1 SAMWELI 3 - Bibliyeeda Ghaydit

Ng'utamiida gabareasa Samweli

¹ Hean gagadiiy orjeeda was Samweli was deebaneeda Eli. Nea abeeda ng'asheanda NG'UTAMIIDA ea mwariis aba damandida; ak ea manda giirgweatka.

² Nea aba damandida Eli abeeda gheanyangaaschi ea niriikghta ea mudu ghoang'wearda, ak ea niweesa ng'oowunda, abeeda gwalil aba jeeda ghooriidaanyi;

³ abeeda gheaboong'nyeanda ASEETA mii gamis, nea abeeda Samweli gawiil geaw aba jeeda gheeda sibata NG'UTAMIIDA, heeda abiita sandakwajeanda ASEETA.

⁴ Ng'ata gaguurda NG'UTAMIIDA, “Samweli! Samweli!” ak gwayeesha, “Aniini geandi hiji!”

⁵ ak ghafwach gawa heeda Eli, ak gwayeesha, “Aniini geandi hiji, aba gideaba giguurnean.” Ng'ata gwayeesha niny, “Aniini miidaguuru; biikta wiila geaw.” Hean gawa ak gawiil geaw.

⁶ Ng'ata gabiikta gaguurda NG'UTAMIIDA, “Samweli!” Hean ghang'eat Samweli ak gawa heeda Eli, ak gwayeesha, “Aniini geandi, aba gideaba giguurnean.” Hean gwayeesha, “Aniini miidaguuru, orjeedeanyu; biikta wiila geaw.”

⁷ Abeeda Samweli miighwanal NG'UTAMIIDA, nea ng'asheanda NG'UTAMIIDA abeeda ea miyeehiimsa niny.

⁸ Ak gabiikta NG'UTAMIIDA gaguursa Samweli deaba samwagu. Ak ghang'eat ak gawa heeda Eli, ak gwayeesha, “Aniini geandi hiji, aba gideaba giguurnean.” Hean gwajeeng'u Eli gideaba orjeeda gaguursa NG'UTAMIIDA.

⁹ Ng'ata gwayeesha Eli Samweli, “Una, wiila geaw; ama guurneey, abeeda giyeeshi, ‘Rukuni, NG'UTAMIIDA, aba gideaba ghwayiiy siidaang'u bea gadiyeeda.’” Ng'ata gawa Samweli gawiil geaw aba jeeda ghooriidaanyi.

¹⁰ Iidu ghwahidu NG'UTAMIIDA ak ghamiinaada aba hoowa, ak gaguurdeayda gidagwachi, “Samweli! Samweli!” Ak ghwalamda Samweli ak gwayeesha, “Rukuni aba gideaba siidaang'u bea gadiyeeda gwayiing'shi.”

¹¹ Ng'ata gwayeesha NG'UTAMIIDA Samweli, “Ng'ula, aniini niriikghta dasin ng'asheanda aba jeeda Israeli, jea ghwayiiy iidiga siida wassean ghaboadan.

¹² Aba eaweedida gaydasin ng'asheega sean aba badayda Eli ghayi eargu aba badaydeaba gheanyi, ghang'eada giing'eeta ea ghwahita muudeanooda.

¹³ Ak gearukusi niny gideaba niriikghta dalas uhuudeaba gheanyi ea ghwahita damanda manda muudeanooda, aba badayda munyasnacheeka nal, aba gideaba orjoagaaschi niing'eawi ASEETA, ak ea mwanung' gwaduukuuna saawa.

¹⁴ Asi gaydeaksa habeawooda gheeh Eli aba gideaba munyasnacheeka gheeh Eli majeegeanda aba lukghumeeda ghana aba haleanjeeda ghadooweeda ea ghoah damanda manda muudeanooda.”

¹⁵ Hean gwalil Samweli ea gamuchu; ak ghwajaat gidaghuudajeega gheeda NG'UTAMIIDA. Ak ghabeal Samweli ak ghoawal gwarukusa Eli gidasiihiimsa.

¹⁶ Ng'ata gaguursa Eli Samweli ak gwayeesha, “Samweli orjeedeanyu.” Ak gwayeesha, “Aniini geandi hiji.”

¹⁷ Ng'ata ghwalamda Eli ak gwayeesha, “Niny gwayeeshiineeyiin? Adiidu gifunyanaan. Gidabal gwasineey ASEETA ng'asheanji ea suuk gea saang'a, iifunyanaan gida wassean rukuneey.”

¹⁸ Hean gwarukusa Samweli ng'asheega sean nea mwafunyana niny gil. Ak gwayeesha, “Nih NG'UTAMIIDA; nung'waada gwasin gidadaah gideaba aamiy aba headaanyi.”

¹⁹ Gwahisa heeda Samweli, ak gwandeawa NG'UTAMIIDA niny ak ghoang'waay ng'asheandaanyi.

²⁰ Ak ghwanal Israeleesean ng'eada Dani ea ghwahita Beer-sheba gideaba sinung' ghoah Samweli sibaneeda NG'UTAMIIDA.

²¹ Iimuchu gabiikta NG'UTAMIIDA ghoahiimu geaw aba Shilo, aba gideaba goohiimsa geaw NG'UTAMIIDA Samweli aba Shilo aba gidarugu ng'asheanda NG'UTAMIIDA. Ak ghwahidu ng'asheanda Samweli heeda fuga sean bea Israeli.