1 Goriinto 9 - Bibliyeeda Ghaydit

Gitoobiiwsa gadiyeeda Giijasoodiga

¹ Neada aniini meabali geawi? Aniini meawoosi giijasoocheanda? Aniineeda ea mii dadaa Yesuheeda was Ng'utamiideanya? Agooga moowoosi gadiyeedeanyu aba jeeda Ng'utamiida?

² Aba gideaba iimeawoosi giijasoocheanda, aba heeda buuneeda suurja, iidu geawooschi aba heedeang'wa agooga; aba gideaba agooga goowooschi giirooraneeda giijasoocheanduumeedeanyu aba jeeda Ng'utamiida.

³ Nih gidearukwiisi fuga sikiideaweani.

⁴ Neada ea madoobiiwseasa gideaba geeyeagiischi nea geeleeshi?

⁵ Neada ea mamiiseasa gideaba geeteayeewi gatmooda, aba jeeda neayeedeanya eewuurjeewana giijasoodiga suurja sea orjooga geenyea Ng'utamiida sea Gefa?

⁶ Ghana sighus Barnaba sea aniini was fuga jea gagadiiy ak ea mwanyasa hamita?

⁷ Nih gajea ana shirikarajean gil jea gawa ng'ucheeda aba lapiyeadaanyi niny nea gaba geaw? Nih gajea ng'eaha gil siida jea gwahista sabiibu jea ea may ghwaak haghweagaaschi? Nih gajea ng'eaha gil jea gooheagwiischi ak ea mwali eanooga haleanjeeda ahaaghwa?

⁸ Heapi ng'asheesu gearugu aba gheambalmeeda siida? Neada deaweeda earada marukuna ng'asheesu?

⁹ Aba gideaba aba jeeda deaweedeeda Musa geang'waar gideaba, “Adiradi ghuuta heeyda datas booga.” Abeeda gajeeyeena ASEETA gang'ula ng'asheega heewga?

¹⁰ Neada niny ea mabaloolana badahuukaasa? Ng'asheesu geang'waar aba badahuukaasa, aba gideaba siida bwar ng'eanyi iissa gidabal ghabwar ng'eanyi nea ghwarar nea siida las booga ea dalas nea ghwarar gideaba gayghwanyas booga.

¹¹ Abeeda aseasa ghayi iisihisi mbeeyooda miyaasiin bea guroorooda jeesingeagwa, abeeda gajea ng'asheanda haw gil gideaba gealaji haleanjeedeang'wa oanyaschi?

¹² Asi iinyas buuneeda suurja haleanjeeda doabiiw aba heedeang'wa, abeeda ea mearaanyani aseasa? Iidu, ea meagassi aseasa gideaba gajeatoabiiwdunu, iissa geamilikghti haleanjeeda sean ak ea meateali Giijasta miy bea Gristo.

¹³ Moanali gideaba fugiga sin gadiyeeda aba gheeda sibata ASEETEAN gwanyassa hamita nyaawa gheeda sibata ASEETA, nea fuga sin gadiyeeda, aba heeda wagiida iissa ea mwanyasa haleanjeedida sisapa geadi bea lukghumajeegeani?

¹⁴ Gwasunu, eara Ng'utamiida gwarugu gideaba fugiga rukwiida Giijasta miyiin gay ghwanyas hamita nyaawa aba badayda Giijasta miy.

¹⁵ Amadu aniini ghanyea mii dasin earagi aba ng'asheesu doabiiwiin, ak ea mwaang'waari aba gideaba geagasayi danyas haleanjeeni. Aba gideaba ghang'wana ghaameayi mwasamwa gideaba gayghaweadanaan siida ghwaroodeanyu bea geaw.

¹⁶ Earapeadi earukwiidi Giijasta miyiin manda gichea daghwara geaw. Aba gideaba sigoonan dasin gadiyeani. Eamuy deanyu iimearukwiidani giijasta miy!

¹⁷ Aba gideaba iyeasinyi aba gida eagasiidi aniini, abeeda geandeawi giimearda; ama ii mii gida eagasiidi aniini, abeeda gadiyeeni geeteaganean.

¹⁸ Abeeda giimeardeanyu ea naaha? Ada nihi: gideaba gaydarukwiida giijasta miy nea meegu gili, ak ea mwanung' eegu gitoobiiwsean aba rukwiideayda giijasta miy.

¹⁹ Earapeadi eabali geaw aba heeda buuneessean iin geasinyi geaw giing'oonyaneeda buuneesean, ak abeeda geanyaksi geaw fuga saang'a.

²⁰ Iissa geawuurjeewi Yahudi aba heeda fuga Yahudi, ak abeeda ghaanyaschi fuga Yahudi; aba heeda fuga deaweeda, iissa geasinyi geaw siida deaweeda, earapeadi meandani jeeda deaweedean, ak abeeda ghaanyaschi fuga ang'waay deaweeda.

²¹ Nea fugiga manda jeeda deaweedean geasinyi geaw gil meandani jeeda deaweeda, nea mii gideaba meandeawani deaweeda aba heeda ASEETA gil, nea geawooschi siida mideawa deaweeda aba heeda Gristo, ak abeeda ghaanyaschi fugiga mandeawana deaweedean.

²² Aba heeda fuga ng'arng'ari iissa geawooschi ng'arng'ar, ak abeeda ghaanyaschi fuga ng'arng'ari. Geandi damanyoojiga sean aba heeda buuneesean, ak abeeda aba naweadinga sean ghaanyaschi gichea daalealdaayda buuneeda.

²³ Ak geasinyi haleanjeeda sean aba badayda giijasta miy, ak abeeda geepareanyi ghawooda sea buuneeda suurja.

²⁴ Neada ea moanali gideaba fuga galeada iissa gwasalda sean gang'aleali, nea siida jea ghwanyas shiipka ea agi? Asi agaleada ak ghoanyaschi.

²⁵ Nea siida mida jeeda deangheeda iissa ghwasaja geaw haleanjeeda sean. Asi iissa gwasindunu ak abeeda ghwanyas shiipka, ak geegaleadi ak abeeda geanyaschi shiipka mayghwadatasa.

²⁶ Asaha, eara aniini mwaafwaji mwadaagha nea manda gidabuurbuurji, ak ea meakuli dawuurji siida bwar jeameeda;

²⁷ aba sareani geasawanyi saseedeanyu nea geagadiiyi, ak ea mwaahuuwi siida rukwiisa giijasta buuneeda suurja, amadu ghaahuuyi aniini siida jea eaheawa.