ng'ushta?”

¹⁹ Gwayeesha Samweli Sawli, “Aniini geawooschi siida ng'ushta; asheedeawean eeweaya heetiyeada sibata ASEETA, aba gideaba askweareani gajeembuucheena sea aniini, ama sakteayda gaydayeeshiineey una ak gaydarukuneey ng'asheega sean mida uhuudaang'u.

²⁰ Nea aba iita digeenigaagu rooda ak ea ning'ata askwearjooji samwagu, adiyiini uhuudaang'u ng'asheega nyaawa, aba gideaba sinyas. Ak ea ng'eaha siida gasa buuneesean aba Israeli? Neada ea mii ang'iing'i gil ea ghaheang'wa?”

²¹ Ghwasha Sawli nea gwayeesha, “Neada aniini ea meawoosi siida dooshta Benjamini, mwanang' aba jeeda dooshinga Israeli? Nea fugeasu ea mii manang'eewa buuneesean bea dooshta Benjamini? Ghwasaan abeeda inyas goorukunean ng'asheesu?”

²² Ng'ata ghwaat Samweli Sawli sea siidaanyi bea gadiyeeda ak gweadu jeeda gheeda ak ghoadaw hoorgeeda mida madeeda fuga siguursa, nyiit fih diktam ea damanamughuush.

²³ Hean gwayeesha Samweli, siida eawooschi, “Eani biyeeyda gwachi eagoonyeey, was dea gwachi eayeeshiineey ‘saja.’”

²⁴ Ng'ata gageanu siida eawooschi jeata ea shoomng'eanda ak ghwayiin madeeda Sawli; ak gwayeesha Samweli, “Ng'ula, nukwa biyeeyda heeta siitiing'da aba badaydaang'u gwanda madeadaang'u. Aga; aba gideaba geetiiw aba badaydaang'u ea ghwahita damanda sigasa, ak giimbuucheewi rabasta.” Ak goombuuchi Sawli sea Samweli eaweedida.

²⁵ Iidu nea ghwararang'aana heetiyeada sibata ASEETA ghwahidu mujiini, ak geesin bulaliida jea gwalla Sawli aba uhuuda gheeda, ak gwalil.

Samweli ghoamwaar Sawli ghoah sugoocheanda

²⁶ Iimuchu nea ghaghar gayeew gaguursa Samweli Sawli aba uhuuda gheeda, “Ng'eada, ak gaydaanyi ghaheang'wa.” Hean ghang'eat Sawli, ak gaweay goodeayi aba naweeda.

²⁷ Iidu damanda beawa ea ghwahita muudeanooda mujiini, gwayeesha Samweli Sawli, “Eeshiina siida gadiyeeda asheeda una mwadi, ak goosheeda siida gadiyeeda ak gimiinaadi ang'iing'i aba hiji gilinuwaas, ak gearukuneey ng'asheanda ASEETA.”