1 SAMWELI 13 - Bibliyeeda Ghaydit

Ng'ucheeda sea fuga Filisti

¹ Sawli abeeda gheareemaneeda gil, damanda miighoaweewa sugoocheanda; ak goombal Israeli gweanyeew iyeenya.

² Ak ghwaloat Sawli fih sagalamnyooji samwagu bea Israeli; ak gwandeawa Sawli fih sagalamnyooji iyeenya aba Mikmashi ea aba jeeda ng'eanyiida heayeeniga bea Beteli, nea gwandeawa Yonatan fih sagalamnyeanjagi aba Gibeya mida dooshta Benjamini; ak ghwanung' Sawli gabiikta ghoah fuga abit.

³ Ak ghwajoar Yonatan lugooda Filisti aba Geba; ak ghwayiiy fuga Filisti iita. Hean ghaghuut Sawli durumbeati aba jeeda ng'eanyiisean, nea gwayi, “Ayiing'sheena fuga Ebraniya.”

⁴ Ak ghwayiiy fuga sean bea Israeli gideaba Sawli nijoar lugooda Filisti, ea gideaba niimealu fuga Israeli aba heeda fuga Filisti. Ak geeguursa buuneeda ghapka heeda Sawli aba Gilgali.

⁵ Ng'ata ghabwat geat fuga Filisti gang'uchi sea Israeli, nea gwandeawa mutukwaji sagalamnyooji diktam ea damanamughuush, ea fuga faraasajeega sagalamnyooji lah, ea lugooda deena iseaskweanda ghuuta basooda aba seang'ayda; ghapka ak gooduuw aba Mikmashi, ea ghwahita gayeewda Bet-afeni.

⁶ Iidu nea ghwadaah fuga Israeli gideaba geesawan (aba gideaba buuneeda geaminighis), ghafuy geat buuneeda aba jeesinga gwaleadinga ea jeesinga shoomeanga ea jeesinga lagheanga hees ea jeesinga bung'eadinga ea jeesinga healatka,

⁷ nea ghoaghaawa ghushuutka Yordani ak ghwahita ng'eanyiida Gadi ea Gileyadi, abeeda Sawli gudugwanda Gilgali ak ghwaat geeshta buuneesean nea ghaboadanaada.

⁸ Ak goomeas askwearjooji ispwa, damanda ghayi rukuta Samweli; nea Samweli ea mawa ng'eanyiida Gilgali, hean gwanung'usa buuneeda niny heeda.

⁹ Ng'ata gwayi Sawli, “Ayeani heedeanyu haleanjeeda ghadooweeda sighwarda, ea haleanjeeda ghadooweeda bea hoyyoo.” Ak ghoadayda haleanjeeda ghadooweeda sighwarda.

¹⁰ Iidu nea ning'ata giidaydeayda adayda haleanjeeda ghadooweeda sighwarda, ging'ulayi, ghwahidu Samweli; ak gwarita Sawli jarooda ak gawa roonyeadaanyi ak googeachi.

¹¹ Ak gwayeesha Samweli, “Ang'iing'i nisini naaha?” Ghwalamda Sawli ak gwayeesha, “Iyaadaayi nea ghwadardaawa buuneeda heedeanyu, ea gideaba miihini askwearjoojiga hit ghayi irugu, ea gideaba ghabwat geat fuga Filisti aba Mikmashi,

¹² geayi, ‘Asi ghamneawa gayghwahidu fuga Filisti gwararang'eesean aba Gilgali, nea mii dagasa dea duukusa geaw NG'UTAMIIDA’; ak ghaadaayi gideaba ghwahit giidaydeayda haleanjeeda ghadooweeda sighwarda.”

¹³ Ng'ata gwayeesha Samweli Sawli, “Ang'iing'i gisini leendeeda; ang'iing'i miing'waanyi diigheanda NG'UTAMIIDA was ASEATAANG'U, ghayi rukuneey; aba gideaba gwachi gaygwasinyi NG'UTAMIIDA huwa sugoocheanda Israeli damanda manda muudeanooda.

¹⁴ Ak ghamneawa sugoocheanduumeadaang'u ea nimuudean; aba gideaba niloat NG'UTAMIIDA siida gasa gurooroadaanyi; ak ea nigeanu NG'UTAMIIDA siida jea ghoah sugoocheanda jea goombal fugaaschi, aba gideaba miing'waanyi ng'asheega rukuneey NG'UTAMIIDA.”

¹⁵ Hean ghang'eat Samweli, ak ghwascheang'da ghabeawa Gilgali ea ghwahita Gibeya mida ng'eanyiida Benjamini. Ak gwayiida Sawli fuga mideawa, ak ghwahita fih bughalaji lah.

¹⁶ Goobiida Sawli sea orjeedaanyi was Yonatan, sea fuga mideawa ak goobiida Geba mida Benjamini; nea fuga Filisti gooduuw aba Mikmashi.

¹⁷ Ak ghapka mareanghooga leabu museasooda Filisti nea sibwaashaada geenga ghoah samwagu; ak ghwayam geat geahagi gagal Ofra, ak gaweay ng'eanyiida Shuali,

¹⁸ ak ghwayam geat geeda niirja ak gagal Bet-horoni, ak ghwayam geat geeda niirja ak gagal moonghooda ng'utiida ng'eanyi moangoachiyda Seboimu duukusa dareapcheeda.

¹⁹ Iidu ea manda gidang'oocheanda jeeda ng'eanyiisean bea Israeli; aba gideaba gwayi fuga Filisti, “Adiidu gwasissa geat fuga Ebraniya ng'utkeaka ghana ng'utkeaka”;

²⁰ ak iissa fuga Israeli gaba siisi rarang'aada gawa heeda Filisti ghwashit mageemng'eandaanyi, ea gharinyeandaanyi, ea joomoadaanyi, ghana bardaanyi;

²¹ nea mooneeda sishitiida ea heelajeanda gil aba shidooda mageemng'eanda ea aba gharinyeanda, ea gidamwahita shekeeli aba shidooda joomajeega ea gharinga sifooriida.

²² Hean aba eaweeda ng'ucheeda ea manda ng'uta ghana ng'uta jea eanyasa geatinda siida wassean aba fuga mideayi sea Sawli ea Yonatan; nea Sawli ea orjeedaanyi was Yonatan gwandeawa.

²³ Ak gaweay lugooda Filisti ea gwasik seawadeeda Mikmashi.