1 SAMWELI 16 - Bibliyeeda Ghaydit

Geamwaar Dawdi ghoah sugoocheanda

¹ Gwayeesha NG'UTAMIIDA Samweli, “Gaygiisana, aba badayda Sawli ea ghoah eeju, aba gideaba naaheawi niny ea moawa sugoocheanda jea goombal Israeli? Anyiida gujaweadaang'u nagheeda, ak guwi; gaydanung' una heeda Yese aba Betlehemu, aba gideaba naaloachi orjeanagi aba jeeda orjoagaaschi ghoah sugoocheanda.”

² Ng'ata gwayeesha Samweli, “Gaydabeadaan? Aba gideaba iiyiiy Sawli gaygwanuusan.” Hean gwayeesha NG'UTAMIIDA, “Una nea girjaandi meayda was haghweanda, ak giyeeni, ‘Ghaawunyi danung' ghoah lukghumeeda aba heeda NG'UTAMIIDA.’

³ Ak giguursi Yese ghwaan lukghumajeega, ak gaydaahiimneey gichea sina; ak gajamearnean siida jea darukuneey.”

⁴ Hean gwasin Samweli gidarukusa NG'UTAMIIDA, ak ghwaan Betlehemu. Ak ghapka gweargwa mujiini roonyeadaanyi nea ghaboadanaan, nea gwayeesha, “Ang'iing'i guwuni nea giyeadu hoyyooohi?”

⁵ Ak gwayeesha, “Ea geayeadu hoyyoo; Aniini ghaawunyi dasin lukghumeeda NG'UTAMIIDA; oamiini geat, ak ghoapkaanyi eeteayeena lukghumeeda.” Ng'ata ghoamiidu Yese geaw sea orjoagaaschi, ak gaguursa ghapka lukghumajeega.

⁶ Iidu nea ghwahidu, hean gang'ula Eliyabu ak gwayi, “Aba huumwa siida amwaar NG'UTAMIIDA nukwa gwanda madeadaanyi.”

⁷ Ng'ata gwayeesha NG'UTAMIIDA Samweli, “Ading'ulayi gheamamdaanyi, ghana geawundaanyi gidayang'da, aba gideaba naaheawi niny; aba gideaba NG'UTAMIIDA iissa ea moang'weeriideayda gidang'weeriideayda siida, siida iissa gang'ula ratooda siida, nea NG'UTAMIIDA gang'ula guroorooda.”

⁸ Hean gaguursa Yese Abinadabu, ak ghwanung' ghang'ata aba madeeda Samweli. Nea gwayi, “Gidabal ea mii ghwaloat NG'UTAMIIDA siisi.”

⁹ Ak ghwanung' Yese ghang'ata Shama. Ak gwayi, “Gidabal ea mii ghwaloat NG'UTAMIIDA siisi.”

¹⁰ Hean ghwanung' Yese ghang'ata orjoagaaschi ispwa aba madeeda Samweli. Ak gwayeesha Samweli Yese, “NG'UTAMIIDA mwaloada suh.”

¹¹ Ghwalamda Samweli ak gwayeesha Yese, “Orjoagaagu gwanda hiji seani?” Ak gwayeesha niny, “Ghwashoada dea mwanang' ak ging'ulayi, ghoahaaghwa gisilga.” Ghwalamda Samweli ak gwayeesha Yese, “Ajeakta buuneeda gweadu; aba gideaba majeepiitpiida ea ghwahidu hiji.”

¹² Ng'ata goojeakta siida, ak geeyeadu. Ak ea eesh, aamiy aba leanga nea gheareemaneeda majeegi. Ak gwayi NG'UTAMIIDA, “Ng'eada ak gimwaari; aba gideaba siida nihi.”

¹³ Ng'ata gageanu Samweli gujaweeda mida nagheeda, ak ghoamwaar aba jeeda orjooga ghaamwat; ak ghwahidu guroorooda NG'UTAMIIDA heeda Dawdi aba uurda ghang'eada eaweedida. Ak ghang'eat Samweli gawa, ea ghwahita ng'eanyiida Rama.

Dawdi aba madeeda gheeda sirgweacha bea Sawli

¹⁴ Hean abeeda ea ninung'usa heeda guroorooda NG'UTAMIIDA Sawli, ak gooneayi guroorooda muy leabu heeda NG'UTAMIIDA.

¹⁵ Ak gwayeesha fuga gadiyeeda Sawli, “Ng'ula ghamneawa, gooneayaneey guroorooda muy leabu heeda ASEETA.

¹⁶ Asi gagasa gwarukuneasa ng'utamiideanya aseaseeda was fugaaschi bea gadiyeeda mida hiji bea madeadaang'uun, gagasa siida geariir jea ghwalas gidoondooriida; ama abeeda hidu headaanyi guroorooda muy leabu heeda ASEETA, gayghwalas gidoondooriida aba geatindaanyi ak gayhaabwa.”

¹⁷ Hean gwayeesha Sawli, “Ghwahit, agakuuneani siida geariir aba lasooda gidoondooriida ak gooyeanean.”

¹⁸ Ghwalamda siyagi aba jeeda fugaaschi bea gadiyeeda ak gwayeesha, “Ng'ula, aniini naadaayi orjeeda Yeseheeda Betlehemu, was siida geariir aba lasooda gidoondooriida, was siida daruus biissa ea siida ng'ucheeda, baloola weaghuumeeda, was siida miy; mideayi sea NG'UTAMIIDA.”

¹⁹ Muchu goojeakta Sawli buuneeda heeda Yese, ak gwayeesha, “Nung' ghwaan Dawdeeda was orjeedang'u, ahaaghwa gisilga ak ginung' ghwaan heedeanyu.”

²⁰ Ng'ata goorjeanu Yese digeeda jea ghwaat mukaatajeega, ea shearooda difaayi, ea dayeenda, mbooyda ak ghwanung' gweasa Dawdeeda was orjeedaanyi Sawli.

²¹ Hean gawa Dawdi heeda Sawli ak gagadiiyeesa. Ak ghabwariiy Sawli muuchi, ak ghwanung' ghoah siida eada dabitaanyi bea ng'ucheeda.

²² Ak goojeakta Sawli siida gawa heeda Yese ak gwayeesha, “Nung'waada Dawdi goopteada aba hiji gwasinnean gadiyeeda.”

²³ Ama abeeda iihidu gurooroodida muy jea gwaleabu heeda ASEETA jea ghwaan heeda Sawliin, abeeda gayghoang'waay Dawdi gidoondooriida, ak ghwalas aba geatindaanyi, ak gahoosan Sawli, ak ghwanung'wa heeda gurooroodida muyiin.