1 SAMWELI 25 - Bibliyeeda Ghaydit

Miyeeda Samweli

¹ Iimuchu ghami Samweli; ak ghabwat geat fuga sean bea Israeli ak gagiisan aba badaydaanyi, ak geebung'sa gheanyi aba Rama. Ak ghang'eat Dawdi ak gawa dareapcheeda Barani.

Dawdi ea Abigaeli

² Abeeda gwanda siispa ng'eanyiida Maoni, sina gadiyeeda aba mujiineeda Garmeli. Siisi ea baruur muuchi; abeeda gwandeawa gisil sagalamnyooji samwagu ea nooga sagalama. Abeeda iissa ghwalajaada buudeega gisilgaaschi aba Garmeli.

³ Siisi geeguura gheawungaaschi Nabali, nea gatmoadaanyi geeguura gheawungaaschi Abigaeli. Abeeda gatmooni aamiy aba leanga ak ghabwada fughareeda, nea ng'eedeeda ea mandeawana mureeda ak ea muy seara, nea gaba dooshta Galebu.

⁴ Ak ghwayiiy Dawdi gideaba Nabali ghwalajaada buudeega gisilgaaschi aba dareapcheeda.

⁵ Ng'ata goojeakta Dawdi gheareeman damanamughuush; ak gwayeesha Dawdi gheareemanga, “Ascheang'da aweayeena Garmeli, ak ghoahiti heeda Nabali, ak gookeacheewi aba gheawungeasu.

⁶ Ak nih ea gichea ookeacheata niny: ‘Gagasa beaha hoyyoo, ak gaba gheang'u seayu, ak gaba seayu haleanjeeda sean indeawi.

⁷ Aniini naayiinyi gideaba gindeawi fuga laja buudeega gisilgaagu; nea ghamneawa jeagiischoodigaagu bea gisilga geendeawi, ak ea meesimani ng'asheega munyas, ak ea manda gidanishoadeewa saawa, aba damanda sean mideewa Garmeli.

⁸ Anyaasha gheareemangaagu, ak gaygwarukuneey. Asi nung' ghwanyas gheareemangeasu ng'asheega miyaasiin aba headaang'u; aba gideaba geapkaanyi eaweeda ghweelmeeda. Mwaasha ASEETA, ak giidaydi gida wassean indeawi ak giidawi fugaagu bea gadiyeeda ea orjeedang'u was Dawdi.’”

⁹ Iidu nea ghwahidu gheareemanga Dawdi, gwarukusa ng'asheega sean Nabali aba gheawunga Dawdi; ak ghoamuughu.

¹⁰ Ng'ata ghwasha Nabali ghuusiga fuga gadiyeeda Dawdi nea gwayeesha, “Dawdi ng'eaha? Orjeeda Yese ng'eaha? Askwearjoojisu nisaang'ayiit fuga gadiyeeda ninung'usa heeda fuga nyaawa hees.

¹¹ Gaydeasa mukaateeydeanyu ea beegeasu ea banyeegeasu heeta eanuuksi fugeasu lajaada buudeega gisilga, ak ghaadawji fuga mwaanali heeleabu?”

¹² Hean ghwayam geat gheareemanga Dawdi, ak gabiigu ak gwarukusa niny ng'asheesu seaniin.

¹³ Ghwalamda Dawdi ak gwayeesha fugaaschi, “Daba siisi ashaash ng'utaanyi!” Ak gaba siiisi ashaash ng'utaanyi; eara Dawdi ghoashaash ng'utaanyi; ak ghwaat geeshta Dawdi fuga nyiit bughalaji ang'wan, nea ghwanung'wa bwadaw fih bughalaji iyeenya fuga haleanjeeda.

Ghaweat Abigaeli Dawdi

¹⁴ Hean gwayeesha gheareemaneanagi Abigaeli, was gatmooda Nabali, “Ng'ula, Dawdi goojeagu giijasoodiga aba dareapcheeda googeachi siideanya haw; ak goong'eawi.

¹⁵ Nea buuneeda ea miyaasiin aba heedeanya, ak masimaneasa gidamuy, ak ea mii ghwaroadaneasa gil damanda sindeewi jarooda, aba damanda siiteayeewi saawa;

¹⁶ aba heedeanya saawa ghamarda gil eawa ea askweari, aba damanda sean nea geahaaghwi gisilga.

