1 SAMWELI 8 - Bibliyeeda Ghaydit

Buuneeda gagasa sugoocheanda

¹ Iimuchu nea ghawaasiit Samweli, ghwanung' ghoah orjoagaaschi fuga laja girgweaguutka aba jeeda ng'eanyiida Israeli.

² Gheawunga orjeedaanyi was duweacheeda geeguura Yoeli, nea gheawunga orjeedaanyi bea iyeenya geeguura Abiya; ak ghoah fuga laja girgweaguutka aba Beer-sheba.

³ Iidu orjoagaaschi ea mwaada geeshta ghwaan, ak ghwayam geat gagasa lapiya; iissa geeseawa nea gahuta gitoabiiw.

⁴ Ng'ata ghabwat geat gweargwa Israeli ak gaweay heeda Samweli aba Rama,

⁵ ak gwayeesha niny, “Ng'ula, ang'iing'i niwaasiidi nea orjoagaagu eameana geashtaang'u; asi ghamneawa geaneasa sugoocheanda jea ghoahaaghwaneasa eewuurjeewana eemoojiga suurja.”

⁶ Ak ghoanyareas Samweli ng'asheanji iisirukusi gideaba, “Nyakneasa sugoocheanda jea ghoahaaghwaneasa.” Ak ghamwaash Samweli NG'UTAMIIDA.

⁷ Ng'ata gwayeesha NG'UTAMIIDA Samweli, “Aleeysiina ghuusiga buuneeda aba ng'asheega sean rukuneey; aba gideaba mafoolnyi, gafoolan aniineeda eawooschi sugoocheanda haweewa saawa.

⁸ Aba giteena ng'asheega sean nisinnean saawa, ghang'eada damanda ghayi earuuni Misri ea ghoah ghamneawa, iissa gwanung'usean heeda ak ghabwat aseecheeka suuk, nih ea gidasimaneey eara ang'iing'i.

⁹ Asi ghamneawa, aleeysiiniit ghuusiga nyaawa; ak iissa ginung' eaghus gideaba gireekusi saawa, ak giihiimsi gidagasa sugoocheanda jea goombal saawa.”

¹⁰ Ng'ata gwarukuta Samweli ng'asheega sean bea NG'UTAMIIDA gwarukusa buuneeda ng'al niny sugoocheanda.

¹¹ Gwayeesha, “Suh ng'asheega jea gwasinneegwa sugoocheanda jea goombaleegwa: gaygageanu orjoogeagwa ak ghwanung' gafur mutukwajeagaaschi nea ghoah fuga faraasajeagaaschi, nea gwasalda aba madeeda mutukwajeagaaschi;

¹² ak gaygwaloosa geaw shirikareeda hees jea goombal fih sagalama ea shirikareeda jea goombal fih haradam ea damanamughuush, nea mwaatkwa ghabwar ng'eanyiidaanyi ak ghwalach beagaaschi, nea gwasin dabitaanyi bea ng'ucheeda ea haleanjeeda mutukwajeagaaschi.

¹³ Nea gaygageanda haweegeagwa gwasina geediga ng'andidi nea goowoosachi nea gwasina mukaate.

¹⁴ Ak gaygageanda madameegeagwa miyaasiin ea madameega sabiibu ea saytuunajeega ak ghoadaw fugaaschi bea gadiyeeda.

¹⁵ Ak gaygageanda gilagi aba jeemba gilatamanamughuush bea boogeagwa ea aba madameegeagwa bea sabiibu ak ghoadaw fugaaschi ahaaghwa ng'eanyiida ea fugaaschi bea gadiyeeda.

¹⁶ Ak gaygageanda headigeagwa bea gadiyeeda ea haweegeagwa bea gadiyeeda, ea dugweagwa gea miyaasiin ea digeenigeagwa, ak ghwanung' gwasin gadiyeadaanyi.

¹⁷ Ak gaygageanda gilagi aba jeemba gilatamanamughuush aba gisilga, ak gajahuuwa soomjoagaaschi.

¹⁸ Nea aba eaweedida gajooyeawda aba badayda sugoocheandeang'wa, ghayi ooloosi geat; ak ea maygooleeyseegwa iit NG'UTAMIIDA eaweedida.”

¹⁹ Ak ghaheawa buuneeda gooleeysiit ghuuta Samweli; ak gwayi, “Manda! Geegasayi sugoocheanda jea ghoahaaghwaneasa,

²⁰ ak abeeda geewuurjeewi eemoojiga sean, ak ghoahaaghwaneasa sugoocheandeanya ak goosheedeawaneasa aba ng'ucheedeanya.”

²¹ Iidu nea ghwayiiy Samweli ng'asheega sean bea buuneeda, gabiikta gwarukusa iidiga NG'UTAMIIDA.

²² Ng'ata gwayeesha NG'UTAMIIDA Samweli, “Aleeysiiniit ghuusiga nyaawa, giidawi sugoocheanda.” Hean gwayeesha Samweli fuga Israeli, “Daba siisi weah mujiineadaanyi.”