1 SAMWELI 30 - Bibliyeeda Ghaydit

Ng'ucheeda sea fuga Amaleki

¹ Iimuchu eaweedeaba samwagu nea ghwahita Dawdi sea fugaaschi Siklagi, abeeda fuga Amaleki nighasa jih gang'uchi aba Negebu ea Siklagi. Ak ghwajoar fuga Siklagi, ak ghang'uda beasta,

² ak ghoang'waay gadeemga ea fuga sean mida jeeda, fuga manang'i ea gea hees; ak ea mabwara sih, ghoang'waay, ak ghwaat heeda weay.

³ Iidu nea ghwahita Dawdi ea fugaaschi jeeda mujiini, ghwahita nea sing'uda beasta, nea gadeemga nyaawa ea orjooga ea haweega ea siyaat soomjeandumeeda.

⁴ Ng'ata goojuur Dawdi sea fuga mideawa ak gooyeawda, ea goosheala uurjeenga ak ghwaraay gooyeawda.

⁵ Abeeda eara gadeem iyeenya bea Dawdi ea siyaat soomjeandumeeda, Abinoamu gil bea ng'eanyiida Yesreeli, ea Abigaeli was masinung'weanda Nabali bea ng'eanyiida Garmeli.

⁶ Iimuchu ea ninyareas muuchi Dawdi; aba gideaba gabaloola buuneeda gideaba gajeefuta niny lagheanga, aba gideaba buuneesean eanyareeseadi muuchi aba jeesinga nyaawa, ak gaba siisi giisan aba badahuuka orjoagaaschi ea haweagaaschi. Ak goomajeek geaw Dawdi aba heeda NG'UTAMIIDA was ASEATAANYI.

⁷ Hean gwayeesha Dawdi Abiyatari was ashoohoocheanda, was orjeeda Ahimeleki, “Eanean hang'da jea deakwealsa hamarjoojiga.” Ak gweadu Abiyatari hang'da jea eekwealsa hamarjoojiga ashoohoocheanda heeda Dawdi.

⁸ Ak ghoanyaash Dawdi NG'UTAMIIDA, gideaba “Gaydamaseaw lugoodida? Gaydaradu?” Ak ghwasha nea gwayeesha niny, “Maseawa; aba gideaba huumwa gayrani ak gajareada sean.”

⁹ Hean gwasimsa Dawdi beata sea fih bughalaji lah mideayi sea niny, ak ghwahita ghealooda Besori, heeda abiita fuga ghayi sinung'usa bwadaw.

¹⁰ Ng'ata gawa Dawdi nea gamaseaw nea goodeayi niny sea fih bughalaji ang'wan; ak gahuuydean fih bughalaji iyeenya, was fuga bur raay ghoaghaawa ghealooda Besori.

¹¹ Ak ghwanyas siida Misri aba ng'eanyiida bwara, ak gweadu heeda Dawdi; ak geataw mukaate ak ghwaak, ak geataw beega jea ghwali,

¹² ak geataw banakcheanda mukaate ea shaboogheecheanda ea muschoon iyeenya bea sabiibu. Iing'ata nea niihiit agiischooda, gaheaba gurooroadaanyi; aba gideaba mii ghwaak mukaate ghana ghwali beega aba askwearjooji samwagu eawa ea askweari.

¹³ Ghwalamda Dawdi ak gwayeesha niny, “Ang'iing'i ng'eaha? Ak gileabu ng'eanyiida yeenu?” Gwayeesha, “Aniini geawooschi gheareemaneeda ng'eanyiida Misri, was siida gadiyeeda siida Amaleki; ak gwanung'usean bwadaw siideanyu haw aba gideaba ghaamnyaanyi ghamneawa gamuchu samwagu.

¹⁴ Ak ea sing'ucheewi ng'eanyiida Negebu mida fuga Gereti ea dea ng'eanyiida Yuda, ea Negebooda Galebu; ak geang'udi Siklagi beasta.”

¹⁵ Ghwalamda Dawdi ak gwayeesha niny, “Gajaadaan ea eerana lugoodida?” Ak gwayeesha niny, “Aga habeawooda aba badayda ASEETA, gideaba maybwaraan, ghana gideaba mwajadaydanaan ak giyiinyaan geatinga siideanyu haw, ak abeeda gaydaanyi eemaseawa lugooni.”

