1 SAMWELI 14 - Bibliyeeda Ghaydit

Yonatan ghameawda muraneanduumeeda

¹ Eaweecha gwayeesha Yonatan was orjeeda Sawli gheareemaneeda sar dabitaanyi, “Beeni, eeweaya heeda lugooda Filisti mida giigheawda.” Ak ea marukusiina ghwaan.

² Abeeda Sawli goobiita murdajeega Gibeya guumda geeta siguura goomamanga mida Migroni; nea fuga mideawa ghwahita bughalaji lah headiga.

³ Nea Ahiya orjeeda Ahitubu, was orjeeda geenyea Ikabodi, was orjeeda Finehasi, was orjeeda Eli, was ashoohoocheanda NG'UTAMIIDA aba Shilo, abeeda gookweali eefoodi. Abeeda buuneeda mwanala gideaba Yonatan nuwa.

⁴ Abeeda seawadeeda gasa ghwala Yonatan jea gwarisiina lugooda Filisti, gwanda lagheaneeda geaw was mareeta aba meatkweeni nea gwanda lagheaneeda geaw was mareeta meatkweeni niirja; ak gheawungeaba agi geeguura Bosesi, nea gheawungeaba niirja geeguura Sene.

⁵ Ak ghamiinaada lagheaneeda geaw wiilooda ng'eanyiida ghayeawa mida madeeda Mikmashi, nea niirja gwanda wiilooda ng'eanyiida biyeara mida madeeda Geba.

⁶ Hean gwayeesha Yonatan gheareemaneeda sar dabitaanyi, “Beeni, eeweaya heeda museasoodeaba fiisu meeyiilean; gwadeepa abeeda ghaweadeasa NG'UTAMIIDA aba meatkweedeanya; aba gideaba manda gida jea ghoamu ghoadeal NG'UTAMIIDA aba lealnooda ada gwandeawa fuga saang'a ghana gwandeawa fuga ng'ay.”

⁷ Ng'ata gwayeesha siidaanyi sar dabitaanyiin, “Asina haleanjeeda sean oogasayi aba iheengeagwa; ang'ula, aniini geendeayi sea agooga, aba giduurji fughareengeagwa giduurji deanyu.”

⁸ Hean gwayi Yonatan, “Ng'ula, gajeekeawsiina buuneeda, ak gajeehiimsiina geat saawa.

⁹ Ama eeshiineasa, ‘Oomeasa ea eahina heedeang'wa,’ abeeda gajeamiinaada aba heeda sindi, ak ea majeeweaya heanyaawa.

¹⁰ Ama deepa gwayi, ‘Apkaani heedeanya,’ abeeda gajeescheang'da; aba gideaba niyiin NG'UTAMIIDA saawa geatingaasa. Ak gayghoah gili gwadeagooda aba heedeanya.”

¹¹ Ng'ata goohiimsa geat lugooda Filisti; ak gwayi fuga Filisti, “Ang'ula, fuga Ebraniya gwarina jeesinga shoomeanga ghayi funyiisa geat.”

¹² Ak gaguursa fuga lugooda Yonatan sea siidaanyi sar dabita, ak gwayeesha, “Abeeni heedeanya, ak gajeahiimneegwa gil.” Ak gwayeesha Yonatan siidaanyi sar dabita, “Beeni eani geeshteanyu; aba gideaba niyiin NG'UTAMIIDA saawa geatinga fuga Israeli.”

¹³ Hean gwading'deawa Yonatan geatinga ea geeshanga, nea gamaseaw siidaanyi sar dabita. Ak goobeedeaysa madeeda Yonatan, ak ghabwar siidaanyi sar dabita;

¹⁴ nea bayiiga madeeda, ghabwar fih diktam aba heeda hita nusajeanda bugharjeanda siimu eabwar eaweecheanjagi.

¹⁵ Hean gwahirbaban jeeda museasooda, ea jeesinga madameega, ea jeeda buuneesean; ea fuga was lugooda ea mareanghooga ak ghaboadan; nea gwasaw ng'eanyiida; ak gwaheedu muuwda.

Joorda fuga Filisti

¹⁶ Muchu ghoang'wearda furiischoodiga Sawli aba Gibeya mida ng'eanyiida Benjamini; ak ging'ulayi, gwasalda eemeetuw nea gagal hiji ea hiji.

¹⁷ Hean gwayeesha Sawli fuga mideawa, “Iita buuneeda ak gisikteawi ea gwanda siida shoada.” Iidu nea gwayiida, ging'ulayi, geadaah gideaba manda hiji Yonatan ea siidaanyi sareeni dabita.

¹⁸ Ghwalamda Sawli ak gwayeesha Ahiya, “Eani hiji sandakwajeanda neajeeda bea ASEETA.” Aba gideaba sandakwajeanda neajeeda bea ASEETA goodeayi sea fuga Israeli eaweedida.