¹⁷ Asi ghamneawa nala ng'asheanji ak giipkaadi gichea sina; aba gideaba gwanda gidamuy sibada sinooda aba badayda siideanya haw ea aba badayda fugeaba gheanyi sean, aba gideaba niny mii siida muy gil ea ghwaraay buuneeda goobalool.”

¹⁸ Ng'ata ghwalamwach Abigaeli, ak gageanu mukaataji bughalaji iyeenya, ea sheargwi iyeenya bea difaayi, ea gisil muut sibeash muuchi, ea gweeraji muut bea booga sibeash, ea muschoon bughala bea sabiibu ea mukaataji bughalaji iyeenya bea tiini; ak ghoasari digeeda.

¹⁹ Ak gwayeesha gheareemangaaschi, “Aweayeena oosheedeawean; ang'ula, gaydamaseawneegwa.” Nea marukusiina siyeadaanyi was Nabali.

²⁰ Nea damanda ding'deawa digeeda, ak ghwahita guumda giijeeda, ging'ulayi, ghwararang'aan Dawdi sea fugaaschi nea gagalu headaanyi; ak gawa roonyeeda nyaawa.

²¹ Abeeda Dawdi ghaghay gideaba, “Aba huumwa marachi gil furooda eafurji haleanjeedeaba siisi aba dareapcheeda, ak ea manda gida wassean niroat bea siisi; ak gawalu gea munyas aba heedeanyu nea mawalna gea miyaas.

²² ASEETA sisiina ng'asheesu ea suuk gea saang'a, fuga was weajoodiga Dawdi iyaabuuchi siida wassean aba jeeda fugaaschi eara ea jeabwagi gil was baleanda, iimuchu sakteayda.”

²³ Iidu nea ghwadaah Abigaeli Dawdi, ghwalamwajaada, ak ghwararang'aana badayda digeeda, ak goobeedeaysa madeeda Dawdi nea ghabwada jih ng'eanyi, nea gwatkuy aba ng'eanyi.

²⁴ Hean goobeedeaysa geeshangaaschi ak gwayeesha, “Badaydeanyu aniini, ng'utamiideanyu, gagasa goobiida munyinda badaydeanyu; geamuscheey hudaang'u bea gadiyeeda gwarukusa iidigaagu ng'asheega, ak giyiinyi ng'asheega hudaang'u.

²⁵ Gidabal ea mang'ula ng'utamiideanyu Nabaliheeni muyiin; aba gideaba aba giduurji gheawungaaschi ea giduurji niny gil gheawungaaschi Nabali gil, ak ea dasha; nea aniini hudaang'u ea mii dadaah gheareemang'su bea ng'utamiideanyu was geah iijeaguun.

²⁶ Asi ghamneawa ng'utamiideanyu, aba gidabiideata NG'UTAMIIDA, ea gidabiideata gurooroadaang'u, aba gideaba niheawa NG'UTAMIIDA ahiida foojeanda ak ea adiwaldi mureandooda aba geatingaagu ang'iing'i, asi nung'waada weajoodigaagu ea fugiga gasa gwasin ng'asheega munyasiin aba heeda ng'utamiideanyu gawuurji sea Nabali.

²⁷ Asi ghamneawa haleanjeeni eadu siidaang'u bea gadiyeeda heeda ng'utamiideanyu gagasa eataw gheareemanga aat geeshta ng'utamiideanyu.

²⁸ Geamuscheey samsiina giidiinyeanda hudaang'u; aba gideaba aba huumwa NG'UTAMIIDA gaygwasissa ng'utamiideanyu gheeda majeek, aba gideaba ng'utamiideanyu gang'uchi ng'ucheeda NG'UTAMIIDA; ak ea majeanyasa jeadaanyi munyinda aba eawoojigaagu sean.

²⁹ Nea eara ghang'eat buuneeda nea gagasa eaweagaagu, eaweega ng'utamiideanyu gajeerasa jeeda shageeda eaweega sea NG'UTAMIIDA, was ASEATAANG'U; nea eaweega weajoodigaagu ea gea jea gwahisa jarooda gawuurji gili sihisteawa makeamooda.

