1 SAMWELI 4 - Bibliyeeda Ghaydit

Ging'ooyda sandakwajeanda neajeeda

¹ Muchu gaweay fuga Israeli gang'uchi sea fuga Filisti; ak gawus aba Ebeneseri, nea gawus fuga Filisti aba Afeki.

² Ng'ata gwajip geat fuga Filisti aba madeeda fuga Israeli, hean iidu nea ghagha ng'ucheeda, ghwajoar fuga Filisti fuga Israeli, ak ghabwar fuga nyiit sagalamnyooji ang'wan aba heeda sing'ucheesa.

³ Iidu nea gabiigu lugooda museasooda, gwayi gweargwa Israeli, “Ghwasaan anda NG'UTAMIIDA ghwanung' ghwajoareasa fuga Filisti askweareani? Eaniyean eeweaya eeyeana sandakwajeanda NG'UTAMIIDA aba Shilo, ak abeeda ghwaan jeedeanya ak ghaweadeasa gwalealneasa aba heeda weajoodigaasa.”

⁴ Hean geecheakta buuneeda gaweay Shilo, ak gweadu aba hoowa sandakwajeanda neajeeda bea NG'UTAMIIDA bea lugweega, mida uhuuda geeruubajeanda; nea orju iyeenya bea Eli, was Hofni ea Finehasi, abeeda gwanda heeda sandakwajeanda neajeeda bea ASEETA.

⁵ Iimuchu nea ghwahidu sandakwajeanda neajeeda bea NG'UTAMIIDA jeeda museasooda, goojuur fuga sean bea Israeli aba uurda, ea gwaduumduum ng'eanyiida.

⁶ Hean nea ghwayiiy fuga Filisti giijuureanda ea ghuuta nyeashta, gwayi, “Nyeashi haw nyaasha jeeda museasooda fuga Ebraniyahiin gideabeadaanyi naaha?” Iidu ghwayiiy gideaba nihidu sandakwajeanda neajeeda bea NG'UTAMIIDA jeeda museasooda,

⁷ hean ghabeal fuga Filisti, aba gideaba gwayi, “Nihidu aseeta jeeda museasooda.” Ng'ata gwayi, “Siisheali! Aba gideaba manda ng'asheanda nipnu uurji nih aba mwadi.

⁸ Aseasa siisheali! Gaygwalealneasa ng'eaha aba heedeaba aseecheeksu mideawa uurjeengean? Suh aseecheeka ghayi las uhuuda fuga Misri aba gilinyoo ea muy aba dareapcheeda.

⁹ Oahhang'waanya geat, ak goowuurjeewi headiga, Ea Filisti, ak ea deahuuy soomjooga fuga Ebraniya ak gawuurji gidaghayi wasta saawa soomjoagaasa; oomajeekta geat headiga ak goong'uchi.”

¹⁰ Hean gaweay fuga Filisti ng'ucheeda, ak geajoar fuga Israeli, ak gamng'aw, ak gaba siisi weah ng'eang'da nyaawa; ak geabwar fuga saang'a, aba gideaba geabwar fih sagalamnyooji diktam ea damanamughuush was shirikara beawa geeshanga.

¹¹ Ak geayaat sandakwajeanda ASEETA; nea orjooga asiyeenya bea Eli was Hofni ea Finehasi, gealajaada gheatkweaka.

Miyeeda Eli

¹² Hean ghafwach siida Benjamini aba madeeda ng'ucheeda, ak ghwaan Shilo askweardida, nea nibwaashaada hang'weakaaschi nea ning'alsa uhuudaanyi sigeeda.

¹³ Damanda hina abeeda Eli goobideada aba uhuuda hoorgeadaanyi aba ghuuta naweeda nea ghoaleaydiit, aba gideaba gwasawana jeadaanyi aba sandakwajeanda ASEETA. Iidu nea ghwahidu siida jeeda mujiini ak ghoadayda iita, gooyeawda mujiineesean.

¹⁴ Hean iiy Eli ghuuta shookcheanda, gwayi, “Giijuureanji gaba naaha?” Deagheata ghwalamwajaada siida ak gawa gwarukusa Eli.

¹⁵ Abeeda Eli gaba gweanyeew seedam ea damasis nea gheanyangaaschi ea nibur ak ea niriikghta ea mudu ghwadaah gil.

¹⁶ Ng'ata gwayeesha siida Eli, “Aniini geawooschi siida leabu heeda ng'ucheeda; aniini geawapni ng'ucheeda askweareani.” Ak gwayeesha, “Ak gawuurjiin ng'ucheeda, orjeedeanyu?”

¹⁷ Ghwalamda siida eadu iita ak gwayeesha, “Fuga Israeli nimng'aw aba madeeda fuga Filisti, ak ea sibwar fuga saang'a; ak eara orjoagaagu asiyeenya, Hofni ea Finehasi, ea nimeewa, ak sandakwajeanda ASEETA ea sigeanda.”

¹⁸ Hean nea gwarugu sandakwajeanda ASEETA, ghoabeadaawa Eli bwadaw aba uhuuda hoorgeadaanyi aba murdeeda dooshta; ak gagiinya gheata ak ghami, aba gideaba niwaasiit, ak ea durumwana. Ak ea niihaaghwa Israeli gweanyeew haradam.

Miyeeda masinung'weanda Finehasi

¹⁹ Damandida gagweayiit gatmooda orjeeda siguura Finehasi, ak ea niriikghta gwaji, Hean nea ghwayiiy iita gideaba siyaat sandakwajeanda ASEETA ea gideaba gheambasiyeadaanyi ea siyeadaanyi nimeewa, gwatkuy ak gwaji; aba gideaba ghwalach.

²⁰ Iidu nea ghwariikghta ghami gwayeesha deepshoodigaaschi, “Adibeali, aba gideaba nijiili baleanda.” Ea mwasha ghuuta ghana gooleeysiit.

²¹ Ak gaguura gheawunga baleanda Ikabodi, nea gwayi, “Nibeawa giigheambiita Israeli.” Aba gideaba siyaat sandakwajeanda ASEETA aba miyeeda gheambasiyeadaanyi ea dea siyeadaanyi.

²² Ak gwayi, “Nibeawa giigheambiita Israeli, aba gideaba siyaat sandakwajeanda ASEETA.”