¹⁶ Iidu nea goodeayi, ging'ulayi, ghwadarda aba badayda ng'eanyiisean, nea gweagiischi nea gwaleeshi nea ghang'was, aba badayda haleanjeeda sean saang'a aas aba ng'eanyiida Filisti ea aba ng'eanyiida Yuda.

¹⁷ Ak ghabwar Dawdi ghang'eada mikteayda aseeta ea ghwahita shing'adeedeaba eaweeda niirja; ak ea manda boostaaneeda aba jeenyaawa, geaghus fih bughalaji ang'wan was gheareemanga ding'da ngamiyajeega ak gamng'aw.

¹⁸ Ak ghoaghuumu Dawdi haleanjeeda sean geanda fuga Amaleki; ak ghoaghu Dawdi gadeemgaaschi asiyeenya.

¹⁹ Ak ea manda gishaada, aamwanang' ghana aahaw, orjooga ghana haweega, easanga ghana gida wassean sigeanda; ak ghoaghuumu Dawdi sean.

²⁰ Ghoaghuumu Dawdi nooga sean ea dugwa; ak ghoawaas buuneeda dugiga nea goosheedeawa, nea gwayi, “Suh haleanjeeda Dawdihi.”

²¹ Hean ghwahidu Dawdi heedeaba fugiga apughalaji iyeenyean, heeta bur ak ghwaraay goodeayi sea Dawdiin, sinung'usa ghealooda Besoriin; ak gaweay roonyeeda Dawdi nea gwaroonyi fugiga mideayi sea ninyiin; hean iidu nea gwaneekiisa Dawdi buuneeda googeachi.

²² Nea fuga munyas ea fuga marachi gil aba jeeda buuneeda adeayi sea Dawdi gwayi, “Gwasin gideaba meeteayeewani, majeatawa haleanjeeda siyaaschi ak geakghuumu, majeatawa gil aba jeedeaba haleanjeedida siyaachiin ak ghoakghuumuun, geaghus gaba siisi siitaw gatmoadaanyi ea diibigaaschi, daada gealga nyaawa.”

²³ Ghwalamda Dawdi ak gwayeesha, “Adoosinyi ng'asheesu orjoogiyya, aba gidagooneasa NG'UTAMIIDA; was dea ahaaghwaneasa, ak ghwayiin geatingaasa lugooni sean laabeasa bwadawiin.

²⁴ Ak gajea ng'eaha siida jea gooleeyseegwa iit aba ng'asheanji? Aba gideaba giteena fugaaschi jea gwalaja jea goodeayi ng'ucheeda, nih gichea gwadeena fuga jea goobiida heeda dabita; ak geelaja nea geeteenyi.”

²⁵ Ak gidang'eada eaweedida ak gagal mwadi ghwanung' ghoah diigheanda ea deaweedeeda Israeli ea ghoah askweareani.

²⁶ Iimuchu nea ghwahidu Dawdi Siklagi, ghwanung' gaweay easanga mwaatkwa heeda fuga duupchi, was gweargwa Yuda nea gwayeesha, “Sukwa haleanjeeda eagoonyi was easanga weajoodiga NG'UTAMIIDA”;

²⁷ nea aba heedeaba fugiga bea Beteliin ea heedeaba fugiga mida Ramot-Negebuun, ea heedeaba fugiga mida Yatiriin,

²⁸ ea heedeaba fugiga mida Aroeri, ea heedeaba fugiga mida Sifmotiin, ea heedeaba fugiga mida Eshtemowa;

²⁹ ea heedeaba giika mida Rakaliin, ea heedeaba giika mida mujiinajeega fuga Yerameli, ea heedeaba fugiga bea mujiinajeega Geni;

³⁰ ea heedeaba fugiga bea Horma, ea heedeaba fugiga bea Borashaniin, ea heedeaba fugiga bea Ataki,

³¹ ea heedeaba fugiga bea Hebronin, ea heedeaba fugiga mida hiji wassean abiita Dawdi ea fugaaschiin.