1 SAMWELI 2 - Bibliyeeda Ghaydit

Hana ghamwaash ghawooda

¹ Hean eara ghamwaash ghawooda nea gwayi, “Gurooroodeanyu gahoosan aba heeda NG'UTAMIIDA; nea uurdeanyu ghoaghaambiit NG'UTAMIIDA. Ghuuteanyu gwajuuga weajoodigeasu, aba gideaba geahoosanyi aba jeeda lealeanoadaang'u.

² “Manda siinuut ghaydit ea gawuurji NG'UTAMIIDA, manda siinuut murdeadaang'u; ak ea manda lagheaneeda uurji ASEETEANYA.

³ Adagudubaloola muuchi nea gighwari geaw, ak ea adagwarina ghuutaang'u ng'asheega ghwarjeeda; aba gideaba NG'UTAMIIDA ASEETA mideawa fughareeda, ak aba niny gaygoorgweaksa ng'asheega sin buuneeda.

⁴ Ghuweanga fuga mideawa uurjeenga sihirjeaweada, nea gea ng'arng'ari gamajeekcheewiidi.

⁵ Fugiga ghayi lang'uudeadiin gwasin gadiyeeda aba nyasooda hamita, nea fugiga bearji jaloodean ea mudu gaba jalu. Ak gadeemga maji ea niji diibi ispwa, nea gheamata mideawa diibiga saang'a ea meepuusiina earagi.

⁶ NG'UTAMIIDA iissa gwanuus nea gweatu eaweega; nea ghwaat ng'eanyi ea ghwahita uuta ng'eanyiida heeda maloonghajeega ak gabiikta gooscheeng'u.

⁷ NG'UTAMIIDA iissa ghwanung' gabarbariidi fuga mwaatkwa nea goobaruur mwaatkwa; ak ghoamwanaay, nea gooheetu.

⁸ Iissa goodiing'u fuga barbari ghang'eatng'eada jeeda birjeanda; ak gagatkat fuga gasa haleanjeeda aba raghwata deareeda, ak ghwanung' gwandeayi sea sugoodiga hees nea gwahearan hoorgeeda ghaambiidaat. Aba gideaba daranajeega ng'eanyiida gaba NG'UTAMIIDA, nea iheenga nyaawa ea niyiin ng'eanyiida.

⁹ “Gayghoahaaghwa geeshanga fugaaschi doobiiweadi; nea fuga munyas gajeesachsa jeeda misaneeda; aba gideaba siida maygwajooriischeewa uurdaanyi.

¹⁰ Weajoodiga NG'UTAMIIDA gajeegul uhuuda ea ghoah basanga; ak gayghoaghweandan aba badahuuka nyaawa aba humng'eeda. NG'UTAMIIDA gaygoorgweaksa muudeanooda ng'eanyiida; ak gayghoadaw sugoocheandaanyi uurda, nea goomajeek uurda siidaanyi amwaar.”

¹¹ Ng'ata gabiikta Elikana ghoah aba Rama. Nea orjeeda gagadiiyeesa NG'UTAMIIDA, aba madeeda Eli was ashoohoocheanda.

Orjooga Eli

¹² Abeeda orjooga Eli fuga munyasi; ak ea mwanala NG'UTAMIIDA.

¹³ Nea gadiyeeda ashoohoodiga aba heeda buuneeda iissa iyeadu siida wassean lukghumeeda, iissa ghwaan siida gadiyeeda bea ashoohoocheanda, damanda lalaja banyeega, nea gweana gheadi giskisiida mideawa iidi samwagu,

¹⁴ ak ghoabuuta jeeda dahuuda, ghana ea buurda, ghana ea furinyajeanda ghana ea sirbiida; ak abeeda gidida jea gweadu giskisiidean gaygageanda ashoohoocheanda. Ak geesissa fuga sean bea Israeli aba Shilo was gea hidu hoowa.

¹⁵ Iimuchu, damanda miyeeghwardaawana ghashneeda, gayghoan siida gadiyeeda bea ashoohoocheanda ak gwayeesha siida sina lukghumeeda, “Adawa ashoohoocheanda banyeega jea ghabeash; aba gideaba mayghamwas gea siiwu jea gwaleabu heedeang'wa, geaghus gea shabeadi.”

¹⁶ Ama deepa gwayeeshiineey siida “Nung' ghanyi goosheeda ghabeash saawa ghashneeda, ak abeeda gigeandi heeda iimuusi igasayi,” abeeda gaygwayi niny, “Manda goona ghamneawa; ea migooni, gaydageanda aba uurda.”

¹⁷ Abeeda riing'eedeaba fiisu ea niheedu muuchi aba madeeda NG'UTAMIIDA; gafool haleanjeeda ghadooweeda bea NG'UTAMIIDA.

Samweli aba Shilo

¹⁸ Abeeda Samweli gagadiiy aba madeeda NG'UTAMIIDA, nea gookwa hang'da miy rassa mananda.

¹⁹ Nea iissa ghaamwat gwasissa niny hang'da mwanang' gul ng'eanyi gilakweay ak gweasa, damanda siyeang'daawa sea siyeadaanyi ghoadayda lukghumeeda giliwas gweay.

