1 SAMWELI 6 - Bibliyeeda Ghaydit

Biiknooda sandakwajeanda neajeeda

¹ Goobiida sandakwajeanda NG'UTAMIIDA ng'eanyiida Filisti sheeh ispwa.

² Ak gaguursa fuga Filisti ashoohoodiga ea fuga bara lagheanga ak gwayeesha, “Gajeehindaan sandakwajeanda neajeeda bea NG'UTAMIIDA? Arukuneasa gajeatealdaawana naaha ea gabiikta hoorgeadaanyi.”

³ Gwayeesha saawa, “Iidealdi sandakwajeanda neajeeda bea ASEETA Israeli, adiidealdi moongeanda, eatealda nea ghoanung' goodeayi haleanjeeda ghadooweeda bea giidiinyeanda. Ak abeeda gajeahaabeagwa, ak geanal aba heedeang'wa gidalakseegwa niny.”

⁴ Ak gwayi saawa, “Haleanjeeda ghadooweeda bea giidiinyeanda jea eatayda naaha ak geeteelsi niny?” Ak ghwasha nea gwayi, “Gajea umwang'nyeew muut meeng'meeng'i ea murjean muut meeng'meeng'i, gawuurji giteena mooneeda ng'utamoojiga Filisti; aba gideaba dawneeda sunu gwanda badahuukeagwa oogasean ea badahuuka ng'utamoojigeagwa.

⁵ Asi gajasina duguuga uurji umwang'nyeekeagwa ea duguuga uurji murjeang'eedeang'wa nuusa ng'eanyiida, ak ghoakghaambiichi ASEETA Israeli; ak gwadeepa ghwanung'waada lasoodeang'wa ea aseecheekeagwa ea ng'eanyiideang'wa.

⁶ Ak ghwasaan anda ghoahang'waanyi gurooruunatka nyaawa awuurjeewana fuga Misri ea gidahang'waayda Farao gurooruunatkeagwa? Aba damanda juukeewa saawa, ea ghwanung'waada gwasiksa buuneeda gaweay?

⁷ Asi ghamneawa, asima mutukoodeesh ea duuh iyeenya sigawa miyeerasa yooki, ak girasi dugwa mutuku, ak giyaadi muhooga ghoah aheeleewana dugwa.

⁸ Ak gigeandi sandakwajeanda neajeeda bea NG'UTAMIIDA ak giyiini uhuuda mutuku, ak giyiini murdajeega sandakwajeanda bwaajih haleanjeeda was dahaabu, jea easiina niny was haleanjeeda ghadooweeda bea giidiinyeanda. Ak ginung' gawa nea goodeayi geaw.

⁹ Ak goong'ulayi; ama idaahi nea ghwaat naweeda weah ng'eang'da nyaawa, ea ghwahita Bet-shemeshi, abeeda ea niny gil dea sinneasa ng'asheanda muy muuchiin; ama masina, abeeda gajeanala gideaba mii geatindaanyi gil dea laseasa, ak goobisseasa habitkweeda.”

¹⁰ Hean gwasindunu buuneeda, ak gageanu duuh iyeenya sigawa ak gwarasa gheatkweaka yooki ak gwarasa mutuku, ak gwajapsa muhooga jeeda ghooriida.

¹¹ Ng'ata ghwayiin sandakwajeanda neajeeda bea NG'UTAMIIDA badayda mutuku, ea sandakwajeanda mida jeeda murjeang'eeda meeng'meeng'i ea haleanjeeda nyaawa uurji umwang'nyeeka.

¹² Hean ghoadoabiiw dugwa gaweay nea gagal Bet-shemeshi nea ghwaat naweeda haw, gaweay nea gooyeawdeada; nea mayamsiina geat meatkweeda geatinda dugwa ghana geatinda ghaadaam. Ak ghwaat geeshta ng'utamoojiga Filisti ea ghwahita moonghooda Bet-shemeshi.

¹³ Abeeda aba damandida ghwalach fuga Bet-shemeshi nganooyda nyaawa aba moangoachi; ak gagatkat gheanyanga nyaawa ak ghwadaah sandakwajeanda neajeeda, ak gang'weela iidaah.

¹⁴ Ak ghwaan mutuku jeeda madamnyeanda Yoshuwa aba Bet-shemeshi, ak ghamiinaada. Abeeda gwanda hoowa lagheaneeda haw; ak ghwalajaada geediga mutuku ak ghoadayda dugwa ghoah haleanjeeda ghadooweeda sighwarda bea NG'UTAMIIDA.

¹⁵ Ng'ata goorareang'u fuga Lawi sandakwajeanda neajeeda bea NG'UTAMIIDA ea sandakwajeanda mida murdeeda, mida jeeda haleanjeeda dahaabu, ak ghwayiin uhuuda lagheaneeda haw; ak ghoadayda fuga Bet-shemeshi haleanjeeda ghadooweeda sighwarda was lukghumeeda ea lukghumajeega aba eaweedida ak ghoadaw NG'UTAMIIDA.

¹⁶ Hean iidu nea ghwadaah ng'utamoojiga Filisti gili, gabiikta eaweedida ng'eanyiida Ekroni.

¹⁷ Suh umwang'nyeeka oar dahaabu aat fuga Filisti ghoah haleanjeeda ghadooweeda bea giidiinyeanda siitaw NG'UTAMIIDA: nea gaba akaleala Ashdodi, niirja gaba Gaasa, nea gaba agi Ashkeloni, niirja gaba Gati, nea gaba agi Ekroni;

¹⁸ ak ghwaat eara murjeang'eeda dahaabu, gwadeena moonneeda mujiinajeega sean bea Filisti bea ng'utamooji muut, sea mujiinajeega siimajeek ea gharang'weaka meeneaweesiina museasooda. Nea lagheaneeda haw, mida murdeeda siyiin uhuuda sandakwajeanda neajeeda bea NG'UTAMIIDA, ea muushoocheanda gil ea ghoah askweareani aba jeeda madamnyeanda Yoshuwa mida Bet-shemeshi.

¹⁹ Ak ghabwar fuga mwaatkwa bea Bet-shemeshi, aba gideaba goong'weersa jeeda sandakwajeanda neajeeda bea NG'UTAMIIDA; ak ghabwar fih laadam ea damanamughuush aba jeenyaawa, ak gagiisan aba gideaba nibwar NG'UTAMIIDA fuga saang'a aba jeeda buuneeda.

Sandakwajeanda neajeeda aba Giriyat-yearimu

²⁰ Hean gwayi fuga Bet-shemeshi, “Ghoamu ng'eaha ghamiinaada aba madeeda NG'UTAMIIDA was ASEETA ghaydidiin? Ak niny gaygawa heedeabeang'a nea ghabeawa heedeanya?”

²¹ Ak geecheakta giijasoodiga gaweesa fuga ng'eanyiida Giriyat-yearimu, ak gwayeesha, “Fuga Filisti niideelu sandakwajeanda neajeeda bea NG'UTAMIIDA. Ahiing'aana ak ghoascheang'di ayaada heeda oopiiti.”