¹⁹ Nea damandida abaloola Sawli ashoohoocheandean, gwaheedu muuchi giijuureanda fuga Filisti aba jeeda museasooda; ak gwayeesha Sawli ashoohoocheanda, “Adealda geatindaang'u.”

²⁰ Iidu Sawli ea fuga sean mideawa gwasalda ak gaweay ng'ucheeda; ak ging'ulayi, ng'utpa giliwas sih googeal heeda siida gheanyaawa, ak gwaheedu deakghuyandeeda.

²¹ Nea fuga Ebraniya ghayi mideaydooschi sea fuga Filisti nea miighwahidu damandida ghayi siyeang'da sea saawa ak gaweay jeeda museasooda, ghwayam geat eara saawa ak gwandeayi sea fuga Israeli mideayi sea Sawli ea Yonatan.

²² Ak eara fuga sean bea Israeli ghayi fuysa geat jeeda heayeeniga ng'eanyiida Efraimu iiyiiy gideaba gamng'aw fuga Filisti, eara saawa gamaseaw ak gaweay ng'ucheeda.

²³ Hean gwalealu NG'UTAMIIDA Israeli eaweedida; ak gawa ng'ucheeda ea ghwasuut Bet-afeni.

Ng'asheega hidu iing'ata ng'ucheeda

²⁴ Abeeda fuga Israeli gwadeawiit aba eaweedida; aba gideaba gweaksa Sawli habeawooda buuneeda, nea gwayeesha, “Gagasa eemwaashta siida agiischi nea miighwahita shing'ada nea miidawalda mureandooda aba heeda weajoodigeasu.” Ak ea manda siida ak gil askweardida.

²⁵ Ak gaweay buuneesean jeeda dareabeeta; ak ghwanyas maleeda haw aba jeeda ng'eanyiida.

²⁶ Iidu nea gaweay buuneeda jeeda dareabeeta, ging'ulayi, iissa ghoabitpit maleeda, ak ea manda siida geanu aba geatinda ak ghwayiin ghuut; aba gideaba ghoawal buuneeda habeawooda.

²⁷ Abeeda Yonatan miighwayiiy ng'asheega rukusa ghwaan buuneeda aba habeawooda; ak ghoahaakta bileangida mida geatindaanyi ak ghang'uda jeeda maleeda, ak gageanu aba geatindaanyi ak ghwayiin ghuut; ak ghwajaada gheanyangaaschi.

²⁸ Ng'ata gwayeesha siyagi aba jeeda buuneeda, “Gweanu gwarukusa buuneeda ng'asheanda nea ghoang'waaniit aba habeawooda, ak gwayeesha, ‘Gajeamwaashta siida agiischi askweareani.’” Nea abeeda ea ning'arng'ariidi buuneeda.

²⁹ Hean ghwalamda Yonatan ak gwayeesha, “Bwaabwa ninung' gwasawana buuneeda aba jeeda ng'eanyiida; daaha gidaniweeriitiida gheanyangeasu, aba gideaba neasamu maleeni mwanang'.

³⁰ Gwachi gayghwasamiin gideaba ghwaak buuneeda hamita hearan sinyas aba heeda weajoodiga nyaawa; aba gideaba ghamneawa miyeeda fuga Filisti mii gwaheedu?”

³¹ Ak geabwar fuga Filisti eaweedida ghang'eada Mikmashi ea ghwahita Aiyaloni. Nea buuneeda gwasawana muuchi aba jalooda;

³² ak gwasalsa buuneeda haleanjeeda sihearan, ak gageanda gisilga ea heewga ea muhooga, ak gwanuuseada aba geeshangiga; ak gweaguudayi buuneeda sea foojeanda.

³³ Hean gwarukusa Sawli gideaba, “Ng'ula, buuneeda gwasissa NG'UTAMIIDA riing'eeda, gideaba ghwaak banyeega sea foojeanda.” Ak gwayeesha, “Agooga noosinyi ng'asheanda muy; ooreakreakni lagheaneeda haw ea ghwahidu heedeanyu.”

³⁴ Ghwalamda Sawli ak gwayeesha, “Adarsiina dang'adiga buuneeda, ak gooyeeshi saawa, ‘Daba siisi eadu heeydaanyi ghana gisilleandaanyi, ak goonuukusi hiji, ak ghoayaaji; ak ea adoosisi riing'eeda NG'UTAMIIDA gideaba ghoayaaji banyeega sea foojeanda.’” Ak gaba siisi eadu heeydaanyi eaweedida, ak gwanuukusa hoowa.

³⁵ Ng'ata ghwadeas Sawli heeda wagiida bea NG'UTAMIIDA; nih heeda wagiida deas bea madeeda gil sissa NG'UTAMIIDA.