³⁰ Iidu nea gwasissa NG'UTAMIIDA ng'utamiideanyu ng'asheega miyaasiin ghayi rugu aba badaydaang'u, ak ghwaloanyi huwa sugoocheanda Israeli,

³¹ abeeda ng'utamiideanyu ea maygagiisan, ghana gidamuy aba guroorooda haw, ea gideaba giihiidi foojeanda mwadaagha ghana ghawalda ng'utamiideanya mureandooda, ea eaghus ea nisissa NG'UTAMIIDA siideanyu haw ng'asheega miyaas, abeeda giipkaadi hudaang'u bea gadiyeeda.”

³² Hean ghwalamda Dawdi ak gwayeesha Abigaeli, “Gagasa eakghaambiida NG'UTAMIIDA, was ASEETA Israeli, ajeakneey askweareani heedeanyu!

³³ Gidabal geebadiischeesa fughareadaang'u nea geebadiischooweey ang'iing'i was dea adealan askweareani ea mwaahiidani foojeanda ghana dawalda mureandooda aba geatindeanyu aniini!

³⁴ Nea aba huumwa gidabiideata NG'UTAMIIDA was ASEETA Israeli, was dea ghayi adealan ea measawaneey, nea gwachi ea maylamwajaana deaptanaan, aba huumwa Nabaliheeni gwachi majeenung'usa eara baleanda was orjeanagi, iimuchu sakteayda.”

³⁵ Ak ghoang'waay Dawdi aba headaanyi gideana geadi niny; ak gwayeesha gatmooda, “Asi siyeang'da nea gibeahi hoyyoo ea una gheang'u; ng'ula, aniini naayiinyi ghuutaang'u, ak gaydasin gidigasayi.”

Ghami Nabali ak ghaghi Dawdi Abigaeli

³⁶ Ng'ata ghwaan Abigaeli heeda Nabali; ak gingulay gwasin ghweelmeeda aba gheanyi, uurji sea ghweelmeeda sugoocheanda. Nea abeeda guroorooda Nabali aamiy, ak ea boogideat muuchi; ak ea marukusiina niny eara gil bwak ea goorearu aseeta.

³⁷ Muchu sakteayda, nea niisheala Nabali booktuumeeda, hean gwarukusa gatmoadaanyi ng'asheesu, ak gagiisan gurooroadaanyi, ak ghwayamwa gawuurji lagheaneeda.

³⁸ Iimuchu nea ning'ata eawooji damanamughuush ghwalas NG'UTAMIIDA Nabali; ak ghami.

³⁹ Hean nea ghwayiiy Dawdi gideaba nimi Nabali, gwayi, “Gagasa eebadiischeesa NG'UTAMIIDA walda giing'weaka ghayi aanyaschi aba geatinda Nabali, ak ghoadeala siidaanyi bea gadiyeeda sinooda ng'asheega munyas; nea NG'UTAMIIDA ea niwalda mureandooda aba heeda Nabali aba ng'asheagaaschi munyas.” Ng'ata goonyeari Dawdi Abigaeli ghoah gatmoadaanyi.

⁴⁰ Iimuchu nea ghwahita fuga gadiyeeda Dawdi heeda Abigaeli aba Garmeli, gwayeesha saawa niny, “Aseasa goojeakneasa Dawdi headaang'u eayaadeay huwa gatmoadaanyi.”

⁴¹ Hean ghang'eat ak ghwahiiy geaw ea ghang'uda gheamamda ng'eanyi, ak gwayeesha, “Ng'ula, hudaang'u bea gadiyeeda siida jea goohuun geeshanga fuga gadiyeeda ng'utamiideanyu.”

⁴² Ng'ata ghwalamwach geaw Abigaeli ak ghang'eat gwading'da digeeda, sea haweagaaschi gadiiydooscheesa niny; ak ghwaat geeshta giijasoodiga Dawdi, ak ghoah gatmoadaanyi.

⁴³ Ak ghaghi Dawdi eara Ahinoamu bea ng'eanyiida Yesreeli; ak ghoah duwaawi gadeemgaaschi.

⁴⁴ Abeeda Sawli niidaw Mikali hudaanyi was gatmooda Dawdi, Balti was orjeeda Laishi, was siida mujiineeda Galimu.