1 SAMWELI 5 - Bibliyeeda Ghaydit

Sandakwajeanda neajeeda aba jeeda fuga Filisti

¹ Muchu nea niyaat sandakwajeanda neajeeda bea ASEETA fuga Filisti, ghwaat ghang'eada Ebeneseri ea ghwahita Ashdodi;

² ng'ata gageanu fuga Filisti sandakwajeanda neajeeda bea ASEETA ak ghwaat jeeda gheeh Dagoni ak ghamiinda aba murdeeda Dagoni.

³ Iimuchu nea ghang'eatng'eat fuga Ashdodi sakteayda eaweeda bassa, ging'ulayi, niibeada Dagoni nea ghabwada jih ng'eanyi aba badayda sigeeda aba madeeda sandakwajeanda neajeeda bea NG'UTAMIIDA. Hean gageanu Dagoni ak gabiikta goodeelsa hoorgeadaanyi.

⁴ Ng'ata nea ghang'eatng'eat sakteayda eaweeda niirja, ging'ulayi, niibeada Dagoni nea ghabwada jih ng'eanyi aba badayda sigeeda aba madeeda sandakwajeanda neajeeda bea NG'UTAMIIDA, nea uhuuda Dagoni ea geatingaaschi sean gwalil aba ng'eanyi nea silajaada aba gidaghuuta; ak geapuut mughuushnata Dagoni.

⁵ Ak ghoah gidamealeapeena ashoohoodiga Dagoni mughoonyeanda gidaghuuta gheeda Dagoni sea fuga sean badiini jeeda gheeda Dagoni aba Ashdodi ea ghoah ghamneawa.

⁶ Ak ghwalas NG'UTAMIIDA fuga Ashdodi, ak ghwanung' ghabeal nea gwasawan saawa aba umwang'nyeeka, sea fuga Ashdodi ea fuga darooraka ascheayi.

⁷ Iidu nea ghwadaah fuga Ashdodi giduurji ng'asheega, gwayi, “Sandakwajeanda neajeeda bea ASEETA Israeli maygoobiida heedeanya; aba gideaba gayghwalaseasa sea aseeteanya was Dagoni.”

⁸ Hean goojeakta buuneeda ghoawaam ng'utamoojiga sean bea Filisti, ak gwayi, “Gajeahindaan sandakwajeanda neajeeda bea ASEETA Israeli?” Geasha nea geeyeesha, “Anung' eeyeadu sandakwajeanda neajeeda bea ASEETA Israeli ak geeneaweesa mujiineeda Gati.” Hean gweadu hoowa sandakwajeanda neajeeda bea ASEETA.

⁹ Iimuchu nea niyeadu, ghwalas NG'UTAMIIDA mujiini, ak ghwanung' gwahirbaban muuchi, ak gwasawan fuga mujiini, gheareemanga ea gweargwa, ak ghwalas umwang'nyeeka.

¹⁰ Ak geayaat sandakwajeanda neajeeda bea ASEETA mujiineeda Ekroni. Iidu nea ghwahita sandakwajeanda neajeeda bea ASEETA Ekroni, goojuur fuga Ekroni, “Niyeadu sandakwajeanda neajeeda bea ASEETA Israeli ghabwareasa sea fugaasa.”

¹¹ Ak goojeakta ak geabwada geat buuneesean was ng'utamoojiga Filisti, ak gwayeesha, “Ayaada sandakwajeanda neajeeda bea ASEETA Israeli, ak ghoatealdi heeda abiita, ak abeeda ea manuuseasa sea fugaasa.” Aba gideaba miyeeda niyeadu hirbabandeeda mujiineesean, aba gideaba ghoorjooda ASEETA aahaw muuchi;

¹² nea fuga mameewa gealasa umwang'nyeeka, ak ghwahita shooka mujiini humng'eeda.