²⁰ Hean gabadiischeesa Eli Elikana sea gatmoadaanyi, nea gwayi, “Gagasa gagooneegwa NG'UTAMIIDA diibiga aba gatmooni aba badayda siileeda ghayi adaw NG'UTAMIIDA”; ak abeeda gaygabiikta gheanyaawa.

²¹ Muchu ghabwayda NG'UTAMIIDA Hana, ak gagweayiit ak gwaji orju samwagu ea hawi iyeenya. Ak gwahisa heeda Samweli aba madeeda NG'UTAMIIDA.

Eli sea orjoagaaschi

²² Iimuchu ea niwaasiit Eli muuchi, ak ghwayiiy ng'asheega sean sissa orjoagaaschi fuga sean bea Israeli, ea gida iissa gwaluudayeata sea gadeemga gadiydooschi aba ghuuta maheemajeanda siroondooscheesa.

²³ Ak ghwalamda ak gwayeesha saawa, “Ghwasaan inyas goosinyi ng'asheesu? Aba gideaba naayiinyi aba heeda buuneesean ng'asheega munyas oosinayi.

²⁴ Manda, orjoogeasu; suh mii ng'asheega miyaasiin gil aayiinyi aba heeda fuga NG'UTAMIIDA nea gabaloola.

²⁵ Siida iisissa siida niirja riing'eeda, gaygawa ASEETA dageascheeda gooduupchi; nea siida isin riing'eeda aba badayda NG'UTAMIIDA, gayghoamu ng'eaha gwasin giiduupcheeda aba headaanyi?” Aba gideaba maygooleeysiit ghuuta ghwaan; aba gideaba nibada NG'UTAMIIDA gideaba gayghabwar saawa.

²⁶ Hean gwahisa heeda orjeeda was Samweli nea ghabwariiy NG'UTAMIIDA ea buuneeda.

Ramooranga aba badahuuka fuga gheeh Eli

²⁷ Iimuchu ghwahidu siida ASEETA heeda Eli, ak gwayeesha niny, “Nih gidarugu NG'UTAMIIDA, ‘Nea ea miideahiimsa geaw gheeda ghweandaang'u damanda mideewa ng'eanyiida Misri nea soomjooga gil aba gheeh Farao.

²⁸ Ak ghaaloachi niny aba jeeda dooshinga sean bea Israeli ghoah ashoohoocheandeanyu, ghwascheang'da gawa heeda wagiida, ak ghaghwarda geediga ng'andidi, nea gookwa hang'da aba madeedeanyu; ak ghaadawji ghaheang'wa haleanjeeda sean bea ghadooweeda sighwarda aba jeeda fuga Israeli.

²⁹ Ak abeeda ghwasaan inyas ging'uli gheang'da muy haleanjeedeanyu was lukghumeeda ea haleanjeedeanyu bea ghadooweeda eargu, ak gisisi mureeda orjoagaagu ea ghang'alan nea gwariisha aba haleanjeeda madeeda bea gilinyoo ghaghadoawanda fugeasu was Israeli?’

³⁰ Ng'ata gwayi NG'UTAMIIDA was ASEETA Israeli: ‘Aniini gearugu gideaba gheang'u ea ghaheang'wa gayghapka nea gaweay aba madeedeanyu damanda manda muudeanooda’; ak ghamneawa gwayi NG'UTAMIIDA: ‘Gagasa gwasheagiidanean ng'asheanji; aba gideaba fuga sinnean mureeda gaydasissa, nea fugiga foolaniin gaydafool.

³¹ Asi ng'ula, gayghwahidu askwearjoojiga, jea dageandeawa uurdaang'u ea uurda ghaheang'wa, ak abeeda ea maygwanda ghaheang'wa gweargweeda.

³² Abeeda gayng'uleena gheanyanga munyas haleanjeeda sean bea miyeenooda jea ghwanyas fuga Israeli; ak ea maygwanda gweargweeda jeeda ghaheang'wa damanda manda muudeanooda.

³³ Nea siideang'wa mwaasaji aba heedeanyu bea wagiida gayghaghu ak goobuus gheanyangaaschi nea gagiisan aba gurooroadaanyi; nea abeeda fugaagu sean ahaada bea ghaheang'wa gaygameewa aba ng'uta gawuurji fuga gealaan.

³⁴ Ak gili jea gabussa orjoagaagu asiyeenyean, Hofni ea Finehasi, gayghoah gwadeagooda aba headaang'u: ak gaygameewa duwaawi aba eaweecheanjagi.

³⁵ Ng'ata gaydaloosa geaw ashoohoocheanda doabiiwaat, jea gwasinda ng'asheega gidagasiida mida jeeda gurooroodeanyu ea jeeda fughareedeanyu; ak gaydadeeksa gheeda huumwa, ak gaygawa gah nea gwarita aba madeeda siideanyu simwaar damanda manda muudeanooda.

³⁶ Nea siida abit aba jeedeaba fugeaba gheang'u gayghoan gamus shiliingajeanda ghana mukaate, nea gwayi, “Geamuscheey iinaan jeemba gheawagi bea ashoohoocheanda, ak abeeda ghaayaaji banakcheanda mukaate.”’”