³⁶ Hean gwayeesha Sawli, “Anung' eararang'aada eayaada geeshta fuga Filisti eawa ak geabwarji ea gaweeshiit; ak ea adeapuuchi siida.” Ak gwayeesha saawa, “Sina gidigasiidi.” Hean gwayeesha ashoohoocheanda, “Anung' eeneekiisiina ASEETA.”

³⁷ Ak ghoanyaash Sawli ASEETA, “Gaydararang'aada daat geeshta fuga Filisti? Gajiina saawa geatinga fuga Israeli?” Ak ea mwasha niny ghuuta eaweedida.

³⁸ Ak gwayeesha Sawli, “Abeeni hiji fuga sean hees bea buuneeda; ak ghoanali nea ghoadaayi riing'eeni gidahitaayda askweareani.

³⁹ Aba gideaba gidamideata NG'UTAMIIDA lealu Israeli, gagasa gwasunu orjeedeanyu was Yonatan, aba huumwa gayghami.” Ak ea manda siida aba jeeda buuneesean dea shaah ghuuta.

⁴⁰ Ng'ata gwayeesha fuga sean bea Israeli, “Gajoopiidana meatkweenagi, nea aniini ea orjeedeanyu was Yonatan gajeepiidana meatkweeda niirja.” Hean gwayeesha buuneeda Sawli, “Sina gididaahi gideaba ghwahit aba headaang'u.”

⁴¹ Iidu gwayi Sawli, “Ea NG'UTAMIIDA was ASEETA Israeli, ghwasaan ang'iing'i inyas mishaahi ghuuta siidaang'u bea gadiyeeda askweareani? Iideepa giidiinyeanji dandeawa aniini ghana gwandeawa orjeedeanyu was Yonatan, Ea NG'UTAMIIDA, was ASEETA Israeli, giidawi Urimu; amadeepa giidiinyeanji iimida jeeda fugaagu was Israeli, abeeda giidawi Dumimu.” Ak geayaat Yonatan ea Sawli, nea gamng'aw buuneeda.

⁴² Ng'ata gwayi Sawli, “Asi alooteaya aniini ea orjeedeanyu was Yonatan.” Ak geegeanda Yonatan.

⁴³ Hean gwayeesha Sawli Yonatan, “Rukunean gidisini.” Ghwalamda Yonatan ak gwayeesha niny, “Geasamu maleeni mwanang' aba uhuuda bileangida mida geatindeanyu; aniini nukwa, nung'waada dami.”

⁴⁴ Ak gwayeesha Sawli, “Gagasa gwasinnean ASEETA ng'asheanji ea ghwanaawda; aba huumwa gaymeawa Yonatan.”

⁴⁵ Iidu gwayeesha buuneeda Sawli, “Gayghami Yonatan, was dea ghayi eadu lealeanooda haw jeeda Israeli? Manda! Gidabiideata NG'UTAMIIDA, manda buudeanjagi bea uhuudaanyi jea goobissa ng'eanyi; aba gideaba niny gwasin gadiyeeda sea ASEETA askweareani.” Ak gwalealu buuneeda Yonatan, ea mwami.

⁴⁶ Iidu ghwanung'waada Sawli eata geeshta fuga Filisti; ak gabiikta fuga Filisti ng'eang'da nyaawa.

Gheambalmeeda Sawli ea fugeaba gheanyi

⁴⁷ Iimuchu nea niing'waay Sawli sugoocheanduumeeda ng'eanyiida Israeli, gang'uchi sea weajoodigaaschi sean aba meadajeega sean, ak gang'uchi fuga Moabu, ak gang'uchi fuga Amoni, ea fuga Edomu, ak gang'uchi sugoodiga Soba, ea fuga Filisti; nea heeda ng'ucheesa sean gwajooriischi.

⁴⁸ Ak gang'ucheewa dargooda, ak ghwajoar fuga Amaleki, ak gwalealna Israeli geatingeaba fugiga ang'waay saawaan.

⁴⁹ Orjooga Sawli Yonatan gil, ea Ishfi, sea Malkishuwa; nea gheawunga haweagaaschi asiyeenya suh: gheawunga huda was duweacheeda geeguura Merabu, nea gheawunga dea mwanang' geeguura Mikali;

⁵⁰ nea gheawunga gatmooda Sawli geeguura Abinoamu was hudeaba Ahimasi. Ak gheawunga shirikarajeandaanyi haw geeguura Abna was orjeeda Neri, was orjeeda ghamagheamata Sawli;

⁵¹ Ghweanda Sawli geeguura Gishi, nea Neri ea ghweanda Abna was orjeeda Abieli.

⁵² Abeeda gwanda ng'ucheeda ng'waan sea fuga Filisti aba damanyoojiga sean bea Sawli; nea iissa iidaah Sawli siida wassean mideawa uurda, ghana siida wassean daruus, iissa gwandeayi sea niny.