1 SAMWELI 12 - Bibliyeeda Ghaydit

Samweli goorgweaksa buuneeda

¹ Ak gwayeesha Samweli fuga sean bea Israeli, “Ang'ula, neasinyi ng'asheega sean oorukunean, ak ea neagoonyeegwa sugoocheanda jea ghoahaaghwaneegwa.

² Ak ghamneawa, goong'ulayi, sugoocheanda nukwa gwanda madeedeang'wa; nea aniini ea naawaasiichi ak ea niweeshiit uhuudeanyu, ak goong'ulayi, orjoogeasu goondeawi; ak geendeaydooschi sea agooga ghang'eada damanda eawoosi gheareemaneeda ea ghoah ghamneawa.

³ Ak aniini geandi hiji; ak ghoahuuyi muushoodiga aba madeeda NG'UTAMIIDA ea madeeda siidaanyi simwaar. Neada ea neageandi deedeabeang'a? Ghana neageandi digeedeabeang'a? Ghana ea ng'eaha siida naareachi gidaanyi? Ak ea neasawanyi ng'eaha? Ak ea neageandeawi geatindeabeang'a haleanjeeda seawshooda ak ghwanung' gang'oowiidi gheanyangeasu? Asi amuuwuuni aba badaydeanyu ak gaydawalu.”

⁴ Ak gwayi saawa, “Ang'iing'i mii areadeasa gil ghana sawaneasa ghana geanda gida wassean aba geatinda siida wassean.”

⁵ Ak gwayeesha niny saawa, “NG'UTAMIIDA muushoocheanda gil aba badahuukeagwa, nea siidaanyi simwaar ea muushoocheanda gil askweareani, gideaba manda gida wassean naanyasi geatindeanyu.” Ak gwayi saawa, “Niny muushoocheanda.”

⁶ Ng'ata gwayeesha Samweli buuneeda, “NG'UTAMIIDA muushoocheanda gil, ghayi loat Musa ea Haruni ak gooruuna ghweanigeagwa jeeda ng'eanyiida Misri.

⁷ Asi amiinaada nea goomajeegiichi, ak geargweakseegwa aba madeeda NG'UTAMIIDA ak gaydargu doobiiwnata sean bea NG'UTAMIIDA ghayi sineegwa ea ghweanigeagwa.

⁸ Damanda ghayi beawa Yakobo ng'eanyiida Misri ak ghaghabwas fuga Misri saawa, hean gooyeawusa ghweanigeagwa NG'UTAMIIDA ak goojeagu NG'UTAMIIDA Musa ea Haruni, was fuga ghayi aruudu ghweanigeagwa aba jeeda ng'eanyiida Misri, ak ghoadaw ng'eanyiida goobiida.

⁹ Ak gwaroosa NG'UTAMIIDA was ASEETA nyaawa; ak ghwashaayda saawa ak ghwayiin geatinga Sisera, was shirikarajeanda haw bea sugoocheanda siguura Yabini bea ng'eanyiida Hasori, ea geatinga fuga Filisti, ea geatinga sugoocheanda Moabu; ak gang'uchi sea saawa.

¹⁰ Hean gooyeawusa NG'UTAMIIDA, nea gwayi, ‘Sisinyi riing'eeda, aba gideaba sinung'usi heeda NG'UTAMIIDA, ak geegadiyeesi Baali ea Ashtaroti; ak ghamneawa gilealnaneasa geatinga weajoodigaasa, ak gajeegadiyeeseey ang'iing'i.’

¹¹ Ak goojeakta NG'UTAMIIDA Yerubaali sea Baraka, ea Yefta, ea Samweli, ak gwalealnaneegwa geatinga weajoodigeagwa aba meadajeega sean; ak goopiitpiichi nea goobeayi seayu.

¹² Ama oadaayi Nahashi was sugoocheanda Amoni nea ghwaan ang'ucheewana, gooyeeshiinean, ‘Manda, gayghoahaaghwaneasa sugoocheanda,’ nea NG'UTAMIIDA was ASEETEANG'WA ea sugoocheandeang'wa.

¹³ Asi ghamneawa ang'ula sugoocheanda ealoachi, ghayi oomuschiin; ang'ula niyiin NG'UTAMIIDA sugoocheanda madeedeang'wa.

¹⁴ Iyoosissi mureeda NG'UTAMIIDA nea googadiyeesi nea ghoayiinyi ghuutaanyi ak ea meanung'waadani diigheanda NG'UTAMIIDA, nea ang'iing'i sea sugoocheanda ahaaghwaneegwa iyoayaachi geeshta NG'UTAMIIDA was ASEETEANG'WA, gayghwadoabiiw;

¹⁵ ea mooleeysiin iit ghuuta NG'UTAMIIDA, ak ghoaheawi diigheanda NG'UTAMIIDA, abeeda gayghwahidu geatinda NG'UTAMIIDA badahuukeagwa ea dea ng'utamiideang'wa.

¹⁶ Asi amiinaada nea goomajeekchi geat ak ghoadaayi ng'asheanji haw jea gwasin NG'UTAMIIDA aba madeeda gheanyangeagwean.

¹⁷ Neada askweareani ea maba lajita ngaanohi? Gaydamwaash NG'UTAMIIDA, ak abeeda ghwanung' ghwahidu giighweandandeeda ea roopta; ak abeeda gajanala nea ghoadaayi gideaba munyindeang'wa aahaw muuchi, ghayi oosinyi aba madeeda NG'UTAMIIDA, aba gideaba googasayi sugoocheanda.”

¹⁸ Ng'ata ghamwaash Samweli NG'UTAMIIDA, ak ghwanung' NG'UTAMIIDA ghwahidu giighweandandeeda ea roopta eaweedida; ak ghoawal buuneesean NG'UTAMIIDA ea Samweli.

¹⁹ Hean gwayeesha buuneesean Samweli, “Mwaasha ASEETA aba badahuuka fugaagu bea gadiyeeda aba heeda NG'UTAMIIDA was ASEETEANG'WA, gideaba adiidu geemeewayi; aba gideaba siihaachi aba riing'eegaasa sean ng'asheanji muyiin, ak geegasayi aseasa sugoocheanda.”

²⁰ Ng'ata gwayeesha Samweli buuneeda, “Adoabeali; agooga noosinyi ng'asheesu sean munyasiin, ak ea adoanung'waadi eadita geeshta NG'UTAMIIDA, agadiyeesiina NG'UTAMIIDA aba gurooruunatkeagwa sean;

²¹ ak ea adooyamsi geat haleanjeeda mwadaagha mwoamu gwanyakneegwa gil ghana gwalealneegwa, aba gideaba haleanjeeda mwadaagha.

²² Aba gideaba NG'UTAMIIDA mwoamu gwahista fugaaschi, aba hawunda gheawungaaschi gagasa NG'UTAMIIDA ghwanung' ahuwa fugaaschi.

²³ Nea aniini, gagasa gwasheagiidanean gideaba gaydasissa riing'eeda NG'UTAMIIDA iyaanung'waadi mooshta ASEETA aba badahuukeagwa; ak gaydaanaaleagwa ng'asheega miyaasiin ea naweeda doabiiw.

²⁴ Oawala NG'UTAMIIDA nea gabwageaw, ak gigadiyeesi muuchi aba gurooroadaang'u sean; nea giipkaadi ng'asheega hees nisineey.

²⁵ Nea iidu sina ng'asheega munyas, gajeegul uhuudeang'wa, ang'iing'i ea sugoocheandeang'wa.”