1 SAMWELI 10 - Bibliyeeda Ghaydit

¹ Ng'ata gageanu Samweli gideeshteayda nagheeda ak goodalealsa uhuuda Sawli, ak ghwasam gheata nea gwayeesha, “Neada ea mii ghoamwaarnyi NG'UTAMIIDA huwa sugoocheanda jea goombal fugaaschi was Israeli? Ak gajambala fuga NG'UTAMIIDA ak gaylealni aba geatinga weajoodiga nyaawa neaweesa. Ak gili gayghoah gwadeagooda aba headaang'u gideaba nimwaarnyi NG'UTAMIIDA huwa sugoocheanda jea ghoahaaghwa fugaaschi.

² Askweareani iisiheeli gayroonyeewana fih iyeenya aba murdeeda bung'eeda Raheli aba ng'eanyiida Benjamini mida Selsa, ak gaygwayeeshiineey, ‘Digeeniga igasayi uwi gasooda sinyas, ak ghamneawa gweanu ea mudu gang'ula ng'asheega digeeniga ak ghamneawa ghang'ut gurmeahiida aba badaydaang'u, nea gwayi, “Gaydasin naaha aba badayda orjeedeanyu?’”

³ Ak gaybeawana hoowa ak gigali mwadi ea hita sabiida Dabori; nea ghwascheang'da fih samwagu gaweay heeda ASEETA aba Beteli ak gayroonyeewana niny aba hoowa, nea siyagi ghwasar dayi samwagu bea nooga, nea nuut ghwasar mukaataji samwagu, nea niirja ghwasar shearooda difaayi.

⁴ Ak gajageacheewana ak gaygagoonyi mukaataji iyeenya, jea nyasana geatinga nyaawa.

⁵ Iimuchu gaynyuunyi Gibeyaheeda ASEETA mida lugooda Filisti; ak abeeda iihidu mujiini, gayroonyeewana mughuusheanda sibanga nea ghwararang'aana heeda sibata ASEETA nea gwandeawa gidoondooriida, ea bundiida, ea furiimbu, ea haleanjeeda sibara bea duumda aba madeanyaawa, nea ghwaramoaran.

⁶ Deagheata ghwahidu guroorooda NG'UTAMIIDA headaang'u aba uurda, ak gayramoarana sea saawa ak gajeayamnyi huwa sih nuut.

⁷ Asi ghamneawa idaahi ng'asheesu, gisini gida wassean nyas geatindaang'u, aba gideaba ASEETA gwanda headaang'u.

⁸ Ak gajasheedeawean una Gilgali; ak ging'ulayi, gaydoan headaang'u daadayda haleanjeeda ghadooweeda sighwarda ea lukghumeeda hoyyoo sighadoawanda. Gajamuukghuni askwearjooji ispwa, ea doan headaang'u ak ghaahiimneey gichea sina.”

⁹ Iidu nea ghwayam geaw goofuursa badayda ak gwanung'usa heeda Samweli, ghoadaw ASEETA gurooru nuut; ak gwasa gwadeagwajeesu seaniin eaweedida.

¹⁰ Hean nea ghwahita Gibeya, ging'ulayi, gwaroonyi sea mughuusheanda sibanga; ak ghwaan guroorooda ASEETA aba uurda headaanyi, ak ghwaramoar aba jeenyaawa.

¹¹ Iidu nea ghwadaah fuga eawoojisu nal niny gidaramoaranda sea sibanga, ak gaba siisi eesha nuut, “Ghwahiduuni badayda orjeeda Gishi? Eara Sawli gaba jeeda sibanga?”

¹² Ak ghwasha fuga bea ng'eanyiida ak gwayeesha, “Ak ghweanda nyaawa ea ng'eaha?” Ng'ata ghoah ghwasiildeanga, “Neada Sawli gaba jeeda sibanga?”

¹³ Iidu nea ghoahiit ramooranda, ghwaan heeda sibata aseeta.

¹⁴ Ghwalamda orjeeda ghamagheamata Sawli ak gwayeesha siidaanyi bea gadiyeeda, “Gigali yeenu?” Ak gwayeesha, “Geagasayi digeeniga; iidu nea gearaanyi eanyasa geeweayi heeda Samweli!”

¹⁵ Gwayeesha orjeeda ghamagheamata Sawli, “Mwaasha ASEETA, rukunean gidarukuneey Samweli.”

¹⁶ Ng'ata gwayeesha Sawli orjeeda ghamaghaamwat, “Gwarukuneasa niny gideaba digeeniga sinyas.” Nea aba iita sugoocheanduumeeda, ghayi rukusa Samweli, ea mii gwarukusa niny eara gil.

Sawli geerugu gideaba niiw sugoocheanda

¹⁷ Iimuchu gaguursa Samweli buuneeda ak ghabwada geat aba madeeda NG'UTAMIIDA aba Mispa;

¹⁸ ak gwayeesha fuga Israeli, “Asi gwayi NG'UTAMIIDA, was ASEETA Israeli, ‘Aniini gearuuni fuga Israeli Misri, ak gealealnaneegwa geatinga fuga Misri ea heeda geatinga darooraka sean ghayi sawaneegwa.’

¹⁹ Amadu askweareani ea noofooli ASEETEANG'WA, ghayi lealnaneegwa habitkwajeegeagwa sean ea sawanaduutka; ak gooyeenyi agooga, ‘Manda! Ambiineasa sugoocheanda.’ Asi ghamneawa ayaada geat heeda NG'UTAMIIDA aba dooshingeagwa ea geengeagwa.”

²⁰ Ng'ata gweadu Samweli dooshinga sean bea Israeli ea gwaneekiit, ak gealoat dooshta Benjamini.

²¹ Hean gweadu dooshta Benjamini sea fugaaschi gwaneekiit, ea fuga gheeh Matri siloat; iidu aba huuydeanda gweadu fuga gheeh Matri gwaneekiit nea gapkeana agi, ak gealoat Sawli was orjeeda Gishi. Iidu nea geegasa niny, ea meanyasa.

²² Iidu geebiikta eegasa aba heeda NG'UTAMIIDA, “Gudugwanda sih nuudi?” Gwayeesha NG'UTAMIIDA, “Ng'ula, ghafuy geaw aba jeeda dabita.”

²³ Hean gwasalda ak ghwanyasa hoowa; iidu nea ghamiinaada aba bugusta buuneeda, ea geaw ea ghang'ataawa buuneeda ghang'eada hamarjoojigaaschi ak gwadiyeada.

²⁴ Ak gwayeesha Samweli buuneesean, “Noadaayi siida was dea loat NG'UTAMIIDA? Manda siida uurji niny aba jeeda buuneesean.” Ak goojuur buuneesean nea gwayi, “Gagasa ghwanyas sugoocheanda eaweega geawi!”

²⁵ Ng'ata gwarukusa Samweli buuneeda ng'asheega huumwa ea gadiyoojiga sugoocheanda; ak gang'oorsa jeeda gitaabu ak ghamiinda aba madeeda NG'UTAMIIDA. Hit ghwanung' Samweli gaweay buuneesean, ak gaba siisi weah gheanyi.

²⁶ Eara Sawli gawa gheanyi aba Gibeya, ak goodeayi niny sea fuga mideawa uurjeenga was gea niwaas gurooruunatka nyaawa ASEETA.

²⁷ Iidu gwayi fuga marachi gil, “Gayghoamuustaan siisi gwalealneasa?” Ak geefool niny, ak ea meatawa gil.