1 SAMWELI 11 - Bibliyeeda Ghaydit

Sawli ghwajoar fuga Amoni

¹ Muchu gawa Nahashi bea eemeeda Amoni ak ghwascheang'da ak ghoang'waay Yabesh-gileyadi; ak gwayeesha gwayi fuga sean bea Yabeshi Nahashi, “Eesina duupcheeda sea agooga, ak gajeegadiyeeseegwa.”

² Ng'ata gwayeesha Nahasheeda Amoni saawa, “Aba ng'asheanji gaydasin duupcheeda sea agooga, ak gaydalootiida gheanyangeagwa sean bea geatinga dugwa, ak ghaanung' ghabwaspwas fuga sean bea Israeli.”

³ Gwayeesha gweargwa Yabeshi niny, “Geaneasa eawooji ispwa ak abeeda geecheakti giijasoodiga gwasik jeeda ng'eanyiisean bea Israeli. Ama abeeda iimanda siida jea gwalealneasa, abeeda gajeapkaana headaang'u.”

⁴ Iidu nea ghwahidu giijasoodiga heeda Sawli aba Gibeya, gwarukusa ng'asheega iidiga buuneeda; ak gooyeawda buuneesean nea goojuur.

⁵ Abeeda Sawli ghwaan gwaleabu madamnyeanda nea gooweaku heewga; ak gwayi Sawli, “Gwandaani, anda buuneeda gooyeawda?” Ak geerukusa niny ng'asheega fuga Yabeshi.

⁶ Ak ghwaan guroorooda ASEETA aba uurda heeda Sawli damanda iinya ng'asheesu, ak gwaheedu nyarastaanyi muuchi.

⁷ Ng'ata gageanu yookeeda heewga, ak ghwalajaada gamaning'iidi ak ghwanung' ghwaat giijasoodiga jeeda ng'eanyiida sean bea Israeli, nea gwayeesha, “Siida wassean meana geeshta Sawli ea Samweli, abeeda gajeesima gili dugwaaschi!” Hean ghwahidu gharbeeda NG'UTAMIIDA badahuuka buuneeda, ak ghang'eataayda siyagi.

⁸ Iidu nea ghabwada geat saawa aba Beseki, ghwahita fuga Israeli sagalamnyooji bughalaji samwagu, nea fuga Yuda ea sagalamnyooji diktam ea damanamughuush.

⁹ Ng'ata geeyeesha fuga siicheakta biigu, leabu Yabeshi, “Asi ayeeshiina fuga Yabesh-gileyadi: ‘Numuji nea ghabwarbwara aseeta, gajanyasa lealeanooda, gajeelealneegwa.’” Iidu nea ghwahidu fuga siicheakta ak gwarukusa fuga Yabeshi ng'asheesu, gahoosan.

¹⁰ Ak gwayi fuga Yabeshi, “Numuji gajeapkaana headaang'u, ak gisimaneasa gididaahi gideaba ghwahit aba headaang'u.”

¹¹ Eaweedida ghabwaashaada Sawli buuneeda ak ghwanung' ghoah geenga samwagu; iimuchu sakteayda duw gang'eesa museasooda, ak ghabwar fuga Amoni ea ghang'waaniit daknooda; ak fuga ghuh ghwadarda, ea eamudu gwandeayi fih iyeenya.

¹² Ng'ata gwayeesha buuneeda Samweli, “Nih ng'eaha siida rugu gideaba, ‘Gaygoombaleasa Sawli?’ Eani fiisu, ak gajeenuuseada.”

¹³ Hean gwayeesha Sawli, “Manda siida jea eabwar askweareani, aba gideaba askweareani niyeadu NG'UTAMIIDA lealeanooda jeeda Israeli.”

¹⁴ Hean gwayeesha Samweli buuneeda, “Abeeni, eeweaya Gilgali ak geebiikti eembiida sugoocheanda.”

¹⁵ Gaweay buuneesean Gilgali, ak geembiit Sawli ghoah sugoocheanda aba madeeda NG'UTAMIIDA aba Gilgali. Ak geabwar lukghumajeega was ghadooweeda bea hoyyoo aba madeeda NG'UTAMIIDA, ak gahoosan muuchi Sawli sea fuga sean bea Israeli.